ថៃ ជួបត្រី Oarfish ម្តងទៀតហើយ

ត្រី Oarfish ទឹកជ្រៅដ៏កម្រ បានបង្ហាញវត្តមាននៅប្រទេសថៃ ម្តងទៀតហើយ ដោយលើកនេះ វាជាប់សំណាញ់អ្នកនេសាទ ក្នុងសមុទ្រ Andaman កាលពីថ្ងៃសុក្រទី១៦ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាលើកទី២ហើយ ដែលត្រី Oarfish ត្រូវបានគេជួបប្រទះ ក្នុងដែនទឹករបស់ថៃ ខណៈលើកដំបូង វាត្រូវបានរកឃើញនៅក្នុងសមុទ្រនៃខេត្ត Satun កាលពីថ្ងៃទី៤ខែមករាឆ្នាំនេះ។ ត្រី​នោះ​មាន​ប្រវែង ២.៤ ម៉ែត្រ ចំណែកត្រីថ្មីនេះ មានប្រវែង២.៨៥ម៉ែត្រ និងទម្ងន់ ៨.៦ គីឡូក្រាម។

ពាក់ព័ន្ធការរកឃើញនេះ ប្រធានជលផលខេត្ត និងមន្ត្រីមកពីមជ្ឈមណ្ឌលស្រាវជ្រាវ និងអភិវឌ្ឍន៍ជលផលឆ្នេរភូកេត បានចុះទៅដល់ផែ ដើម្បីស៊ើបអង្កេត ហើយក្រោយមក ត្រីត្រូវ​​យក​ទៅ​សារមន្ទីរ​វិទ្យាសាស្ត្រ​ជាតិ​របស់​ប្រទេស​ថៃ ​សម្រាប់​ការ​សិក្សា​លម្អិត​បន្ថែម​ទៀត។

ហេតុអ្វីបានជាព័ត៌មានអំពីត្រី Oarfish ក្លាយជារឿងត្រូវចាប់អារម្មណ៍?

បើតាម National Geographic ដែលដកស្រង់ពីរឿងព្រេងនិទានរបស់ជប៉ុន ត្រីប្រភេទនេះ មានរហ័ស្សនាមថា “អ្នកនាំសារមកពីព្រះបរមរាជវាំងស្ដេចសមុទ្រ”។ ជាធម្មតា ត្រី oarfish ជាសត្វនៅទឹកជ្រៅ តែកាលណាវាឡើងមកទឹករាក់ហើយ នោះមានន័យថា នៅបាតសមុទ្រកំពុងបញ្ជូនសញ្ញាគ្រោះធម្មជាតិដូចជារលកយក្សស៊ូណាមិ ឬការរញ្ជួយដី ហើយ។

ត្រីនេះមានក្នុងមហាសមុទ្រអាត្លង់ទិក មេឌីទែរ៉ាណេ ឆ្នេរ Topanga នៅភាគខាងត្បូងរដ្ឋកាលីហ្វ័រញ៉ា ប្រទេសឈីលី និងមហាសមុទ្រប៉ាស៊ីហ្វិកភាគខាងកើត៕

អត្ថបទ៖ សុខ សុវណ្ណ

ចុចអាន៖ ត្រីរាប់ម៉ឺនក្បាល ឡើងមកឆ្នេរសមុទ្រហ្វីលីពីន ស្រាប់តែប៉ុន្មានថ្ងៃក្រោយ កើតគ្រោះរញ្ជួយដីកម្រិតធ្ងន់