នាយករដ្ឋមន្ត្រី ទទូចឱ្យអាជ្ញាធរបន្តអនុវត្តគោលនយោបាយភូមិឃុំសង្កាត់ មានសុវត្ថិភាពកាន់តែសកម្ម  

សម្ដេចនាយករដ្ឋមន្ត្រីនៃកម្ពុជា បានបន្តជំរុញឱ្យអាជ្ញាធរ និងកម្លាំងមានសមត្ថកិច្ចពង្រឹងការប្រយុទ្ធប្រឆាំងគ្រឿងញៀនខុសច្បាប់ ពង្រឹងការអនុវត្តច្បាប់ចរាចរណ៍ និងចាត់វិធានការបង្ក្រាបឱ្យបានហ្មត់ចត់លើល្បែងស៊ីសងខុសច្បាប់ សំដៅធានាឱ្យបានភូមិ-ឃុំ-សង្កាត់ មានសុវត្ថិភាព។

សម្ដេចនាយករដ្ឋមន្ត្រី ជំរុញបែបនេះ នៅចំពោះមុខថ្នាក់ដឹកនាំក្រសួងមហាផ្ទៃ អគ្គស្នងការដ្ឋាននគរបាលជាតិ គណៈអភិបាលរាជធានី-ខេត្ត ស្នងការនគរបាលរាជធានី-ខេត្ត និងមន្ត្រីក្រោមឱវាទក្រសួងមហាផ្ទៃគ្រប់ជាន់ថ្នាក់ នារសៀលថ្ងៃទី២៩ ខែកុម្ភៈ ឆ្នាំ២០២៤ នៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំរបស់ក្រសួងមហាផ្ទៃ។

នៅក្នុងពិធីបិទសន្និបាតនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីក្រោមឱវាទក្រសួងមហាផ្ទៃគ្រប់លំដាប់ថ្នាក់ ដែលបានពុះពារប្រកបដោយឆន្ទៈ និងការប្តេជ្ញាចិត្តមោះមុត រួបរួមគ្នាបំពេញបេសកកម្មបម្រើបុព្វហេតុជាតិ និងប្រជាជន ក្នុងរយៈពេលកន្លងទៅនេះ។ ជាមួយនឹងការអបអរសាទរចំពោះសមិទ្ធផលដែលសម្រេចបានក្នុងឆ្នាំ២០២៣ សម្តេចធិបតី ក៏បានដាក់ចេញនូវអនុសាសន៍គន្លឹះមួយចំនួន ជាពិសេសបន្តជំរុញការអនុវត្តគោលនយោបាយភូមិ-ឃុំ-សង្កាត់ មានសុវត្ថិភាពឱ្យកាន់តែសកម្មថែមទៀត។

សម្ដេចធិបតី បានទទូចឱ្យអាជ្ញាធរមានសមត្ថកិច្ចគ្រប់ជាន់ថ្នាក់ ត្រូវតែបន្តយកចិត្តទុកដាក់ក្នុងការងារប្រយុទ្ធប្រឆាំងគ្រឿងញៀនខុសច្បាប់ឱ្យបានកាន់តែសកម្មផុលផុសនៅតាមមូលដ្ឋាន និងនៅតាមក្រសួង-ស្ថាប័ន និងត្រូវបន្តពង្រឹងការអនុវត្តច្បាប់ចរាចរណ៍ផ្លូវគោកឱ្យបានម៉ឺងម៉ាត់ សំដៅកាត់បន្ថយឱ្យបានជាអតិបរមានូវគ្រោះថ្នាក់ និងផលប៉ះពាល់ដល់អាយុជីវិត ទ្រព្យសម្បត្តិរបស់ប្រជាពលរដ្ឋ និងបន្ទុករបស់សង្គម ដែលបង្កឡើងដោយគ្រោះថ្នាក់ចរាចរណ៍។

ទន្ទឹមគ្នានេះ ពាក់ព័ន្ធនឹងល្បែងស៊ីសង ត្រូវបានសម្ដេចនាយករដ្ឋមន្ត្រី ជំរុញឱ្យបន្តគ្រប់គ្រង ត្រួតពិនិត្យ និងចាត់វិធានការបង្ក្រាបឱ្យបានហ្មត់ចត់ល្បែងស៊ីសងខុសច្បាប់គ្រប់ប្រភេទនៅតាមមូលដ្ឋាន សំដៅថែរក្សាសន្តិសុខ និងសុវត្ថិភាព រួមចំណែកលើកកម្ពស់ជីវភាពរស់នៅ និងភាពសុខដុមរមនារបស់ប្រជាពលរដ្ឋ និងសង្គមជាតិ៕