ព័ត៌មានជាតិ

យុវជនមកពីគ្រួសារក្រីក្រ និងងាយរងហានិភ័យ ជិត ៣ ម៉ឺននាក់ បានចុះឈ្មោះចូលរៀនជំនាញរបស់រដ្ឋាភិបាលដោយឥតគិតថ្លៃ

បានផុស

២ years មុន

នៅ

ថ្ងៃសុក្រ ៥ មេសា ២០២៤

ដោយ

យុវជនមកពីគ្រួសារក្រីក្រ និងងាយរងហានិភ័យ ជិត ៣ ម៉ឺននាក់ បានចុះឈ្មោះចូលរៀនជំនាញរបស់រដ្ឋាភិបាលដោយឥតគិតថ្លៃ ក្នុងនោះមានយុវជនជាង ១ ម៉ឺន ៦ ពាន់នាក់ កំពុងសិក្សាជំនាញផ្សេងៗ នៅតាមសាលាបណ្ដុះបណ្ដាលនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅថ្ងៃទី ០៥ មេសា នេះថា ចាប់តាំងពីថ្ងៃទី ១៤ ខែវិច្ឆិកា ឆ្នាំ ២០២៣ រហូតមកដល់ថ្ងៃទី ២៩ ខែមីនា ឆ្នាំ ២០២៤ កម្មវិធីបណ្ដុះបណ្ដាលជំនាញបច្ចេកទេស និងវិជ្ជាជីវៈដល់យុវជនមកពីគ្រួសារក្រីក្រ ១ លាន ៥ សែននាក់ មានយុវជនមកពីគ្រួសារក្រីក្រ និងងាយរងហានិភ័យ ព្រមទាំងយុវជនទូទៅចំនួន ២៩ ៥៧៨ នាក់ (ស្រី ១០ ៤៣២ នាក់) បានចុះឈ្មោះចូលរៀនជំនាញ ក្នុងនោះ រាជធានីភ្នំពេញមានចំនួន ១០ ៩៨៥ នាក់ (ស្រី ៣ ៧៣៣ នាក់), ខេត្តបាត់ដំបងចំនួន ៣ ៧១២ នាក់ (ស្រី ១ ៥៨០ នាក់), ខេត្តសៀមរាប ចំនួន ២ ១១៤ នាក់ (ស្រី ៥៨១ នាក់), ខេត្តព្រះសីហនុចំនួន ១ ១៦៥ នាក់ (ស្រី ៤១៤ នាក់), ខេត្តកំពតចំនួន ១ ០២៨ នាក់ (ស្រី ២៨០ នាក់), និងបណ្ដាខេត្តផ្សេងៗ ចំនួន ១០ ៥៧៤ នាក់ (ស្រី ៣ ៨៤៤ នាក់) ដោយបែងចែកតាមវិស័យដូចជាសំណង់សរុបមានចំនួន ៤ ៦៣២ នាក់ (ស្រី ៦៨១ នាក់), អគ្គិសនី និងថាមពល ៥៥៨ នាក់ (ស្រី ៥២ នាក់), អេឡិចត្រូនិក ៤៧៧ នាក់ (ស្រី ៩០ នាក់), កម្មន្តសាល ២៣១ នាក់ (ស្រី ៣១ នាក់), មេកានិចទូទៅ/មេកានិចរថយន្ត ៤ ៤៧៤ នាក់ (ស្រី ១៧៤ នាក់), ធុរកិច្ច និងព័ត៌មានវិទ្យា ៩ ២៩៩ នាក់ (ស្រី ៤ ៩០៤ នាក់) , សេវាកម្ម ១ ៩១៦ នាក់ (ស្រី ១ ៦០៣ នាក់), បរិក្ខារត្រជាក់ និងកម្តៅ ៤ ៤៧៣ នាក់ (ស្រី ១៣៤ នាក់), ទេសចរ ២ ១៣៦ នាក់ (ស្រី ១ ៦៦២ នាក់), និងកសិកម្ម និងកសិ-ឧស្សាហកម្ម ១ ៣៨២ នាក់ (ស្រី ១ ១០១ នាក់)។

លោក កត្តា អ៊ន បានបន្តទៀតថា ក្នុងនោះមានអ្នកកំពុងរៀននៅតាមសាលាបណ្ដុះបណ្ដាលនានា សរុបចំនួន ១៦ ២៦៤ នាក់ (ស្រី ៥ ២២០ នាក់) ដែលក្រសួងការងារ និងបណ្ដុះបណ្ដាលវិជ្ជាជីវៈបានចាប់ផ្ដើមបើកវគ្គជាលើកដំបូងនៅថ្ងៃទី ១៥ ខែមករា ឆ្នាំ ២០២៤។

លោក កត្តា អ៊ន បានអំពាវនាវដល់យុវជនមកពីគ្រួសារក្រីក្រ និងងាយរងហានិភ័យ បង្កើនការចុះឈ្មោះចូលរៀនជំនាញវិជ្ជាជីវៈដោយឥតគិតថ្លៃ ដើម្បីទទួលបាននូវជំនាញមួយច្បាស់លាស់សម្រាប់ចិញ្ចឹមខ្លួនឯង និងក្រុមគ្រួសារ សំដៅលើកស្ទួយជីវភាពរស់នៅកាន់តែប្រសើរដោយអាចមកចុះឈ្មោះចូលរៀនជំនាញវិជ្ជាជីវៈ តាមរយៈកម្មវិធីទូរសព្ទដូចជា TVET 1.5M ពី APPSTORE (IOS) ឬ ពី PlayStore និងពី APPGallery ហើយរាល់ការចុះឈ្មោះមិនមានការបង់ប្រាក់ឡើយ។ ក្រៅពីនេះ ក្រសួង នៅបន្តធ្វើយុទ្ធនាការផ្សព្វផ្សាយតាមបណ្ដាញទំនាក់ទំនងសង្គម Facebook, Telegram, YouTube, TikTok និងតាមបណ្ដាញសង្គមរបស់សិល្បករ តារាចម្រៀង និងអ្នកមានប្រជាប្រិយភាពក្នុងបណ្ដាញសង្គមជាច្រើន។

លោក កត្តា អ៊ន បានបន្តទៀតថា ចំពោះសិស្សមកពីគ្រួសារក្រីក្រ និងងាយរងហានិភ័យ មិនត្រឹមតែចុះឈ្មោះចូលរៀនជំនាញដោយឥតគិតថ្លៃប៉ុណ្ណោះទេ ថែមទទួលបានប្រាក់ឧបត្ថម្ភ ២៨ ម៉ឺនរៀល ក្នុង ១ ខែ ពីរាជរដ្ឋាភិបាលផងដែរ។ ចំណែកសិស្សទូទៅ អាចចុះឈ្មោះចូលរៀនដោយឥតគិតថ្លៃដែរ តែមិនទទួលបានប្រាក់ឧបត្ថម្ភដូចសិស្សក្រីក្រ និងងាយរងហានិភ័យទេ៕

អត្ថបទ ៖ សំអឿន