ព័ត៌មានជាតិ

ទេសចរអន្តរជាតិជាង ១១ ម៉ឺននាក់ដើរលេងកម្សាន្តក្នុងឱកាសបុណ្យចូលឆ្នាំខ្មែរ កើនឡើងទ្វេដង

បានផុស

២ years មុន

នៅ

ថ្ងៃព្រហស្បតិ៍ ១៨ មេសា ២០២៤

ដោយ

យោងតាមរបាយការណ៍របស់ក្រសួងទេសចរណ៍បានបង្ហាញថា មានភ្ញៀវទេសចរប្រមាណ ២១ លាននាក់ បានដើរលេងកម្សាន្តក្នុងពិធីបុណ្យចូលឆ្នាំថ្មីប្រពៃណីជាតិខ្មែរ រយៈពេល ៤ ថ្ងៃ ក្នុងនោះមានភ្ញៀវទេសចរអន្តរជាតិ ជាង ១១ ម៉ឺននាក់ (១១០ ៣២២) កើនឡើងទ្វេដង បើប្រៀបធៀបពេលចូលឆ្នាំដូចគ្នាឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានថ្លែងថា តួលេខកើនឡើងនៃទេសចរអន្តរជាតិជាសញ្ញាវិជ្ជមានដែលគួរឱ្យត្រេកអរ ប៉ុន្តែការកើនឡើងនេះ ទេសចរភាគច្រើនគឺមកពីប្រទេសជិតខាងកម្ពុជា ដែលមានប្រទេសថៃ វៀតណាម និងប្រទេសឡាវ ហើយការចំណាយរបស់ពួកគាត់ក៏តិចតូចដែរ ដោយសារតែការធ្វើដំណើរចូលមកតាមរថយន្ត និងការស្នាក់នៅរបស់ពួកគាត់តិចតូច។

ប៉ុន្តែលោកថា ក៏មានដែរក្រុមទេសចរណ៍សហគមន៍អឺរ៉ុប ដែលចូលមកលេងកម្សាន្ត និងបានចំណាយច្រើនផងដែរទៅលើការស្នាក់នៅ និងការធ្វើដំណើរ តាមការវាយតម្លៃជាស្ដង់ដា ទេសចរអឺរ៉ុបចំណាយ ១២៥ ដុល្លារ ទៅ ១៧៥ ដុល្លារ ក្នុងមួយថ្ងៃ សម្រាប់ទេសចរម្នាក់។

ទិន្ន័យក្រសួងទេសចរណ៍ឱ្យដឹងថា ភ្ញៀវបរទេសជិត ១ លាននាក់ បានចូលមកកម្ពុជានៅក្នុងរយៈពេល ២ ខែដើមឆ្នាំ ២០២៤ កើនជិត ២០ ភាគរយបើធៀបរយៈពេលដូចគ្នាក្នុងឆ្នាំ ២០២៣ ខណៈភ្ញៀវពីប្រទេសថៃ វៀតណាមចិន និងឡាវ មានចំណែកជាង ៦០ ភាគរយនៃចំនួនភ្ញៀវបរទេសសរុប។

ប្រភពដដែលបញ្ជាក់ថា ចន្លោះពីខែមករា ដល់ខែកុម្ភៈ ឆ្នាំ ២០២៤ កម្ពុជាទទួលបានភ្ញៀវបរទេសសរុប ៩៨៨ ៥៧៤ នាក់ កើនឡើង ១៨ ភាគរយធៀបរយៈពេលដូចគ្នាកាលពីឆ្នាំមុន ដែលមានចំនួន ៨៣៧ ៤៤៦ នាក់។

ក្នុងចំណោមភ្ញៀវខាងលើគឺភ្ញៀវមកពីប្រទេសថៃ មានច្រើនជាងគេ គឺ ២៤៧ ៥៣០ នាក់ ស្មើ ២៥ ភាគរយនៃចំនួនភ្ញៀវបរទេសសរុប, វៀតណាម ១៨៥ ៣៨៥ នាក់ ស្មើ ១៨,៨ ភាគរយ, ចិន ១០៩ ៩៩០ នាក់ ស្មើនឹង ១១,១ ភាគរយ និងឡាវ ៥៤ ៥៤៦ នាក់ ស្មើ ៥,៥ ភាគរយ៕