ព័ត៌មានជាតិ
កម្ពុជា ដាក់ចេញវិធានការ ៨ ចំណុច គាំពារពលករទេសន្តរប្រវេសន៍
រាជរដ្ឋាភិបាលកម្ពុជា ដាក់ចេញវិធានការ ៨ ចំណុច ដើម្បីគាំពារពលករទេសន្តរប្រវេសន៍ ឱ្យទទួលបាននូវការគោរពសិទ្ធិ សុវត្ថិភាព និងភាពថ្លៃថ្នូរ។
លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ០៤ មិថុនា នេះថា វិធានការ ៨ ចំណុច ដើម្បីគាំពារពលករទេសន្តរប្រវេសន៍រួមមាន ៖ ១.រាជរដ្ឋាភិបាល បាន និងបន្តចុះអនុស្សរណៈយោគយល់គ្នាជាមួយប្រទេសទទួលពលករដើម្បីធានាការទទួលខុសត្រូវ និងកិច្ចការពារសិទ្ធិពលករធ្វើការនៅក្រៅប្រទេស។ ២.កិច្ចការមុនពេលចេញដំណើររបស់ពលករ គឺការភ្ជាប់ប្រព័ន្ធទិន្នន័យតាមអនឡាញ (Online) ដោយដាក់ឱ្យដំណើរការលិខិតបញ្ជាក់តម្រូវការកម្លាំងពលកម្ម និងបញ្ជីឈ្មោះពលករ ក្នុងគោលបំណងកាត់បន្ថយរយៈពេលដំណើរការការងារឱ្យកាន់តែខ្លី។ ទន្ទឹមនេះ ធ្វើការបណ្ដុះបណ្ដាលពលករអំពីបែបបទរស់នៅ វប្បធម៌ ប្រពៃណី សិទ្ធិ និងច្បាប់ នៃប្រទេសទទួលពលករ។ ៣.ជំរុញឱ្យមានចល័តភាព នៃរបបសន្តិសុខសង្គមសម្រាប់ពលករធ្វើការនៅក្រៅប្រទេស និងពេលត្រឡប់មកវិញ ដើម្បីពលកររក្សាបានរបបសន្តិសុខសង្គម។ ៤.បន្តណែនាំទីភ្នាក់ងារជ្រើសរើសពលករឯកជនឱ្យបំពេញបែបបទសហគ្រាស និងមានការទទួលខុសត្រូវចំពោះពលករ។ ចាត់វិធានការច្បាប់យ៉ាងម៉ឺងម៉ាត់ចំពោះក្រុមហ៊ុនជ្រើសរើសពលករដែលបំពានច្បាប់ និងរំលោភសិទ្ធិពលករ។ ៥.ផ្តល់កិច្ចការពារ និងជំនួយផ្នែកច្បាប់ដល់ពលករតាមរយៈស្ថានឯកអគ្គរាជទូត ស្ថានកុងស៊ុល និងអនុព័ន្ធការងារកម្ពុជាក្នុងករណីមានបញ្ហាកើតឡើងចំពោះពលករ។ ពលករអាចទំនាក់ទំនងតាមរយៈ ហតឡាញ (Hotline) ១២៩៧ ឬ ១២៨៦ ក្រុមតេលេក្រាម «សម្រាប់ពលករទេសន្តរប្រវេសន៍» នាយកដ្ឋានមុខរបរ និងហត្ថពលកម្ម ឬទូរស័ព្ទលេខ ០១១ ៨៩៨ ៩១២ ឬ ០៩៧ ៩២០ ២០២៣ ឬ ០៨៧ ២១៥ ២១៥ ឬ ០៨៩ ៩៥៧ ៧៨៩ និងមន្ទីរការងារ និងបណ្ដុះបណ្ដាលវិជ្ជាជីវៈរាជធានី-ខេត្ត។ ៦.សហការជាមួយភាគីពាក់ព័ន្ធ រួមទាំងអង្គការសង្គមស៊ីវិលក្នុងការផ្លាស់ប្ដូរព័ត៌មាន និងគាំទ្រដល់ពលករ។ ៧.បន្តផ្តល់ការអប់រំណែនាំពលករអំពីអត្ថប្រយោជន៍ និងការចេញទៅធ្វើការនៅក្រៅប្រទេសស្របច្បាប់ ចៀសវាងការទៅធ្វើការក្រៅប្រទេសដោយខុសច្បាប់ និង ៨.ផ្តល់ការបណ្ដុះបណ្ដាលជំនាញ និងស្វែងរកការងារជូនពលករពេលត្រឡប់មកមាតុប្រទេសវិញ។
បើតាម លោក កត្តា អ៊ន បានបន្តថា ការដាក់ចេញវិធានការទាំងនេះ ដើម្បីធានាបាននូវការគោរពសិទ្ធិ និងភាពថ្លៃថ្នូររបស់ពលករ ទោះជាធ្វើការនៅប្រទេសណា ទីណា ក៏រដ្ឋាភិបាលយកចិត្តទុកដាក់ និងគាំពារពលករជានិច្ច។
លោកបានបញ្ជាក់ថា បច្ចុប្បន្ននេះ កម្ពុជា មានពលករជាង ១.៣ លាននាក់ ធ្វើការនៅតាមប្រទេសចំនួន ៧ រួមមាន ៖ ថៃមានពលករច្រើនជាងគេជាង ១ លាន ២ សែននាក់ ជប៉ុន កូរ៉េខាងត្បូង ម៉ាឡេស៊ី សិង្ហបុរី តំបន់រដ្ឋបាលពិសេសហុងកុង និងប្រទេសអារ៉ាប៊ីសាអូឌីត ដោយបានផ្ញើថវិកាមកក្រុមគ្រួសារប្រមាណជិត ៣ ពាន់លានដុល្លារ រៀងរាល់ឆ្នាំ បានជួយលើកកម្ពស់ជីវភាពគ្រួសារ និងសេដ្ឋកិច្ចជាតិកាន់តែរីកចម្រើនបន្ថែមទៀត៕
អត្ថបទ ៖ សំអឿន
-
ព័ត៌មានអន្ដរជាតិ៧ ថ្ងៃ agoធ្លាក់យន្តហោះឯកជនមួយនៅអាមេរិក បណ្តាលឱ្យមនុស្សក្នុងយន្តហោះ ស្លាប់ទាំងអស់
-
ព័ត៌មានជាតិ៤ ថ្ងៃ agoថ្ងៃទី១៦មិថុនា រដ្ឋបាលភ្នំពេញរកមិនឃើញបទល្មើស ONLINE SCAMS និងទំនិញនាំចូលពីប្រទេសថៃខុសច្បាប់ទេ
-
សន្តិសុខសង្គម៦ ថ្ងៃ agoត្រួតពិនិត្យទីតាំងខុនដូ ១ កន្លែង រកឃើញជនជាតិវៀតណាម ៦ នាក់ ពាក់ព័ន្ធ Online Scams នៅខណ្ឌ ៧ មករា
-
ព័ត៌មានអន្ដរជាតិ៣ ថ្ងៃ agoអង់គ្លេសនឹងបញ្ជូនដ្រូន ១៥០ ០០០គ្រឿង និងប្រព័ន្ធរ៉ាដាជាង ៣៥០ ទៅអ៊ុយក្រែន ដោយយកលុយរុស្ស៊ីដែលបង្កកបង់ថ្លៃ
-
ព័ត៌មានអន្ដរជាតិ៦ ថ្ងៃ agoយន្តហោះទម្លាក់គ្រាប់បែកនុយក្លេអ៊ែរ អាមេរិក B-52 ធ្លាក់នៅ កាលីហ្វ័រញ៉ា ស្លាប់សមាជិកអាកាសយានិក ៨នាក់
-
ព័ត៌មានជាតិ១ សប្តាហ៍ agoអាជ្ញាធរខណ្ឌទួលគោក បន្តចុះត្រួតពិនិត្យទីតាំងលក់គ្រឿងទេស ត្រី សាច់បង្កក៤ទីតាំងបន្ថែមទៀត
-
ព័ត៌មានជាតិ៥ ថ្ងៃ agoក្រុមហ៊ុន Visa បានធ្វើបច្ចុប្បន្នភាពផែនទីសុវត្ថិភាពលើប្រព័ន្ធទូទាត់ប្រាក់ ដើម្បីបន្តកសាងទំនុកចិត្ត និងពង្រឹងភាពធន់ នៃប្រព័ន្ធទូទាត់តាមរយៈឌីជីថលនៅកម្ពុជា
-
ព័ត៌មានអន្ដរជាតិ៥ ថ្ងៃ agoទីបំផុត ថៃ ព្រមទៅ UN ដោយជ្រើសរើសអ្នកជំនាញ ២រូប ដើម្បីតតាំងជាមួយកម្ពុជា ក្រោមយន្តការ UNCLOS