អភិបាលខេត្តកំពត ជំរុញក្រុមប្រឹក្សាស្រុក ត្រូវបន្តប្រឹងប្រែងក្នុងកិច្ចសហការជាមួយក្រុមប្រឹក្សាខេត្តឲ្យកាន់តែល្អប្រសើរ

នៅព្រឹកថ្ងៃទី១២ ខែមិថុនា ឆ្នាំ២០២៤នេះ លោក ម៉ៅ ធនិន អភិបាលខេត្តកំពត និងលោក តាក ហាប់ ប្រធានក្រុមប្រឹក្សាខេត្តកំពត បានអញ្ជើញជាអធិបតី ក្នុងពិធីប្រកាសចូលកាន់តំណែង ប្រធានក្រុមប្រឹក្សាស្រុកកំពង់ត្រាច អាណត្តិទី៤ ឆ្នាំ២០២៤ ដែលពិធីនេះបានប្រារព្វឡើងនៅក្នុងបរិវេណសាលាស្រុកកំពង់ត្រាច។

បន្ទាប់ពីលោក សោម យ៉ាន ប្រធានក្រុមប្រឹក្សាស្រុកកំពង់ត្រាច អាណត្តិទី៤ បានឡើងប្តេជ្ញាចិត្តរួចមក លោក ម៉ៅ ធនិន អភិបាលខេត្តកំពត បានបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវទស្សនៈវិស័យផ្ដោតលើកិច្ចការងារដែលត្រូវធ្វើចំពោះមុខ គឺត្រូវស្គាល់ខ្លួនឯងឱ្យបានច្បាស់លាស់ហើយ ស្គាល់អំពីរបៀងសេដ្ឋកិច្ចតំបន់ឆ្នេរដោយត្រូវរួមកម្លាំងគ្នាប្រកួតប្រជែងជាមួយតំបន់របៀងសេដ្ឋកិច្ចដទៃទៀតក្នុងប្រទេសកម្ពុជា។

លោកអភិបាលខេត្តកំពត បានលើកឡើងទៀតថា ក្នុងអាណត្តិទី៣កន្លងមក ប្រធានក្រុមប្រឹក្សាខេត្តបានរួមសហការជាមួយគណៈអភិបាលខេត្ត ក៏ដូចជាអាជ្ញាធរមូលដ្ឋានបានយ៉ាងម៉ឺងម៉ាត់ល្អប្រសើរ និងជិតស្និតបំផុត ដើម្បីរួមគ្នាដោះស្រាយបញ្ហាប្រឈមនានារបស់ប្រជាពលរដ្ឋក្នុងមូលដ្ឋាន។

ចំពោះនៅក្នុងអាណត្តិទី៤នេះដែរ លោក ម៉ៅ ធនិន អភិបាលខេត្តកំពត បានជំរុញដល់ក្រុមប្រឹក្សាស្រុក ត្រូវបន្តខិតខំប្រឹងប្រែងក្នុងកិច្ចសហការជាមួយក្រុមប្រឹក្សាខេត្តឱ្យកាន់តែល្អប្រសើរ និងស្អិតរមួតបន្តទៀត ក្នុងន័យរួមគ្នាដើម្បីបម្រើផលប្រយោជន៍រួមជូនដល់ប្រជាពលរដ្ឋ នៅគ្រប់មូលដ្ឋាន ឱ្យកាន់តែមានភាពកក់ក្តៅជូនប្រជាពលរដ្ឋឱ្យបានល្អប្រសើរបន្ថែមទៀត៕

អត្ថបទ៖ សឹង រ៉ាត់