វៀតណាមរៀបចំពិព័រណ៍ពាណិជ្ជកម្មនៅដាណាំង ផ្ដល់​ឱកាសឱ្យក្រុមហ៊ុនកម្ពុជាចូលរួម

គណៈកម្មាធិការប្រជាជនទីក្រុងដាណាំង ប្រទេសវៀតណាម នឹងរៀបចំពិព័រណ៍ពាណិជ្ជកម្ម ទេសចរណ៍ និងវិនិយោគអន្តរជាតិ ទីក្រុងដាណាំង ឆ្នាំ២០២៤ ចាប់ពីថ្ងៃទី២-៧ ខែសីហា ឆ្នាំ២០២៤ នៅមជ្ឈមណ្ឌលពិព័រណ៍ដាណាំង ប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងពាណិជ្ជកម្មកម្ពុជាបានប្រកាសថា ពិព័រណ៍ពាណិជ្ជកម្មអន្តរជាតិនេះ រៀបចំឡើង ដើម្បីពង្រឹងកិច្ចសហប្រតិបត្តិការ​លើវិស័យសេដ្ឋកិច្ច ពាណិជ្ជកម្ម ទេសចរណ៍ និងការផ្លាស់ប្តូរវិនិយោគ រវាងសហគ្រាសក្នុងស្រុក ជាមួយអន្តរជាតិក្នុងបណ្តាប្រទេសជាសមាជិកអាស៊ាន។

បើតាមក្រសួងពាណិជ្ជកម្ម ជុំវិញការចូលរួមព្រឹត្តិការណ៍នេះ គណៈកម្មការរៀបចំពិព័រណ៍នឹងផ្តល់ស្តង់ជូនក្រសួងពាណិជ្ជកម្ម​កម្ពុជាចំនួន២ ដោយឥតគិតថ្លៃ។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា ​(GDCE)​ គិតចាប់ពីខែមករា ដល់ខែឧសភា ​ឆ្នាំ ២០២៤ ​ទំហំពាណិជ្ជកម្មកម្ពុជា-វៀតណាម សម្រេចបានទឹកប្រាក់ ៣,៥៥ ពាន់លានដុល្លារ កើន​ឡើង​២៤ ភាគរយ ក្នុងនោះការនាំចេញរបស់កម្ពុជាមានទឹកប្រាក់ ១,៨៨ ពាន់លានដុល្លា កើន​ឡើង ៤២.៦ ភាគ​រយ ​ប្រៀបធៀបនឹងរយៈ ពេលដូចគ្នាកាលពីឆ្នាំមុន។ ​​

ចំណែកឯការនាំចូលទំនិញរៀតណាមមកកម្ពុជា សម្រេចបានទឹកប្រាក់ ១,៦៧ ពាន់លានដុល្លារ កើន ៨ ភាគរយ៕

អត្ថបទ៖ ឡេង ដេត