លោកអគ្គលេខាធិការបាល់ទាត់ស៊ែប៊ីលាលែងពីតំណែងក្រោយមានរឿងអាស្រូវ

លោក Jovan Šurbatović បានប្រកាស​លាស​ឈប់​ពី​តំណែងជា​អគ្គលេខាធិការ​សហព័ន្ធ​កីឡា​បាល់ទាត់​ស៊ែប៊ី បន្ទាប់ពីក្រុមជម្រើសជាតិ​បានធ្លាក់ចេញពីព្រឹត្តិការណ៍អឺរ៉ូ ឆ្នាំ​២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jovan Šurbatović បាន​ម្រេចចិត្តលាលែងពីតំណែង មុនការប្រកួតចុងក្រោយ​នៅ​វគ្គសន្សំពិន្ទុ​ក្នុង​ពូល។ រឿងនេះមិនមែនដោយសារបញ្ហាអាកប្បកិរិយារបស់អ្នកគាំទ្រស៊ែប៊ីបង្កភាពមិនប្រក្រតីក្នុងការប្រកួត​នៅ​ក្នុង​ព្រឹត្តិការណ៍​អឺរូនោះទេ។ ការលាឈប់​​របស់​លោក ​កើត​ឡើង​ដោយសារ​រឿង​អាស្រូវ​គឺពាក់ព័ន្ធជើងហោះហើរដែលក្រុម​ជម្រើស​ជាតិ​ស៊ែប៊ី​​បាន​ជិះ​ក្នុង​ការ​ដំណើរ​ទៅ​ប្រទេស​អាល្លឺម៉ង់ជា​យន្តហោះ​ដែល​បាន​ចុះ​ឈ្មោះ​ក្នុង​ប្រទេស​ក្រូអាត។

ប្រធានសភាប្រទេសស៊ែប៊ី លោកស្រី Ana Brnabić បាននិយាយថា ក្រុមបាល់ទាត់ស៊ែប៊ី បានធ្វើដំណើរទៅកាន់ប្រទេសអាល្លឺម៉ង់ សម្រាប់ការប្រកួតជើងឯកអឺរ៉ុបតាមយន្តហោះរបស់ប្រទេសក្រូអាត។ ស្របពេលនោះនាយករដ្ឋមន្ត្រីនៃប្រទេសស៊ែប៊ី លោក Aleksandar Vučić ដែលឡើងយន្តហោះទៅមើលកីឡាករទាំងអស់ហាក់មានការខឹងសម្បារនិងករណីនេះ។

លោកស្រី Ana Brnabić  បាននិយាយថា ៖«វាជារឿងពិត។ វា​ជា​រឿង​គួរ​ឲ្យ​អាម៉ាស់​ណាស់​ដែល​ធ្វើ​ឲ្យ​​លោក Vucic ខឹង​យ៉ាង​ខ្លាំង។ យើង​មានក្រុមហ៊ុនហោះហើរ Air Serbia ផ្ទាល់​ខ្លួនហើយ​យើង​ទាំង​អស់​គ្នា​អាចធ្វើ​ដំណើរ​ទៅ​តាម​ក្រុមហ៊ុន​នោះ​បាន​។ នៅពេលយន្តហោះចុះចត អ្នកអាចមើលឃើញ ពីមោទនភាពរបស់យើងជាមួយក្រុមហ៊ុនស្រុក»។

ចំពោះករណីនេះរដ្ឋាភិបាលបានរង់ចាំដល់ក្រុមស៊ែប៊ីប្រកួត​ចប់​​ មុនពេលលើកឡើងអំពីបញ្ហានេះ ដើម្បីកុំឲ្យមានការខឹងសម្បារពី​អ្នក​គាំទ្រ។

លោកស្រី Ana Brnabić  បានបន្ថែមថា ៖«វាចាំបាច់ណាស់ក្នុងការកំណត់ថាតើវាកើតឡើងយ៉ាងដូចម្តេច? អ្នកណាជាអ្នកទទួលខុសត្រូវ ចំពោះ​ក្រុមជម្រើសជាតិស៊ែប៊ីបានធ្វើដំណើរតាមយន្តហោះរបស់ប្រទេសក្រូអាត»។

ប្រែសម្រួល៖ ផា រតនា