ប្រឡាយមួយខ្សែដែលកំពុងជីកអាចសង្រ្គោះតំបន់លិចលង់បាន៥សង្កាត់ ក្នុងទឹកដីខណ្ឌច្បារអំពៅ

លោក ចេង មុនីរ៉ា អភិបាលខណ្ឌច្បារអំពៅ ធ្លាប់បានថ្លែងប្រាប់«កម្ពុជាថ្មី»ឲ្យដឹងថា ចំពោះប្រឡាយដ៏ធំដែលអាជ្ញាធរកំពុងដាក់គ្រឿងចក្រជីកដាក់ប្រពន្ធ័លូធំនេះអាចសង្រ្គោះពីជំនន់ទឹកភ្លៀងនារដូវវស្សាបានចំនួន៥សង្កាត់ក្នុងមូលដ្ឋានខណ្ឌច្បារអំពៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជំនាញនៃសាធារណការសាលាខណ្ឌច្បារអំពៅបានឲ្យកម្ពុជាថ្មីដឹងថា រាល់ថ្ងៃនេះគ្រឿងចក្របានសម្រុកស្តាប្រឡាយធំមួយខ្សែសម្រាប់រំដោះទឹកចេញពីទីតាំងដែលធ្លាប់រងការលិចលង់ដែលក្នុងនោះមានសង្កាត់ចំនួន៥ក្នុងចំណោមសង្កាត់ទាំង៨ក្នុងមូលដ្ឋានខណ្ឌច្បារអំពៅរាជធានីភ្នំពេញ។សង្កាត់ទាំង៥នោះរួមមានសង្កាត់ព្រែកប្រា សង្កាត់ព្រែកថ្មី សង្កាត់ព្រែកឯង សង្កាត់វាលស្បូវនិងសង្កាត់វាលស្បូវ។

ចំពោះដំណើរការជីប្រឡាយធំនេះដែរ ប្រជាពលរដ្ឋក្នុងសង្កាត់ទាំង៥ខាងលើមានក្តីរីករាយ ព្រោះលែងព្រួយបារម្ភពីការលិចលង់លំនៅឋាន និងដីចំការតទៅទៀត ខណៈរយៈពេលជិត៥ឆ្នាំមក រៀងរាល់រដូវវស្សាម្តងៗពួកគាត់តែងតែជួបប្រទះបញ្ហាទឹកជំនន់លិចលង់អស់ពេលជាច្រើនខែទំរាំតែបានស្រកទៅវិញ។

គួរបញ្ជាក់ថាប្រឡាយដ៏ធំនេះឆ្លងកាត់បឹង ព្រែកឯង វាលស្បូវ ព្រែកថ្មីនិងព្រែកប្រា បច្ចុប្បន្នប្រឡាយចាស់នេះត្រូវលុបបំបាត់ដោយសារបំណាក់ដី៕

អត្ថបទ៖នរា