ជីវិតកម្សាន្ដ

វណ្ណដា បានត្រឹមសរសេរសំបុត្រទាំងទឹកភ្នែកចូលរួមរំលែកទុក្ខលោកតា គង់ ណៃ

បានផុស

១ year មុន

នៅ

ថ្ងៃចន្ទ ១ កក្កដា ២០២៤

ដោយ

កំពូលតារាចម្រៀងរ៉េប វណ្ណដា បន្ទាប់ពីទទួលដំណឹងនៃការទទួលមរណភាពរបស់ព្រឹទ្ធាចារ្យកោសល្យវោហារលោកតា គង់ ណៃ បានធ្វើឲ្យលោករន្ធត់ចិត្តយ៉ាងខ្លាំង ខណៈដែលពេលនេះលោកកំពុងចេញទៅសម្តែងនៅឯក្រៅប្រទេសដោយមិនអាចមានឱកាសចូលរួមបុណ្យសព និងជូនដំណើរជាលើកចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារារ៉េប វណ្ណដា កន្លងមកគឺធ្លាប់តែជាមនុស្សដែលរឹងមាំមិនដែលស្រក់ទឹកភ្នែកឲ្យមហាជនបានឃើញឡើយ ប៉ុន្តែអ្វីដែលធ្វើឲ្យលោករន្ធត់ចិត្តខ្លាំងរហូតស្រក់ទឹកភ្នែកនោះក្រោយពេលដែលតារាប្រុសរូបនេះទទួលដំណឹងនៃមរណភាពរបស់លោកគ្រូ(ព្រឹទ្ធាចារ្យកោសល្យវោហារលោកតា គង់ ណៃ)។

វណ្ណាដា បានសរសេរសំណេររៀបរាប់លាយឡំទឹកភ្នែកថា“នៅពេលដែលឮដំណឹងមួយនេះពិតជាពិបាកទទួលយក ពិបាកនឹងទប់ទឹកភ្នែកស្របពេលដែលខ្ញុំកំពុងពង្រីកពីភាពអស្ចារ្យនៃសិល្ប:ខ្មែរ តន្រ្តីខ្មែរ និងបានពាំនាំឧបករណ៍តន្រ្តីបុរាណខ្មែរដូចជា, ខ្មុយ ទ្រ ចាប៉ី ឃឹម មកតំណាងឲ្យប្រទេសកម្ពុជាទទួលបានការស្រលាញ់គាំទ្រគោរពជាទីមោទនៈ ស្រាប់តែទទួលបានដំណឹងដ៏ស្លុតចិត្តពីដែនដីកំណើតដោយក្រុមការងារប្រាប់ថាលោកគ្រូ គង់ ណៃ បានទទួលមរណភាពដោយរោគាពាធ”។

លោកបន្តថា «ដំណឹងនេះពិតជាប៉ះទង្គិចផ្លូវចិត្តខ្ញុំខ្លាំងណាស់ព្រោះលោកគ្រូ លោកតាព្រឹទ្ធាចារ្យកោសល្យវោហារលោកតា គង់ ណៃ គឺជាចំណែកដ៏ធំមួយនៃភាពជោគជ័យនៅបច្ចុប្បន្ននេះ។ ពាក្យទូន្មានប្រៀនប្រដៅរបស់លោកគ្រូគឺនៅតែដក់ជាប់ខ្ញុំជារៀងរហូត បើទោះបីខ្ញុំផ្ទាល់មិនទាន់បានត្រឡប់ទៅមាតុភូមិវិញទៅជួបលោកតាឲ្យទាន់ដង្ហើមចុងក្រោយតែខ្ញុំដឹងថាលោកតាកំពុងជូនពរពួកយើងឲ្យកម្លាំងចិត្តពួកយើងថែមទៀតសម្រាប់ថែរក្សាការពារសម្លេងនៃឧបករណ៍បុរាណខ្មែរ»។

ការដែលបាត់បង់លោកតាគឺជាការបាត់បង់ធនធានដ៏អស្ចារ្យដែលលោកតាដើរតួយ៉ាងសំខាន់ក្នុងការបង្រៀនយើងឲ្យតស៊ូក្នុងជីវិតមួយនេះ។ ជាចុងក្រោយ ខ្ញុំសូមផ្ញើក្តីស្រលាញ់ ក្តីនឹករលឹកជូនទៅកាន់លោកយាយ អរគុណដែលបានមើលថែរក្សា ការពារលោកតា មានក្តីស្រលាញ់ឥតលក្ខខណ្ឌចំពោះលោកតាចៅសូមចូលរួមរំលែកទុក្ខដ៏ក្រៀមក្រំមួយនេះជូនចំពោះលោកយាយ និងក្រុមគ្រួសារ សូមជូនពរលោកយាយឲ្យមានសុខភាពល្អ អាយុយឺនយូរជារៀងរហូតតទៅ។

សូមបញ្ជាក់ថាលោកតា គង់ ណៃ បានទទួលមរណភាពនៅថ្ងៃសុក្រ ៧រោច ខែជេស្ន ឆ្នាំរោង ឆស័ក ព.ស .២៥៦៨ ត្រូវនឹងថ្ងៃទី២៨ ខែមិថុនា ឆ្នាំ២០២៤ កន្លងទៅថ្មីៗនេះ ក្នុងជន្មាយុ ៨០ឆ្នាំ ដោយរោគាពាធនៅឯស្រុកកំណើតខេត្តកំពត៕

អត្ថបទ៖ ចាន់រ៉ា