ក្រោយទទួល​ដំណឹងថាឈឺ តារារ៉េបវណ្ណដា ចុះ​ទៅ​ជួបព្រឹទ្ធាចារ្យ គង់ ណៃ ដល់​គេហដ្ឋាន

លោកតាព្រឹទ្ធាចារ្យកោសល្យវោហារ គង់ ណៃ បច្ចុប្បន្នកំពុងមានជំងឺសួត និងជំងឺទឹកនោមផ្អែមសម្រាកព្យាបាលនៅគេហដ្ឋានភូមិដូងឃុំស្វាយទង ស្រុកកំពង់ត្រាចខេត្តកំពត។ ដំណឹងនេះបានធ្វើឲ្យមហាជននិងអ្នកគាំទ្រសម្តែងក្តីព្រួយបារម្ភហើយជូនពរគ្រប់គ្នា។

ដោយឡែកកំពូលតារាចម្រៀងរ៉េបល្បីប្រចាំប្រទេសកម្ពុជា លោក វណ្ណដា បន្ទាប់ពីទទួលដំណឹងនៃការធ្លាក់ខ្លួនឈឺពីសំណាក់ព្រឹទ្ធាចារ្យកោសល្យវោហារ គង់ ណៃ ដែលកំពុងសម្រាកព្យាបាលនៅគេហដ្ឋានក៏បានធ្វើដំណើរស្កាត់ទៅសុខទុក្ខដោយផ្ទាល់។

ក្រោយបានជួបសួរសុខទុក្ខលោកតាព្រឹទ្ធាចារ្យកោសល្យវោហារ គង់ ណៃ តារារ៉េប វណ្ណដា បានទម្លាយអារម្មណ៍យ៉ាងក្តុកក្តួល។ នៅយប់ថ្ងៃទី ១១ ខែវិច្ឆិកា តារាចម្រៀងរ៉េប វណ្ណដា បានថាឆ្លៀតពេល ចុះសួរសុខទុក្ខលោកគ្រូតាព្រឹទ្ធាចារ្យ គង់ណៃ ជូនពរលោកគ្រូឆាប់ជាសះស្បើយ សុខភាពល្អ មានទាំងកម្លាំមង​និងបញ្ញាជាម្លប់ដល់កូនចៅព្រមទាំងផ្ញើក្តីស្រ លាញ់និងក្តីរលឹកដល់លោកយាយដូចគ្នាពីចៅ វណ្ណដា។

បើតាមការបញ្ជាក់ឲ្យដឹងពី លោក គង់ សម័យ ដែលជាកូនប្រុសបង្កើតរបស់លោកតា គង់ ណៃ បានប្រាប់ថា ដោយទទួលបានដំណឹងធ្លាក់ខ្លួនឈឺព្រឹទ្ធាចារ្យកោ សល្យវោហារ គង់ ណៃ តារារ៉េប វណ្ណដាក៏បានចុះទៅសួរសុខទុក្ខដោយផ្ទាល់កាលពីថ្ងៃទី១០ខែវិច្ឆិកា។ តាមរយ:នេះដែរក៏​មានអ្នកគាំទ្រជាច្រើនបានសរសើរទឹកចិត្ត វណ្ណដា ជាមួយការជូនពរលោកតា គង់ ណៃ ឆាប់ជាសះស្បើយពីជំងឺផងដែរ។

អ្នកគាំទ្រធ្លាប់ដឹងហើយស្នាដៃបទចម្រៀងដំបូងដែលពុំធ្លាប់មានរបស់តារារ៉េបវណ្ណដា ដែលបានចាប់ដៃគូជាមួយលោកតា គង់ ណៃ ក្នុងបទចម្រៀងមានចំណង់ជើងថា“ Time to Rise “ កាលពីកន្លងទៅគឺបានផ្ទុះការគាំទ្រខ្លាំងលើស្រទាប់មហាជនទូទៅ។ ដោយសារហេតុផលនេះទើបវណ្ណដា តែងដឹងគុណចំពោះព្រឹទ្ធាចារ្យកោសល្យវោហារ គង់ ណៃ។

លោក វណ្ណដា ក៏ត្រូវបានគេចាត់ទុកថាជាតារាចម្រៀងរ៉េបវ័យក្មេងដែលកំពុងសាងកេរ្តិ៍ល្បីល្បាញខ្លាំងទាំងទីផ្សារក្នុងនិងក្រៅស្រុក។ វណ្ណដា ក៏ជាតារាចម្រៀងខ្មែរមួយរូបបានធ្វើឲ្យប្រទេសជិតខាងជាច្រើនបានស្គាល់តម្លៃសិល្ប:នៅកម្ពុជាព្រោះ លោកតែងនាំយកវប្បធម៌អរិយធម៌ខ្មែរទៅបង្ហាញលើឆាកអន្តរជាតិអោយពិភពលោកបានដឹងនិងទទួលស្គាល់៕

អត្ថបទ៖ចាន់រ៉ា