៦ខែ ឆ្នាំនេះ កម្ពុជាទទួលបានចំណូលជាង ២៤លានដុល្លារ ពីការលក់ប័ណ្ណចូលទស្សនារមណីយដ្ឋានអង្គរ

រយៈពេល ៦ខែ ឆ្នាំ២០២៤ នេះ កម្ពុជាទទួលបានចំណូលជាង ២៤លានដុល្លារ ពីការលក់ប័ណ្ណចូលទស្សនា រមណីយដ្ឋានអង្គរ ប្រាសាទកោះកែរ រមណីយដ្ឋានធម្មជាតិបឹងទន្លេសាប។ នេះបើយោងតាមសេចក្ដីប្រកាសព័ត៌មាន ស្តីពីស្ថិតិភ្ញៀវទេសចរបរទេស ទិញប័ណ្ណចូលទស្សនារមណីយដ្ឋានអង្គរ ដែលទទួលបានពីគ្រឹះស្ថានអង្គរ កាលពីពេលថ្មីៗនេះ។

លិខិតបានបញ្ជាក់ថា រយៈពេល ៦ខែ ឆ្នាំ២០២៤ នេះ ភ្ញៀវទេសចរបរទេសទិញប័ណ្ណចូលទស្សនារមណីយដ្ឋានអង្គរ និង ប្រាសាទកោះកែរ មានចំនួន ៥២១ ៩៥០នាក់ កើន ៣៥.៣០% និងទទួលបានចំណូល ២៤ ៣៥៧ ៦៩៥ដុល្លារអាមេរិក កើនឡើង ៣៦.២៤% បើធៀបនឹងរយៈពេលដូចគ្នា នៅឆ្នាំ២០២៣។ រយៈពេល ៦ខែ ឆ្នាំនេះ រដ្ឋាភិបាលបានឧបត្ថម្ភមូលនិធិ នៃមន្ទីរពេទ្យគន្ធបុប្ផាកម្ពុជា បានចំនួនសរុប ១ ០៤៣ព ៩០០ដុល្លារអាមេរិក ពីចំណែកនៃការលក់ប័ណ្ណ ជូនភ្ញៀវទេសចរបរទេស ចូលទស្សនារមណីយអង្គរ ដើម្បីជួយក្នុងមូលនិធិ សម្រាប់សង្គ្រោះជីវិតកុមារកម្ពុជា។ 

សូមបញ្ជាក់ថា នៅក្នុងឆ្នាំ២០២៣ ភ្ញៀវទេសចរបរទេស ទិញប័ណ្ណចូលទស្សនារមណីយដ្ឋានអង្គរ មានចំនួនជាង ៧៩ម៉ឺននាក់ ទទួលបានចំណូល ៣៧ ១៩៨ ៩៨៨ ដុល្លារអាមេរិក កើនឡើងចំនួន ២២២.៦៨ភាគរយ៕

 អត្ថបទ៖ គឿនវេត