ព័ត៌មានជាតិ

អាជ្ញាធរខណ្ឌឫស្សីកែវ ចុះត្រួតពិនិត្យមើលទីតាំងត្រូវស្ថាបនា អភិវឌ្ឍន៍ នៅក្នុងមូលដ្ឋាន

បានផុស

២ years មុន

នៅ

ថ្ងៃសៅរ៍ ២៧ កក្កដា ២០២៤

ដោយ

ភ្នំពេញ ៖ លោកអភិបាលខណ្ឌឫស្សីកែវ បានបន្តចុះត្រួតពិនិត្យមើលតាមទីតាំងត្រូវស្ថាបនា អភិវឌ្ឍន៍ នៅក្នុងមូលដ្ឋានជាប់ជាប្រចាំ នេះជាការយកចិត្តទុកដាក់របស់រដ្ឋបាលខណ្ឌឫស្សីកែវ។

ជាក់ស្ដែងនាល្ងាចថ្ងៃសៅរ៍ ទី២៧ ខែកក្កដា ឆ្នាំ២០២៤ លោក ជិន ប៊ុនធឿន អភិបាលខណ្ឌឫស្សីកែវ បានចុះសួរសុខទុក្ខប្រជាពលរដ្ឋ រស់នៅក្នុងភូមិ ក្រុម១០ ភូមិឃ្លាំងសាំង សង្កាត់គីឡូម៉ែត្រលេខ៦ និងពិនិត្យមើលផ្លូវដែលនឹងស្ថាបនាចាក់បេតុងប្រវែង ៣៣០ម៉ែត្រ និងលូ ទទឹង៥.៥៤ម៉ែត្រ និងកម្រាស់ ១តឹកកន្លះ នាពេលខាងមុខ។

នាឱកាសនោះ លោកអភិបាលខណ្ឌ សូមបងប្អូនប្រជាពលរដ្ឋក៏ដូចជាអ្នកធ្វើដំណើរ អធ្យាស្រ័យយោគយល់ក្នុងពេលកំពុងសាងសង់ផ្លូវបេតុងថ្មីមួយខ្សែនេះ។

ប្រជាពលរដ្ឋរស់នៅតាមកំណាត់ផ្លូវដែលត្រូវស្ថាបនាជាផ្លូវបេតុង មានក្តីសោមនស្សរីករាយ និងថ្លែងអំណរគុណដល់អាជ្ញាធរ ដែលបានយកចិត្តទុកដាក់ការអភិវឌ្ឍមូលដ្ឋាន ត្បិតផ្លូវមួយនេះមានការលំបាកធ្វើដំណើរនារដូវវស្សារាល់ឆ្នាំ តែក្រោយពីស្ថាបនារួចនឹងលែងលំបាកដូចមុនទៀតហើយ ងាយស្រួលធ្វើដំណើរ និងរករបរទទួលទានចិញ្ចឹមជីវិតរាល់ថ្ងៃ។

ជាមួយគ្នានេះដែរ លោកអភិបាលខណ្ឌឫស្សីកែវ បានចុះពិនិត្យការតាំងលក់ដូររបស់ប្រជាពលរដ្ឋ ត្រង់ចំណុចផ្លូវបេតុងថ្មី (អតីតផ្លូវរថភ្លើងចាស់) ក្នុងភូមិទួលសង្កែ សង្កាត់ទួលសង្កែ១ ដោយស្នើឲ្យអ្នកដូរ ត្រូវលក់ដូរលើចិញ្ចើមផ្លូវ ជៀសវាងដាក់លក់គ្មានរបៀបរៀបរយ នាំឱ្យបាត់បង់សណ្តាប់ធ្នាប់ និងបង្កកាតកក់ស្ទះចរាចរណ៍ក្នុងមូលដ្ឋានផងដែរ៕

អត្ថបទ ៖ សុភា