ព័ត៌មានជាតិ

រដ្ឋបាលខណ្ឌឫស្សីកែវ អនុវត្តផែនការស្តារប្រឡាយអូរវែង ត្រៀមការពារការជន់លិចនារដូវវស្សា

បានផុស

៤ ខែ មុន

នៅ

ថ្ងៃអង្គារ ១០ មីនា ២០២៦

ដោយ

កាលពីព្រឹកថ្ងៃទី ៩ ខែមីនា ឆ្នាំ ២០២៦ លោក ឃួង ស្រេង អភិបាលរាជធានីភ្នំពេញ បានអញ្ជើញចុះត្រួតពិនិត្យការអនុវត្តផែនការស្តារប្រឡាយមេអូរវែង ស្ថិតក្នុងមូលដ្ឋានខណ្ឌឫស្សីកែវ ដើម្បីពង្រឹងប្រព័ន្ធរំដោះទឹក និងត្រៀមការពារបញ្ហាទឹកលិចនារដូវវស្សាឆ្នាំថ្មីខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាស នៃការចុះពិនិត្យការងារនេះ មានការអមដំណើរដោយលោកអភិបាលរងខណ្ឌឫស្សីកែវ លោកប្រធានការិយាល័យសាធារណការ និងបរិស្ថានខណ្ឌ ព្រមទាំងមន្ត្រីជំនាញពាក់ព័ន្ធជាច្រើននាក់ ផងដែរ។ ការចុះពិនិត្យផ្ទាល់នេះ ដើម្បីវាយតម្លៃពីវឌ្ឍនភាព នៃការស្តារប្រឡាយ ក៏ដូចជាណែនាំបន្ថែមដល់មន្ត្រីជំនាញ ឲ្យអនុវត្តការងារបានទាន់ពេលវេលា និងមានប្រសិទ្ធភាពខ្ពស់។

លោក គន់ សោភា ដែលបានចូលរួមអមដំណើរ បានឲ្យដឹងថា រដ្ឋបាលខណ្ឌ បានដាក់គ្រឿងចក្រ «អេស្កាដៃវែង» ដើម្បីធ្វើការស្តារប្រឡាយអូរវែងនេះ ហើយគឺជាផ្នែកមួយ នៃផែនការធំរបស់រដ្ឋបាលរាជធានីភ្នំពេញ ដឹកនាំដោយ លោក ឃួង ស្រេង ក្នុងការពង្រឹងប្រព័ន្ធលូ និងប្រឡាយរំដោះទឹកនៅតាមតំបន់សំខាន់ៗ ក្នុងរាជធានី។

លោកបញ្ជាក់ថា លោកអភិបាលរាជធានី បានណែនាំឲ្យរដ្ឋបាលខណ្ឌយកចិត្តទុកដាក់ខ្ពស់លើការថែទាំ ការសម្អាត និងការស្តារប្រព័ន្ធលូ ប្រឡាយ និងផ្លូវរំដោះទឹក ដើម្បីធានាថាប្រព័ន្ធទឹកអាចដំណើរការបានល្អ។

លោកបន្តថា ការស្តារប្រឡាយមេអូរវែង មិនត្រឹមតែជួយបង្កើនសមត្ថភាពរំដោះទឹកប៉ុណ្ណោះទេ ប៉ុន្តែថែមទាំងជួយលើកកម្ពស់សោភ័ណភាពបរិស្ថាន និងបង្កើនអនាម័យក្នុងសហគមន៍ផងដែរ។ ជាមួយនឹងការអនុវត្តផែនការនេះ រដ្ឋបាលខណ្ឌឫស្សីកែវ រំពឹងថា នឹងអាចបញ្ចប់ការងារស្តារប្រឡាយឲ្យបានទាន់ពេលវេលា មុនពេលចូលដល់រដូវវស្សា។

គួរជម្រាបថា ជារៀងរាល់ឆ្នាំ មុនរដូវវស្សាខិតចូលមកដល់ រដ្ឋបាលខណ្ឌឫស្សីកែវ តែងតែដាក់គ្រឿងចក្រស្តាររាល់គ្រប់ប្រព័ន្ធរំដោះទឹកដែលមានសារៈសំខាន់បំផុតក្នុងការបញ្ចៀសការលិចលង់ក្នុងមូលដ្ឋាន។ ជាមួយគ្នានេះ អាជ្ញាធរមូលដ្ឋាន ក៏បានអំពាវនាវដល់ប្រជាពលរដ្ឋចូលរួមថែរក្សាបរិស្ថាន និងកុំបោះសំរាមចូលក្នុងប្រឡាយ ឬប្រព័ន្ធលូ ដើម្បីជួយរក្សាឲ្យប្រព័ន្ធរំដោះទឹកដំណើរការបានល្អ និងរួមចំណែកក្នុងការការពារបញ្ហាទឹកលិចនៅរាជធានីភ្នំពេញ៕

អត្ថបទ ៖ សំណាង