តំណាងអយ្យការសម្រេចចោទប្រកាន់ស្ត្រីឈ្មោះ ម៉េង លីហ័រ ពាក់ព័ន្ធករណីផ្ទុះអាវុធ

ជនសង្ស័យជាស្ដ្រីម្នាក់ឈ្មោះ ម៉េង លីហ័រ ដែលបានប្រើប្រាស់អាវុធបាញ់បោះសេរី និងបង្ហោះក្នុងបណ្ដាញសង្គមជាសាធារណៈត្រូវបានតំណាងអយ្យការសម្រេចចោទប្រកាន់ ពីបទ ប្រើប្រាស់អាវុធដោយគ្មានការអនុញ្ញាត បញ្ជូនរឿងទៅចៅក្រមស៊ើបសួរចាត់ការបន្ត។ នេះបើយោងតាមលោក ឆាយ ហុង ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញបានឲ្យដឹងនៅថ្ងៃទី២៣ ខែសីហា ឆ្នាំ២០២៤នេះ។

សូមបញ្ជាក់ផងដែរកាលពីរសៀលថ្ងៃទី២២ ខែសីហា ឆ្នាំ២០២៤ម្សិលមិញ លោកវរសេនីយ៍ឯក ឡេង ប៊ុនហួរ នាយការិយាល័យព្រហ្មទណ្ឌកម្រិតស្រាលនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបញ្ជាក់ថា ស្រ្តីម្នាក់មានគណនីfacebook ឈ្មោះ Yubee Ly បានប្រើប្រាស់អាវុធ កាំភ្លើងខ្លី បាញ់បោះសេរី បង្ហោះជាសាធារណៈត្រូវបាននគរបាលបញ្ជូនទៅអយ្យការអមសាលាដំបូងរាជធានីភ្នំពេញ ដើម្បីបន្តចាត់ការតាមនីតិវិធីច្បាប់។

គួរំលឹកផងដែរកាលពីយប់ថ្ងៃទី២០ ខែសីហា ឆ្នាំ២០២៤ ក្រោយមានការបង្ហោះក្នុងបណ្ដេញសង្គម និងបានចែក​រំលែក​តៗគ្នាពាក់ព័ន្ធករណី ស្រ្តីម្នាក់មានគណនីfacebook ឈ្មោះ Yubee Ly បានប្រើប្រាស់អាវុធខ្លី បាញ់បោះសេរី និងភ្ជាប់ខ្លឹមសារ «អូនកាចចឹងធ្វើប្រពន្ធបងបាននៅ» ត្រូវបាននគរបាលព្រហ្មទណ្ឌកម្រិតស្រាលនៃនាយកដ្ឋានព្រហ្មទណ្ឌក្រសួងមហាផ្ទៃ ស្រាវជ្រាវឃាត់ខ្លួនភ្លាមៗតែម្ដង នាយប់ថ្ងៃទី២០ ខែសីហា ឆ្នាំ២០២៤។

សូមបញ្ជាក់ផងដែរ ស្ដ្រីដែលត្រូវបានឃាត់ខ្លួនឈ្មោះ ម៉េង លីហ័រ អាយុ២៤ឆ្នាំ ក្រោយឃាត់ខ្លួនស្រ្តីនោះបានសារភាពថា វីដេអូបាញ់ឡើងលើមួយគ្រាប់នេះតាំងពីឆ្នាំ២០២២មកម្ល៉េះ ប៉ុន្ដែគេទើបយកមកបង្ហោះឡើងវិញ នៅក្នុងគណនីក្លែងក្លាយដែលប្រើប្រាស់ឈ្មោះ Yubee Ly៕

អត្ថបទ៖ សុភា