ព័ត៌មានជាតិ

កសិករសង្កាត់អូរម៉ាល់ ដាំពូជស្រូវតម្រូវទីផ្សារ ១ ហិតា ទទួលបានទិន្នផលចន្លោះពី ៦-៧ តោន

បានផុស

៩ ខែ មុន

នៅ

ថ្ងៃអង្គារ ២៤ កញ្ញា ២០២៤

ដោយ

កសិកររស់នៅសង្កាត់អូរម៉ាល់ ក្រុងបាត់ដំបង បាននាំគ្នាដាំដុះពូជស្រូវ ២ប្រភេទ ដូចជាស្រូវស្រង៉ែ និងស្រូវសែនក្រអូប តម្រូវតាមទីផ្សារ ដោយក្នុង ១ហិតា អាចទទួលបានទិន្នផលចន្លោះពី ៦ ទៅ ៧ តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមកសិកររស់នៅក្នុងសង្កាត់អូរម៉ាល់ បានអះអាងថា ទិន្នផលស្រូវទាំង ២ប្រភេទខាងលើនេះ ក្នុង ១ ហិតា អាចទទួលបានទិន្នផលចន្លោះពី ៦ ទៅ ៧តោន ខណៈមួយឆ្នាំអាចធ្វើ ២ ទៅ ៣ដង។ ប៉ុន្តែឆ្នាំខ្លះ ក៏ទទួលបានត្រឹម ៤ តោន ប៉ុណ្ណោះ គ្រាដែលប្រភពទឹកមិនអាចគ្រប់គ្រងបាន។

លោក សន ពឿន ចៅសង្កាត់អូរម៉ាល់ទទួលស្គាល់ថា ប្រជាកសិកររស់នៅក្នុងសង្កាត់លោកគ្រប់គ្រង ពិតជាមានលទ្ធភាពដាំដុះដំណាំស្រូវបានច្រើនដងក្នុង ១ឆ្នាំ ដែលធ្វើឲ្យកម្រិតសេដ្ឋកិច្ចគ្រួសារភាគច្រើនមិនប្រឈមការខ្វះខាត។

លោកថា នៅក្នុងសង្កាត់អូរម៉ាល់ កសិករបានបង្កបង្កើនផលលើពូជដំណាំស្រូវមាន ៣ ប្រភេទ គឺស្រូវស្រាល ស្រូវកណ្តាល និងស្រូវធ្ងន់ លើផ្ទៃដីសរុបប្រមា ២៨៨៤,៤៣ ហិតា ក្នុងនោះមាន ស្រូវស្រាល ២៨០៩ ហិតា ស្រូវកណ្តាល ២៥ហិតា និង ស្រូវធ្ងន់មាន ៥០ហិតា។

លោកចៅសង្កាត់បានអះអាងថា កសិករបានយល់ដឹងពីតម្រូវការទីផ្សារ ទើបកសិករនាំគ្នាដាំដុះស្រូវតែ ២ ប្រភេទ តម្រូវតាមទីផ្សារ គឺស្រូវស្រង៉ែ និងស្រូវសែនក្រអូប ហើយទិន្នផលក៏កំពុងតែល្អ និងជិតប្រមូលផលផងដែរ ក្នុងរយៈពេលយ៉ាងយូរ ១ខែ ទៀតប៉ុណ្ណោះ ហើយប្រជាពលរដ្ឋក៏មិនបារម្ភបញ្ហាទីផ្សារផងដែរ។

ជាមួយគ្នានេះ បើតាមលោកចៅសង្កាត់អូរម៉ាល់ ការធ្វើផលដំណាំស្រូវច្រើនដងក្នុង ១រដូវកាលរបស់កសិករក្នុងសង្កាត់លោក គឺពឹងផ្នែកលើប្រភពទឹកចំនួន ២ គឺប្រភពទឹកអាងកំពីងពួយ និងប្រភពទឹកពីដងស្ទឹងសង្កែ។

មន្ត្រីកសិកម្មខេត្តបាត់ដំបងបានឲ្យដឹងថា ល្បឿននៃការបង្កបង្កើនផលដំណាំស្រូវស្រង៉ែ និងស្រូវសែនក្រអូបរបស់កសិករនៅក្នុងសង្កាត់អូរម៉ាល បានដើរតួយ៉ាងសំខាន់ជាងបណ្តាឃុំសង្កាត់នានា ក្នុងក្រុងបាត់ដំបង ដែលសង្កាត់នេះមានផ្ទៃដីដាំដុះដំណាំស្រូវប្រមាណជិត ៣ពាន់ហិតា។

ប្រភពដដែលបន្តថា ក្នុងរដូវកាលឆ្នាំនេះ ស្រូវរបស់កសិករក្នុងសង្កាត់អូរម៉ាល់កំពុងលូតលាស់បានយ៉ាងល្អ មិនមានប្រឈមបញ្ហាណាមួយនោះទេ ហើយនៅប្រមាណ ១ ខែទៀតនឹងអាចប្រមូលទិន្នផលចូលទីផ្សារ៕

អត្ថបទ៖ សៅ សារិទ្ធ