ព័ត៌មានជាតិ

កុមារនៅកោះកុង កាន់តែមានឱកាសទទួលបានការសិក្សាតាមបែបអន្តរជាតិ ជាងពេលមុន

បានផុស

២ years មុន

នៅ

ថ្ងៃចន្ទ ២១ តុលា ២០២៤

ដោយ

កុមារនៅខេត្តកោះកុង កាន់តែទទួលបានឱកាសសិក្សាអប់រំបែបលក្ខណៈអន្តរជាតិច្រើនជាងពេលមុនៗ គ្រាសាលារៀនវិស័យឯកជនបាននាំយកនូវកម្មវិធីស្តង់ដារពី Springboard for Education Cambodia។

ចំណេះដឹងរបស់កុមារនៅខេត្តកោះកុងដែលជាខេត្តដាច់ស្រយាលមួយ ឥឡូវមានឱកាសច្រើនទ្វេតាមរយៈទទួលបានការបណ្ដុះបណ្ដាលលក្ខណៈស្តង់ដារអន្តរជាតិសាលារៀនកោះកុងអន្តរជាតិ និង (Springboard for Education Cambodia)។

លោកស្រី ហាយ គន្ឋា នាយិកាសាលារៀនកោះកុងអន្តរជាតិ បានលើកឡើងនៅថ្ងៃទី ២១ ខែតុលា ឆ្នាំ ២០២៤ នេះថា លោកស្រីមានគោលដៅខ្ពស់បំផុត ដោយចង់ពង្រឹងការសិក្សាផ្នែកភាសាអង់គ្លេសជាលក្ខណៈអន្តរជាតិដល់សិស្សានុសិស្សកាន់ទូលំទូលាយលើពីកម្រិតសិក្សានាពេលបច្ចុប្បន្នដែលមានស្រាប់ក្នុងភូមិសាស្ត្រខេត្តកោះកុង។

លោកស្រីនាយិកាសាលារៀនកោះកុងអន្តរជាតិ បន្តថា សាលារៀន និងដៃគូអប់រំសិក្សា Springboard for Education Cambodia នឹងផ្តល់ដល់សិស្សានុសិស្សមានឱកាសចូលរួមប្រឡងតេស្តសមត្ថភាពផ្នែកភាសាអង់គ្លេសកម្រិតអន្តរជាតិ និងទទួលបានវិញ្ញាបនបត្រ ពី Cambridge។ សិស្សអាចបន្តទៅសិក្សាផ្លាស់ប្ដូរ បទពិសោធ នៅក្រៅប្រទេសទៀតផង។

សាលារៀនកោះកុងអន្តរជាតិ បាននិងកំពុងដើរតួនាទីយ៉ាងសំខាន់ផ្តោតលើការបណ្ដុះបណ្ដាលអប់រំដល់សិស្សានុសិស្សសរុប ១.៥៣០ នាក់ ចាប់ពីថ្នាក់មត្តេយ្យសិក្សា ដល់ទី ១២។ ក្នុងនោះមានថ្នាក់ភាសាអង់គ្លេសទូទៅគ្រប់កម្រិត ថ្នាក់ភាសា ចិន ថ្នាក់ភាសា ថៃ និងថ្នាក់កុំព្យូទ័រ។

លោក Dr. Vincent Santiago ជានាយកផ្នែកសិក្សាធិការ (Academic Director) ថ្លែងថា លោកក៏មានក្តី សប្បាយរីករាយដែលបានចុះកិច្ចព្រមព្រៀងគ្នាជាមួយសាលារៀនកោះកុងអន្តរជាតិ ដើម្បីសហប្រតិបត្តិការសំដៅធ្វើយ៉ាងណាជួយពង្រឹងការសិក្សារៀនសូត្រភាសាអង់គ្លេស ជូនដល់សិស្សានុសិស្សនៅកម្ពុជា។

លោកមើលឃើញថា ការចុះ MoU រវាងគ្នានឹងគ្នា នៅពេលនេះ ជាសក្ខីកម្ម នៃភាពជោគជ័យមួយលើវិស័យអប់រំនៅកម្ពុជា។ លោកជឿជាក់ថា ថ្នាក់ដឹកនាំ និងលោកគ្រូអ្នកគ្រូសាលារៀនកោះកុងអន្តរជាតិ បាននាំយកនូវកម្មវិធីសិក្សាពិសេសទៅអប់រំសិក្សាដល់សិស្សានុសិស្សប្រកបដោយគុណភាព និងប្រសិទ្ធភាពខ្ពស់ ឆ្លើយតបនឹងគោលនយោបាយរបស់រាជរដ្ឋាភិបាលលើកិច្ចការងារពង្រឹងគុណភាពអប់រំ និងធនធានមនុស្សនៅកម្ពុជា៕

អត្ថបទ ៖ សិរីវឌ្ឍនៈ