តៃវ៉ាន់ ប្រកាសអាសន្ន មុនព្យុះ កងរី មកដល់

តាមការចុះផ្សាយរបស់ Reuters នៅថ្ងៃពុធទី៣០ខែតុលាឆ្នាំ២០២៤, តៃវាន់ បានទាញសញ្ញាប្រកាសអាសន្ន មុនការមកដល់នៃព្យុះ កងរី ដែលគេព្យាករថា នឹងវាយប្រហារកោះនេះនៅថ្ងៃសុក្រ ក្នុងនាមជាព្យុះកម្រិតទី៤ ជាមួយកម្លាំងខ្យល់ល្បឿន ១៥៥គីឡូម៉ែត្រក្នុងម៉ោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរតៃវ៉ាន់ បានផ្អាកសេវាដឹកជញ្ជូនតាមផ្លូវទឹករួចទៅហើយ និងជូនដំណឹងឲ្យអ្នកនេសាទទាំងអស់ ឡើងគោកវិញជាប្រញាប់ មុនពេលព្យុះទៅដល់តំបន់ឆ្នេរ Taitung នាភាគខាងកើត។

លោក Lin Po-tung មន្ត្រីនៅភ្នាក់ងារអាកាសធាតុតៃវ៉ាន់ បានព្រមានថា «ព្យុះនេះកំពុងវិវត្តខ្លួនកាន់តែសាហាវ។ វានឹងនាំមកជាមួយនូវភ្លៀងធ្លាក់និងខ្យល់បក់ខ្លាំង ហើយរលកសមុទ្រអាចមានកម្ពស់ដល់ទៅ៥ឬ៦ម៉ែត្រឯណោះ។ ទីក្រុងតៃប៉ិ ក៏ត្រូវព្យាករថា នឹងរងគ្រោះធ្ងង់ដោយភ្លៀងធ្លាក់ខ្លាំងផងដែរ»។

មុនពេលមកដល់តៃវ៉ាន់, ព្យុះ​ កងរី បានវាយប្រហារប្រទេសហ្វីលីពីន ដោយ​បង្ក​ឲ្យ​មាន​ខ្យល់ និង​ភ្លៀង​ធ្លាក់​​ខ្លាំង ព្រម​ទាំង​រលក​សមុទ្រ​ធំៗ ចាប់​តាំងពី​ថ្ងៃ​ចន្ទមក។

ភាគ​ឦសាន​ប្រទេស​ហ្វីលីពីន ត្រូវ​រង​ផល​ប៉ះពាល់​ដោយសារ​​ព្យុះនេះ​ ប៉ុន្តែ​​មិន​បង្ក​ជា​គ្រោះថ្នាក់​ខ្លាំង​ដូច​ព្យុះ ត្រាមី ដែល​ធ្វើ​ដំណើរ​​ចំ​កោះ Luzon ដែល​ជា​កោះ​ធំ​ជាង​គេ និង​មាន​មនុស្ស​រស់នៅ​ច្រើន​​ជាង​គេ​នោះ​ឡើយ។

បើនិយាយពីតៃវ៉ាន់វិញ រៀងរាល់ឆ្នាំកោះនេះ តែងជួបព្យុះចាប់ពីខែកក្កដាដល់ខែតុលា ប៉ុន្តែអ្នកវិទ្យាសាស្ត្រ ព្រមានថា បម្រែបម្រួលអាកាសធាតុ កំពុងធ្វើឲ្យព្យុះកាន់តែកាចសាហាវ។

ជាក់ស្តែងកាលពីខែកក្កដា, Gaemi បានក្លាយជាព្យុះទីហ្វុងខ្លាំងបំផុត ដែលវាយប្រហារដីគោកកោះតៃវ៉ាន់ក្នុងរយៈពេល៨ឆ្នាំ ដោសម្លាប់មនុស្សយ៉ាងតិច១០នាក់ និងរាប់រយនាក់ទៀតរងរបួស៕

អត្ថបទ៖ សុខ​ សុវណ្ណ

ចុចអាន៖ ផុត​ពី​ព្យុះត្រាមី ឥលូវ​ហ្វីលីពីន​ត្រៀម​ខ្លួន​រង​ការ​វាយ​ប្រហារ​ពី​ព្យុះ កងរី វិញ​ម្ដង