ព័ត៌មានអន្ដរជាតិ

លោក ស៊ី ប្រកាសពីវិធានការសេដ្ឋកិច្ច ដើម្បីជំរុញប្រទេសកំពុងអភិវឌ្ឍ នៅកិច្ចប្រជុំកំពូល G20

បានផុស

២ years មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

ទូរទស្សន៍រដ្ឋចិន CCTV បានរាយការណ៍កាលពីថ្ងៃចន្ទថា ប្រធានាធិបតីចិន លោក ស៊ី ជិនពីង បានប្រកាសអំពីគោលនយោបាយផ្ដល់ប្រយោជន៍សេដ្ឋកិច្ចមួយចំនួន ដែលរៀបចំឡើងដើម្បីគាំទ្រប្រទេសលោកខាងត្បូង ដែលសំដៅលើប្រទេសកំពុងអភិវឌ្ឍ ក្នុងអំឡុងកិច្ចប្រជុំកំពូលនៃក្រុមប្រទេសទាំង២០ (G20) នៅទីក្រុង រីយ៉ូ ដេ ជេណេរ៉ូ ប្រទេសប្រេស៊ីល។

តាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័រ លោក ស៊ី បាននិយាយថា ប្រទេសចិននឹងគាំទ្រដល់ការអភិវឌ្ឍសកលជាមួយនឹងសកម្មភាពចំនួន៨ រួមទាំងការកសាងគំនិតផ្តួចផ្តើមខ្សែក្រវាត់ និងផ្លូវ «គុណភាពខ្ពស់» ដែលជាគម្រោងតភ្ជាប់ហេដ្ឋារចនាសម្ព័ន្ធទូទាំងពិភពលោក។

លោកក៏បានប្រកាសផងដែរថា ចិន រួមជាមួយប្រេស៊ីល អាហ្រ្វិកខាងត្បូង និងសហភាពអាហ្រ្វិក កំពុងចាប់ផ្តើម «គំនិតផ្តួចផ្តើមកិច្ចសហប្រតិបត្តិការអន្តរជាតិផ្នែកវិទ្យាសាស្ត្របើកចំហ» ដែលបង្កើតឡើងដើម្បីជំរុញនវានុវត្តន៍វិទ្យាសាស្ត្រ និងបច្ចេកវិទ្យា ទៅកាន់ប្រទេសកំពុងអភិវឌ្ឍ។

យោងតាមទីភ្នាក់ងារសារព័ត៌មានរដ្ឋស៊ីនហួ លោក ស៊ី ថ្លែងយ៉ាងដូច្នេះថា៖ «ចិនគាំទ្រ G20 ក្នុងការអនុវត្តកិច្ចសហប្រតិបត្តិការជាក់ស្តែងសម្រាប់ជាប្រយោជន៍ដល់ប្រទេសលោកខាងត្បូង» ដោយបន្ថែមថា ការនាំចូលរបស់ចិនពីប្លុកប្រទេសទាំងនេះ រំពឹងថានឹងកើនឡើងដល់ទៅ ៨ ទ្រីលានដុល្លារ ត្រឹមឆ្នាំ ២០៣០។

លោកបន្តថា៖ «ចិនតែងតែជាសមាជិកនៃប្រទេសលោកខាងត្បូង ដែលជាដៃគូអាចទុកចិត្តបាន និងយូរអង្វែង និងជាសកម្មជន និងអ្នកអនុវត្តក្នុងការគាំទ្រដល់ការអភិវឌ្ឍន៍ពិភពលោក»។

ខណៈកំណើនឥទ្ធិពលរបស់លោកខាងត្បូងក្នុងប្លុក G20 បានបង្កឱ្យមានភាពមិនស្រួលមួយចំនួនក្នុងចំណោមប្រទេសអភិវឌ្ឍនោះ វាបង្ហាញពីឱកាសសម្រាប់ប្រទេសចិន ដែលផ្តល់ទំនាក់ទំនងសេដ្ឋកិច្ច និងនយោបាយជិតស្និទ្ធរបស់ខ្លួនជាមួយប្រទេសកំពុងអភិវឌ្ឍភាគច្រើន ជាពិសេសនៅទ្វីបអាហ្រ្វិក ដែលមានចិនជាអ្នកផ្តល់ប្រាក់កម្ចីធំ៕