ព័ត៌មានអន្ដរជាតិ

ក្រសួងឧស្សាហកម្មឥណ្ឌូណេស៊ី ជំរុញការនាំចេញគ្រៀងស្រវឹង

បានផុស

១ year មុន

នៅ

ថ្ងៃចន្ទ ៩ ធ្នូ ២០២៤

ដោយ

ក្រសួងឧស្សាហកម្មរបស់ប្រទេសឥណ្ឌូណេស៊ី កំពុងជំរុញការនាំចេញនូវភេសជ្ជៈមានជាតិអាល់កុល ឬគ្រឿងស្រវឹង ដែលផលិតក្នុងស្រុក ដោយមើលឃើញពីកំណើនផលិតកម្ម និងសក្តានុពលទីផ្សារ។ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋ Antara កាលពីចុងសប្ដាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានផ្នែកកសិឧស្សាហកម្មរបស់ក្រសួង លោក Putu Juli Ardika បានថ្លែងថា៖ «យើងកំពុងលើកទឹកចិត្តដល់ការនាំចេញ ការផ្សព្វផ្សាយ និងម៉ាកយីហោ (នៃភេសជ្ជៈមានជាតិអាល់កុលក្នុងស្រុក)»។

ផ្អែកលើទិន្នន័យរបស់ក្រសួង បរិមាណផលិតកម្មនៃឧស្សាហកម្មគ្រឿងស្រវឹងក្នុងស្រុក ដែលរួមបញ្ចូលទាំងស្រាបៀរ ស្រាទំពាំងបាយជូរ និងស្រាវីស្គី បានឈានដល់ ៣២៤,១ លានលីត្រ ក្នុងឆ្នាំ ២០២៣ ដោយកើនឡើងពី ៣២០,៨ លានលីត្រនៅឆ្នាំ ២០២២។

លោក Ardika បានកត់សម្គាល់ថា តម្លៃនាំចេញសរុបនៃភេសជ្ជៈមានជាតិអាល់កុល បានឈានដល់ ១៤,១ លានដុល្លារ ក្នុងឆ្នាំ ២០២៣ ដោយកើនឡើងប្រហែល ៤៦ ភាគរយ ពី ៩,៦ លានដុល្លារ ក្នុងឆ្នាំ ២០២២។ លោកបានគូសបញ្ជាក់ថា ប្រទេសដែលនាំចូលផលិតផលគ្រឿងស្រវឹងរបស់ឥណ្ឌូណេស៊ី រួមមាន ម៉ាឡេស៊ី ថៃ សិង្ហបុរី រុស្ស៊ី ចិន អូស្ត្រាលី ទីម័រឡេស្តេ ហូឡង់ កេនយ៉ា និងជប៉ុន។

ការបញ្ចប់ការរឹតបន្តឹងជំងឺកូវីដ១៩ បានជំរុញឱ្យមានតម្រូវការគ្រឿងស្រវឹងឥណ្ឌូណេស៊ីនៅបរទេស ដែលនេះបង្ហាញថា គុណភាពស្រារបស់ឥណ្ឌូណេស៊ីល្អ ដែលធ្វើឱ្យទីផ្សារសកលចូលចិត្ត៕