អ្នកនាំពាក្យស្រាយមន្ទិលរឿងប្រើភ្លើងរថយន្ត នៅពេលបើកបរ

ដើម្បីស្រាយចម្ងល់ និងមន្ទិលសង្ស័យមួយចំនួនរបស់សាធារណជន ជុំវិញការប្រើប្រាស់ភ្លើងរថយន្ត អ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ បានពន្យល់តាមរយៈវីដេអូប្រមាណជាង១០នាទី កាលពីថ្ងៃទី១០ ខែធ្នូ ឆ្នាំ២០២៤ ដោយបានលើកយកនូវការប្រើភ្លើងរថយន្តចំនួនពីរមកពន្យល់ ទី១ ប្រើប្រាស់ភ្លើងហ្វា ទី២ គឺប្រើប្រាស់ភ្លើងកូដ។

លោកបណ្ឌិត ទូច សុឃៈ បានលើកឡើងថា យោងចេញពីច្បាប់ស្តីពីចរាចរណ៍ផ្លូវគោក គឺការប្រើប្រាស់ភ្លើងរថយន្ត មានច្រើនប្រភេទ និងមានតួនាទីផ្សេងៗគ្នា។ អ្នកនាំពាក្យរងក្រសួងមហាផ្ទៃ បានលើកយកនូវការប្រើភ្លើងរថយន្តចំនួនពីរមកពន្យល់ ទី១ គឺប្រើប្រាស់ភ្លើងហ្វា ទី២ គឺប្រើប្រាស់ភ្លើងកូដ។

ការប្រើប្រាស់ភ្លើងហ្វា នៅក្នុងមាត្រា២៧ នៃច្បាប់ចរាចរណ៍ផ្លូវគោក បានបញ្ជាក់ថា ការប្រើភ្លើងហ្វានៅពេលយប់នៅលើទ្រូងផ្លូវដែលគ្មានភ្លើង ឬអគ្គីសនីបំភ្លឺ ជាទូទៅត្រូវប្រើភ្លើងហ្វាដើម្បីមើលទៅខាងមុខឱ្យបានឆ្ងាយ តែត្រូវប្រុងប្រយ័ត្នកុំឱ្យរំខានដល់ចរាចរណ៍ដែលមកពីទិសផ្ទុយ ហើយហាមបើកភ្លើងហ្វានៅក្នុងទីក្រុង ឬទីប្រជុំជនដែលមានភ្លើងអគ្គសនីបំភ្លឺគ្រប់គ្រាន់ លើកលែងតែករណីធ្វើសញ្ញាសុំផ្លូវ ឬវ៉ាជែង ឬសុំបើកផ្លូវដោយប្រើភ្លើងឆ្លាស់គ្នាជាមួយភ្លើងកូដ។ មានន័យថាធ្វើជាសញ្ញាប្រាប់ដល់ទិសចរាចរណ៍ម្ខាងទៀតឱ្យមានការប្រុងប្រយ័ត្ន នោះមិនមានកំហុសឆ្គងឡើយ។

ចំពោះការប្រើភ្លើងកូដវិញ អ្នកនាំពាក្យរង បានឱ្យដឹងថា ការប្រើភ្លើងកូដ គឺប្រើនៅពេលយប់ មិនថានៅក្នុងទីប្រជុំជន ឬក្រៅទីប្រជុំជននោះទេ ទោះបីជាមានភ្លើងអគ្គិសនីបំភ្លឺនៅតាមដងផ្លូវក៏ដោយ គឺភ្លើងកូដត្រូវប្រើជាធម្មតា និងនៅពេលយប់ទាំងក្នុង និងក្រៅទីប្រជុំជន ដែលគ្មានភ្លើងអគ្គិសនីបំភ្លឺតាមដងផ្លូវ ក៏ត្រូវប្រើប្រាស់ភ្លើងកូដធម្មតាដែរ។

ចំណែកការប្រើប្រាស់ភ្លើងកូដនៅពេលថ្ងៃ គឺអាចប្រើប្រាស់បាន ប៉ុន្តែត្រូវអនុវត្តទៅតាមលក្ខខណ្ឌមួយចំនួនដូចជា ក្នុងករណីពេលដែលអ្នកបើកបរមើលមិនសូវឃើញច្បាស់គ្រប់គ្រាន់ ពេលមេឃកំពុងភ្លៀង ពេលចុះអព្ទ ឬឆ្លងកាត់ផ្លូវរូងដែលមិនមានពន្លឺ។ ក្នុងនោះភ្លើងកូដអាចប្រើប្រាស់ ឆ្លាស់គ្នាជាមួយនឹងភ្លើងហ្វាបាន ដោយធ្វើឱ្យមានពន្លឺភ្លឹបភ្លែតៗ ជាសញ្ញាជំនួសស៊ីផ្លេនៅពេលយប់។

ដោយឡែកចំពោះការប្រើប្រាស់ភ្លើងទីតាំង អ្នកនាំបាក្យ ក៏បានបញ្ជាក់ដែរថា ការប្រើប្រាស់ភ្លើងនេះគឺដើម្បីប្រាប់ពីវត្តមានយានយន្ត ឬទំហំយានយន្ត ដល់អ្នកប្រើប្រាស់ផ្លូវ ដែលមើលមកពីមុខ ដើម្បីជាសញ្ញាសម្គាល់មួយបង្ហាញថាជារថយន្តតូចធំ ជាម៉ូតូ ឬរឺម៉ក ឬមធ្យោបាយផ្សេងៗ ងាយស្រួលដល់អ្នកបើកបរធ្វើការសន្និដ្ឋាន។

ផ្សារភ្ជាប់ទៅនឹងការប្រើប្រាស់ភ្លើងនៅពេលថ្ងៃ អ្នកនាំពាក្យរងបានសង្កត់ធ្ងន់ថា បើតាមច្បាប់ដែលបានចែង យានយន្តដែលអាចប្រើប្រាស់ភ្លើងពេលថ្ងៃបាន គឺចំពោះរថយន្តដែលបំពាក់ភ្លើងតាំងពីដើមទីមក មានន័យថាជារថយន្តចេញពីឃ្លាំង ឬចេញពីរោងចក្រ ដែលមានភ្លើងនោះស្រាប់ ភ្លឺដោយស្វ័យប្រវត្តិ ឬភ្លើងអូតូម៉ាតិចនៅពេលបញ្ឆេះ គឺមិនខុសច្បាប់នោះទេ ហើយក៏គ្មានការផាកពិន័យនោះដែរ៕