ព័ត៌មានអន្ដរជាតិ

សភាកូរ៉េខាងត្បូងកំពុងដំណើរការបោះឆ្នោតទម្លាក់ប្រធានាធិបតី Yoon Suk Yeol

បានផុស

១ year មុន

នៅ

ថ្ងៃសៅរ៍ ១៤ ធ្នូ ២០២៤

ដោយ

Rann Reuy

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីកូរ៉េខាងត្បូង លោក Yoon Suk Yeol ទំនងអស់វាសនាដឹកនាំកូរ៉េខាងត្បូងចាប់ពីថ្ងៃសៅរ៍ចុងសប្តាហ៍នេះ បើសិនសភាកូរ៉េខាងត្បូងបោះឆ្នោតគាំទ្រសេចក្តីស្នើច្បាប់ព្យួរតំណែងលោក Yoon Suk Yeol ពីអំណាច ដោយសារតែការប្រកាសដាក់ច្បាប់អាជ្ញាសឹកកាលកពីសប្តាហ៍មុន។
សភាកូរ៉េខាងត្បូងដែលគ្រប់គ្រងដោយសម្ព័ន្ធគណបក្សប្រជាធិបតេយ្យ មានសំឡេងរហូតដល់ទៅ១៩២ក្នុងចំណោមសមាជិកសភាសរុប៣០០ ហើយសម្ព័ន្ធគណបក្សប្រជាធិបតេយ្យត្រូវការតែ៨សំឡេងទៀតប៉ុណ្ណោះពីគណបក្សអំណាចប្រជាជនដែលគ្រប់គ្រងអំណាច។
ប្រធានាធិបតី Yoon Suk Yeol ប្រឈមការបោះឆ្នោតទម្លាក់ប្រកបដោយជោគជ័យនៅក្នុងការបោះឆ្នោតលើកទី២នេះ ក្រោយ លោក Han Dong-hoon ប្រធានគណបក្សអំណាចប្រជាជនប្រកាសគាំទ្រការបោះឆ្នោតសភាដកហូតដំណែងលោក Yoon ដោយសារតែគ្មានឃើញការរីកចម្រើននៃបំណងលាលែងពីសំណាក់លោក Yoon ក្នុងរយៈពេល១សប្តាហ៍។
ក្រោយបាត់មុខជាសាធារណៈជិត១សប្តាហ៍ ប្រធានាធិបតីកូរ៉េខាងត្បូង លោក Yoon Suk Yeol បានបង្ហាញមុខជាសាធារណៈប្រកាសតស៊ូរហូតដល់ទីបញ្ចប់ដោយមិនចុះចេញពីអំណាច។
លោក Yoon Suk Yeol បាននិយាយកាលថ្ងៃព្រហស្បតិ៍ថា៖«មិនថាគេចោទប្រកាន់ខ្ញុំ ឬស៊ើបអង្កេតខ្ញុំទេ ខ្ញុំនឹងប្រឈមមុខទាំងអស់»។
ក្នងការនិយាយកាលថ្ងៃ ព្រហស្បតិ៍ ប្រធានាធិបតីកូរ៉េខាងត្បូងបានចោទបក្សប្រឆាំងថាបានរុញប្រទេសចូលទៅក្នុង «វិបត្តិជាតិ» ដោយនិយាយថា៖«រដ្ឋសភាដែលគ្រប់គ្រងដោយគណបក្សប្រឆាំងដ៏ធំ បានក្លាយជាបិសាចដែលបំផ្លាញសណ្តាប់ធ្នាប់រដ្ឋធម្មនុញ្ញនៃលទ្ធិប្រជាធិបតេយ្យសេរី»។
លោក Han Dong-hoon ប្រធានគណបក្សអំណាចប្រជាជនដែលដកសេចក្តីទុកចិត្តពី លោក Yoon Suk Yeol បានប្រកាសថា៖«យើងព្យាយាមរកមធ្យោបាយប្រសើរជាងបោះឆ្នោតបណ្តេញចេញ (Impeachment) ប៉ុន្តែមធ្យោបាយផ្សេងៗនោះហួសពេលហើយ»។
លោក Han Dong-hoon ប្រធានគណបក្សអំណាចប្រជាជន បាននិយាយថា៖«ការព្យួរដំណែងប្រធានាធិបតីតាមរយៈការបោះឆ្នោតបណ្តេញចេញជាមធ្យោបាយតែមួយគត់សម្រាប់ពេលនេះ ដើម្បីការពារប្រជាធិបតេយ្យ និងសាធារណៈរដ្ឋកូរ៉េ»។

ដោយ រ៉ាន់ រើយ