នារីដែលចោទ វណ្ណថាន ចម្លងរោគ ចេញមុខសុំទោស ខណៈរឿងផ្ទាល់ខ្លួនផ្សេងទៀត ដោះស្រាយមុខច្បាប់

ក្រោយតារាចម្រៀងរ៉េបល្បីឈ្មោះ វណ្ណថាន ប្រកាសថា ទុកឱ្យច្បាប់ជាអ្នកដោះស្រាយជុំវិញករណីដែលនារីម្នាក់ឈ្មោះ កុល ធីតា បានលាតត្រដាងពីជំងឺរបស់ខ្លួន ដោយចោទលោក លី វណ្ណថាន ថាបានចម្លងជំងឺកាចសាហាវដល់ខ្លួនមិនបានប៉ុន្មានផង មុននេះ នារីរូបនោះ បានបង្ហាញលទ្ធផលនៃបញ្ហាសុខភាពរបស់ខ្លួន ទន្ទឹមនឹងសារសុំទោសផងដែរ។

កញ្ញា កុល ធីតា បានរៀបរាប់ថា “ការផុសមួយនេះ ជាដំបូង ខ្ញុំចង់សុំទោសដល់លោក លី វ៉ាន់ថាន់ជាសាធារណះដែលខ្ញុំបានចោទថាឆ្លងជំងឺ HPV ពីគាត់ហេីយក៏សុំទោសដល់មហាជនដែលធ្វេីឲ្យយល់ច្រឡំថាលោក លីវ៉ាន់ថាន់មានរោគអ្វីផ្សេងៗ។ ហេីយខ្ញុំចង់បញ្ចាក់ពីជំងឺខ្ញុំថាពេលនេះខ្ញុំពិតជាឈឺមែនមិនបានបោកប្រាស់មហាជនឡេីយ! នៅមានរឿងផ្ទាល់ខ្លួនផ្សេងទៀតខ្ញុំសូមដោះស្រាយមុខច្បាប់ អរគុណ”។

គួររំលឹកថា កាលពីជាង ១សប្តាហ៍មុន តាមរយៈគណនី Thida Kol បានទម្លាយសារឆ្លងឆ្លើយ និងលើកឡើងពីបញ្ហាសុខភាពផ្លូវភេទរបស់ខ្លួន ដែលឈានដល់ដំណាក់កាលវះកាត់ ដោយបានចោទលើតារាចម្រៀងរ៉េបល្បីឈ្មោះ វណ្ណថាន ។

ក្រោយផ្ទុះឡើងនៃរឿងនេះ មហាជនក៏ដូចជាអ្នកសិល្បៈជាច្រើន មានការភ្ញាក់ផ្អើល និងស្នើដល់សាមុីខ្លួនទាំងសងខាង ថា “បើជាការពិត ម្នាក់គួរប្តឹង ឯម្នាក់ទៀតត្រូវបកស្រាយនិងបញ្ឈប់ការចម្លងទៅកាន់អ្នកមិនដឹងអី” ខណៈតារាចម្រៀងរូបនេះ បានរក្សាភាពស្ងប់ស្ងាត់មួយរយៈទៅហើយ។

យ៉ាងណាមិញ បន្ទាប់ពីរក្សាភាពស្ងៀមស្ងាត់មួយរយ: ទីបំផុតនៅថ្ងៃនេះ តារាចម្រៀងរ៉េបលោក វណ្ណថាន ក៏បានចេញមុខបកស្រាយ និងបំភ្លឺជុំវិញរឿងរ៉ាវនេះ ដោយបញ្ជាក់ថា លោកសម្រេចទុកឱ្យច្បាប់ដោះស្រាយបញ្ជាក់ពីភាពស្អាតស្អំ ស្រោចស្រង់កេរ្តិ៍ឈ្មោះ និងកិត្តិយសរបស់លោកមកវិញ។ ទន្ទឹមនេះ លោកអះអាងដែរថា លោកនឹងប្រគល់ជូនលទ្ធផលតេស្តសុខភាពស្អាតស្អំរបស់លោកទៅកាន់តុលាការ៕