អាមេរិក​ ដាក់​ទណ្ឌកម្ម​បន្ថែម​​លើ​ក្រុម ហ៊ូធី

សហរដ្ឋអាមេរិក​បាន​ដាក់​ទណ្ឌកម្ម​ថ្មី​លើ​ក្រុមឧទ្ទាម ហ៊ូធី ខណៈកងសកម្មប្រយុទ្ធយេម៉ែនមួយ​នេះ នៅតែ​បង្កើនការ​វាយ​ប្រហារ​ជាមួយ​អ៊ីស្រាអែល ទាំងដែល​សង្រ្គាម​នៅ​តំបន់ហ្គាហ្សាកំពុងបន្ត។ នេះបើយោងតាមការចេញផ្សាយរបស់សារព័ត៌មាន​Al Jazeera នៅថ្ងៃសុក្រទី២០ខែធ្នូឆ្នាំ២០២៤។

ក្រសួងរតនាគារសហរដ្ឋអាមេរិកបានប្រកាសដាក់ទណ្ឌកម្មលើលោក Hashem al-Madani ទេសាភិបាលធនាគារកណ្តាលនៅទីក្រុង Sanaa ដែលគ្រប់គ្រងដោយក្រុមហ៊ូធី រួមទាំងមន្ត្រីរបស់ក្រុមនេះ និងក្រុមហ៊ុនពាក់ព័ន្ធមួយចំនួន ដោយចោទពួកគេថា បានជួយហ៊ូធីឱ្យទទួលបានអាវុធយកទៅប្រើប្រាស់។ យោងតាមក្រសួង, លោក al-Madani នេះហើយ ជាអ្នកមើលការខុសត្រូវធំជាងគេលើមូលនិធិដែលកងកម្លាំង Quds របស់អ៊ីរ៉ង់ ផ្ញើទៅឱ្យក្រុមហ៊ូធី។

ប្រទេសយេម៉ែនមានធនាគារកណ្តាលប្រកួតប្រជែងចំនួនពីរ មួយនៅក្នុងរដ្ឋធានី Sanaa គ្រប់គ្រងដោយក្រុមហ៊ូធី និងបម្រើការឲ្យតំបន់ដែលគ្រប់គ្រងដោយក្រុមឧទ្ទាមនេះ និងមួយទៀតនៅ Aden សម្រាប់តំបន់ដែលគ្រប់គ្រងដោយរដ្ឋាភិបាលទទួលស្គាល់ជាអន្តរជាតិ និងភាគីប្រឆាំងក្រុមហ៊ូធីផ្សេងទៀត។

មន្ត្រីរតនាគារលោក Bradley Smith បានឲ្យដឹងថា ការដាក់ទណ្ឌកម្មនេះមានគោលបំណងរំខានដល់កិច្ចខិតខំប្រឹងប្រែងរបស់ក្រុមហ៊ូធី ដើម្បីទទួលបានប្រាក់ចំណូលបន្ថែម។ លោកថា «សហរដ្ឋអាមេរិកនឹងបន្តលាតត្រដាងនូវគ្រោងការណ៍ទាំងនេះ និងស្វែងរកអ្នកទទួលខុសត្រូវចំពោះសកម្មភាពអស្ថិរភាពរបស់ក្រុមហ៊ូធី»។ វិធានការនេះក៏ដើម្បីបង្ហាញថា ទីក្រុងវ៉ាស៊ីនតោននៅតែបន្តដាក់សម្ពាធសេដ្ឋកិច្ចលើក្រុមនេះរឹតតែខ្លាំង ហើយយោធាអាមេរិក និងអ៊ីស្រាអែលថែមទាំងកំណត់គោលដៅលើតំបន់ដែលក្រុមនេះគ្រប់គ្រងក្នុងប្រទេសយេម៉ែនទៀតផង។

មិនត្រឹមប៉ុណ្ណឹង ការដាក់ទណ្ឌកម្មនេះនឹងរារាំងក្រុមហ៊ុន និងបុគ្គលនៅក្នុងសហរដ្ឋអាមេរិក លែងឱ្យធ្វើប្រតិបត្តិការហិរញ្ញវត្ថុជាមួយក្រុមហ៊ូធី។

សូមបញ្ជាក់ថា ការដាក់ទណ្ឌកម្មរបស់អាមេរិក កើតឡើងប៉ុន្មានម៉ោងបន្ទាប់ពីអ៊ីស្រាអែលទម្លាក់គ្រាប់បែកលើគោលដៅនានាក្នុងប្រទេសយេម៉ែន រួមទាំងរោងចក្រថាមពលនៅជិតទីក្រុងSanaa ផងដែរដោយបានសម្លាប់មនុស្សចំនួន៩នាក់។

ការ​ទម្លាក់​គ្រាប់​បែក​របស់​អ៊ីស្រាអែល​នេះទៀតសោត គឺ​ធ្វើ​ឡើង​បន្ទាប់​ពីក្រុមហ៊ូធីបាញ់មីស៊ីល លើទី​ក្រុង Tel Avivរបស់ខ្លួន។ ក្រុមនេះនិងកំពុងតម្រង់គោលដៅលើអ៊ីស្រាអែលជាមួយនឹងយន្តហោះគ្មានមនុស្សបើក និងមីស៊ីល ដើម្បីដាក់សម្ពាធឱ្យអ៊ីស្រាអែលបញ្ចប់សង្រ្គាមនៅតំបន់ហ្គាហ្សា ខណៈនៅទីនោះ យោធាអ៊ីស្រាអែលសម្លាប់មនុស្សជាង ៤៥០០០ នាក់ហើយ៕

អត្ថបទ៖ ប៊ុន សុភាព