ព័ត៌មានអន្ដរជាតិ

ការនាំចេញសម្លៀកបំពាក់-វាយនភណ្ឌរបស់វៀតណាម រំពឹងកើនខ្ពស់ ដល់ ៤៤ ប៊ីលានដុល្លារ

បានផុស

១ year មុន

នៅ

ថ្ងៃអង្គារ ២៤ ធ្នូ ២០២៤

ដោយ

សមាគមវាយនភណ្ឌ និងកាត់ដេរវៀតណាម (VITAS) បានឱ្យដឹងថា តម្លៃនាំចេញសម្លៀកបំពាក់-វាយនភណ្ឌរបស់វៀតណាម រំពឹងថាឈានដល់ ៤៤ ប៊ីលានដុល្លារ ក្នុងឆ្នាំ ២០២៤ កើនឡើង ១១ ភាគរយ ធៀបនឹងឆ្នាំមុន។ នេះបើតាមការចុះផ្សាយរបស់សារព័ត៌មាន VietnamPlus កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនឹងនេះ ការនាំចូលសម្លៀកបំពាក់-វាយនភណ្ឌ ត្រូវបានប៉ាន់ប្រមាណថាមានចំនួន ២៥ ប៊ីលានដុល្លារអាមេរិក ដោយកើនឡើង ១៥ ភាគរយ និងបង្កើតបានជាអតិរេកពាណិជ្ជកម្មលើវិស័យនេះ ចំនួន ១៩ ប៊ីលានដុល្លារ ដោយកើនឡើង ៧ ភាគរយ បើធៀបនឹងឆ្នាំមុន។

អ្នកជំនាញបានលើកឡើងថា ក្រុមហ៊ុនជាច្រើនក្នុងវិស័យកាត់ដេរ និងវាយនភណ្ឌ បានកត់ត្រាពីកំណើននៃការបញ្ជាទិញសម្រាប់ទាំងឆ្នាំ ២០២៤ និង ២០២៥។ លើសពីនេះ ទោះបីជាសេដ្ឋកិច្ចសកលស្ថិតក្នុងភាពស្រពិចស្រពិល ថ្លៃដឹកជញ្ជូនប្រែប្រួល ការស្ទុះងើបឡើងវិញនៃពាណិជ្ជកម្មមានភាពយឺតយ៉ាង ហើយការវិនិយោគសកលត្រូវបានកត់បន្ថយក៏ដោយ ក៏ឧស្សាហកម្មកាត់ដេរ-វាយនភណ្ឌរបស់វៀតណាម នៅតែរក្សាបាននូវកំណើនដ៏រឹងមាំរបស់ខ្លួន។

សម្រាប់ឆ្នាំ ២០២៥ វៀតណាមរំពឹងថា ការនាំចេញលើវិស័យដដែល នឹងកើនដល់ ៤៨ ប៊ីលានដុល្លារ។

យ៉ាងណាមិញ អ្នកជំនាញបានចង្អុលបង្ហាញថា ការនាំចេញទៅកាន់សហភាពអឺរ៉ុបនៅតែមានកម្រិតតិចតួច។ ជាមួយគ្នានោះ បញ្ហាប្រឈមដ៏សំខាន់សម្រាប់ឧស្សាហកម្មគឺបញ្ហាប្រភពវត្ថុធាតុដើម ដែលភាគច្រើនត្រូវបាននាំចូលពីប្រទេសចិន និងប្រទេសក្រៅកិច្ចព្រមព្រៀងពាណិជ្ជកម្មសេរីជាច្រើនផ្សេងទៀត៕