ព័ត៌មានជាតិ

បុរសម្នាក់បាត់មួយយប់ ក្រុមគ្រួសារប្រទះឃើញសពដាំក្បាលក្នុងអាងទឹកក្នុងផ្ទះ

បានផុស

៥ years មុន

នៅ

ថ្ងៃអង្គារ ១៦ មីនា ២០២១

ដោយ

បន្ទាយមានជ័យ ៖ បុរសម្នាក់បាត់មួយយប់ក្រុមគ្រួសារប្រទះឃើញសពដាំក្បាលក្នុងអាងទឹកក្នុងផ្ទះនៅវេលាម៉ោង៣និង៣០នាទីរសៀល ថ្ងៃទី១៥ ខែមីនា ឆ្នាំ២០២១ នៅភូមិគោកព្រេច ឃុំគោករមៀត ស្រុកថ្មពួក ខេត្តបន្ទាយមានជ័យ។

នគរបាលប៉ុស្តិ៍រដ្ឋបាលឃុំគោករមៀត បានឲ្យដឹងថា ជនរងគ្រោះ ឈ្មោះ ដាន សុត ភេទប្រុស អាយុ៥០ឆ្នាំ រស់នៅភូមិគោកព្រេច ឃុំគោករមៀត ស្រុកថ្មពួក ខេត្តបន្ទាយមានជ័យ ជាបុរសពោះម៉ាយ នៅផ្ទះម្នាក់ឯងនិងមានកូនស្រីម្នាក់ ទៅធ្វើការនៅប្រទេសថៃ។ នគរបាលប៉ុស្តិ៍រដ្ឋបាលឃុំគោករមៀតបានបញ្ជាក់ឲ្យដឹងទៀតថា តាមការបំភ្លឺពីអ្នកជិតខាងបានប្រាប់សមត្ថកិច្ចថា នៅថ្ងៃទី១៤ខែមីនាឆ្នាំ២០២១ ឈ្មោះ ដាន សុត មិនឃើញចេញពីផ្ទះដូចសព្វដងទេ ព្រោះជនរងគ្រោះជាមនុស្សញៀនស្រាផឹកជាប្រចាំមិនសូវគិតគូរពីរឿងបាយទឹកទេ។

ដោយមានការសង្ស័យ ក្រុមគ្រួសារនិងអ្នកជិតខាងបើកទ្វារចូលមើលក្នុងផ្ទះស្រាប់តែឃើញជនរងគ្រោះស្លាប់សំយ៉ុងក្បាលចូលក្នុងអាងទឹក ដោយជើងផុតពីដីហើយបានរាយការទៅប៉ុស្តិ៍ឲ្យចុះមកពិនិត្យសពក្រោយពីទទួលបានព័ត៌មាន កម្លាំងជំនាញបច្ចេកទេសវិទ្យាសាស្ត្រ នគរបាលប៉ុស្តិ៍បានសហការជាមួយគ្រូពេទ្យមេភូមិ ធ្វើការពិនិត្យសពពុំឃើញមានស្លាកស្នាមអ្វីដែលពាក់ព័ន្ធនិងបទល្មើសទេ តាមសន្និដ្ឋានរបស់គ្រូពេទ្យ បានអះអាងថា ជនរងគ្រោះសង្ស័យពេលចូលបន្ទប់ទឹកក្នុងស្ថានភាពស្រវឹងស្រា ហើយបានកើតខ្យល់គ ដួលសំយ៉ុងក្បាលទៅក្នុងអាងទឹក ទើបបណ្តាលឲ្យលង់ទឹកក្នុងអាងស្លាប់តែម្តង។ សពត្រូវបានប្រគល់ជូនសាច់ញាតិរៀបចំធ្វើបុណ្យតាមប្រពៃណី បន្ទាប់ពីធ្វើកោសល្យវិច័យរួច៕

ដោយ ៖ វ៉ាន់ ណាង

Related Topics: