ប៉ូលិសខេត្តចាន់ថាបុរី ចាប់ខ្លួនជនសង្ស័យដែលភ្នាល់ Influencer ថៃ ឲ្យផឹកស្រាដល់ស្លាប់

ប៉ូលិសខេត្តចាន់ថាបុរីកាលពីថ្ងៃសោរ៍បានចាប់ខ្លួនជនសង្ស័យមួយរួបមានឈ្មោះ Aekkachart Meephrom បន្ទាប់ពីតុលាការខេត្តបានចេញដីកាចាប់ខ្លួនរូបគាត់ និងចោទប្រកាន់ពីបទធ្វេសប្រហែស ទើបបណ្ដាលឲ្យស្លាប់ Influencer ថៃដ៏ល្បីល្បាញម្នាក់ឈ្មោះ Thanakarn Kanthee។

លោកឧត្តមសេនីយ៍ឯក Niphon Boonkerd ស្នងការនគរបាលខេត្តចាន់ថាបុរីបានដឹកនាំកម្លាំងប្រមាណ៣០ នាក់ ឆ្មក់ចូលផ្ទះរបស់ជនសង្ស័យ Aekkachart ស្ថិតក្នុងឃុំ Huai Sathorn នៃស្រុក Tha Mai ដើម្បីស្វែងរកព័ស្តុតាងដែលសង្ស័យជាប់ពាក់ព័ន្ធនឹងល្បែងស៊ីសងតាមអនឡាញ។

ជាលទ្ធផល ប៉ូលិសបានរកឃើញកាំភ្លើងខ្លីមួយដើម និងសៀវភៅធនាគារមួយចំនួន ហើយក្រោយមកជនសង្ស័យឈ្មោះ Aekkachart ត្រូវបាននាំទៅកាន់ស្នងការដ្ឋាននគរបាលខេត្តដើម្បីសាកសួរ ។

យោងតាមការចុះផ្សាយដោយសារព័ត៌មាន Thai PBS បានឲ្យដឹងថា ជនសង្ស័យឈ្មោះ Aekkachart បានភ្នាល់ជាមួយលោក Thanakarn ដែលមានបញ្ហាផ្លូវចិត្ត ឲ្យផឹកស្រាវីស្គី ១ ដបចំណុះ ៣៥០ មិល្លីលីត្រ ជាថ្នូរនឹងលុយ ៨៨០ ដុល្លារ ។

លោក Thanakarn បានយល់ព្រមការភ្នាល់នេះ និងបានលើកអកស្រាដាច់មួយដប ប៉ុន្តែក្រោយមកបានបង្ហាញអាការមិនស្រួល និងបានក្អួតចង្អោរ ហើយត្រូវបានដឹកទៅមន្ទីរពេទ្យ តែបានស្លាប់តាមផ្លូវមុនទៅដល់កន្លែងព្យាបាល ។

គួរបញ្ជាក់ថា លោក Thanakarn គឺជា Influencer ដ៏ល្បីល្បាញមួយរូបរបស់ថៃ និងជាអ្នកលក់ផ្កានៅតំបន់អនាធិបតេយ្យមួយកន្លែងក្នុងទីក្រុងបាងកកដើម្បីយកលុយមកចិញ្ចឹមជីដូនចាស់ជរា បន្ទាប់ពីឪពុកម្ដាយបាក់ចែកផ្លូវគ្នាតាំងតែពីគាត់មានអាយុ ២ ខែមកម្ល៉េះ ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ បង្ហាញខ្លួន៤ថ្ងៃ «Squid Game» វគ្គ២ មានតួសុទ្ធតែតារាជួរមុខ ពេលនេះជាប់លេខ១នៅគ្រប់ប្រទេស