បុរសម្នាក់បើកបរទាំងស្រវឹងមានកម្រិតជាតិអាល់កុល ០.៦៨mg/L បុករឺម៉ក បណ្ដាលឱ្យមនុស្ស១២នាក់រងរបួស

បុរសម្នាក់​បានបើករថយន្ត TOYOTA PRIUS ពណ៌ស ពាក់ផ្លាកលេខ ភ្នំពេញ 2BS-5830 ក្នុងស្ថានភាពស្រវឹងមានកម្រិតជាតិអាល់កុល០.៦៨mg/L ទៅបុកពីក្រោយម៉ូតូសណ្ដោងរឺម៉កដែលធ្វើដំណើរស្របទិសគ្នា បណ្ដាលឱ្យមនុស្ស០៤នាក់រងរបួសធ្ងន់ និង០៨នាក់រងរបួសស្រាល។ នេះបើតាមសំណេររបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ លើទំព័រហ្វេសប៊ុក នារសៀលថ្ងៃទី០៩ ខែមករា ឆ្នាំ២០២៥នេះ។​

ហេតុការណ៍នេះកើតឡើងវេលាម៉ោង០០:១៥នាទី ថ្ងៃទី០៩ ខែមករា ឆ្នាំ២០២៥ នៅលើផ្លូវស្ពានមិត្តភាពកម្ពុជាជប៉ុន ស្ថិតក្នុងសង្កាត់ស្រះចក ខណ្ឌដូនពេញ។ តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសបើករថយន្តម៉ាក​តូយូតាព្រូស ពាក់ផ្លាកលេខ ភ្នំពេញ 2BS-5830 បើកបរក្នុងល្បឿនលឿនទិសដៅពីលិចទៅកើត បានបើកឆ្លងកាត់ស្ពានជ្រោយចង្វារមិត្តភាពកម្ពុជា-ជប៉ុន លុះមកដល់ចំណុចកើតហេតុជិតដល់ពាក់កណ្តាលស្ពាន រថយន្តខាងលើក៏បានបុកម៉ូតូសណ្តោងពេញទំហឹង បណ្តាលឲ្យមនុស្សរួមដំណើរមានក្មេងចាស់ ប្រុសស្រីចំនួន១២នាក់រងរបួស។

ភ្លាមៗអ្នកបើករថយន្ដបង្កបានព្យាយាមបើករថយន្តរត់គេច តែត្រូវបានប្រជាពលរដ្ឋ និងសមត្ថកិច្ចឃាត់បានយកត្រឡប់មកវិញ។ រីឯជនរងគ្រោះត្រូវបានរថយន្តមន្ទីរពេទ្យកាល់ម៉ែត្រចំនួន២គ្រឿង និងមន្ទីរពេទ្យបង្អែកចតុមុខ១គ្រឿងមកទទួលយកទៅសង្គ្រោះជាបន្តបន្ទាប់ ខណៈក្មេងៗត្រូវបានបន្តយកទៅព្យាបាលនៅមន្ទីរពេទ្យគន្ធបុប្ផា។

បន្ទាប់ពីហេតុការណ៍កើតឡើង សមត្ថកិច្ចបានឃាត់ខ្លួនបញ្ជូនទៅការិយាល័យនគរបាលចរាចរណ៍ផ្លូវគោក។ បច្ចុប្បន្នអ្នកបើកបររថយន្តខាងលើ ត្រូវសមត្ថកិច្ចជំនាញកំពុងសួរនាំ និងបន្តអនុវត្តតាមនីតិវិធី៕