កីឡា

ព្រះខ័នរាជស្វាយរៀង បន្តធ្វើការធ្ងន់ក្នុងពានរង្វាន់៤ផ្សេងគ្នាដ៏មមាញឹក

បានផុស

១ year មុន

នៅ

ថ្ងៃអង្គារ ១៤ មករា ២០២៥

ដោយ

ក្លិបបាល់ទាត់ព្រះខ័នរាជស្វាយរៀង ពិតជាធ្វើការធ្ងន់ និងមមាញឹកខ្លាំងសម្រាប់ការប្រកួតពានរង្វាន់៤ផ្សេងគ្នាទាំងក្នុងស្រុក និងក្រៅប្រទេស។

បន្ទាប់ពីឆ្លងកាត់២ប្រកួតចុងក្រោយដ៏លំបាកដោយបានចាញ់ក្រុមមកពីឥណ្ឌូណេស៊ី Makassar ដោយលទ្ធផល ០-១ ក្នុងពានរង្វាន់ ASEAN Club Championship និងឈ្នះក្រុមកំពុងឡើងជើង បឹងកេត ដោយលទ្ធផល ២-០ ក្នុងលីគ ព្រះខ័នរាជស្វាយរៀង ត្រូវប្រកួតជាមួយ ក្រុមខេត្តកែប ជើងទី១ វគ្គ១៦ក្រុមចុងក្រោយ នៅថ្ងៃទី១៥ ខែមករា ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល២០២៤-២៥ ប៉ុន្តែការប្រកួតនេះមិនជាធ្វើការធ្ងន់នោះទេ។

ការប្រកួតដែលធ្វើការធ្ងន់បំផុត គឺព្រះខ័នរាជស្វាយរៀង ធ្វើដំណើរទៅជួបម្ចាស់ផ្ទះវៀតណាម Thanh Hoa នៅថ្ងៃទី២២ ខែមករា ឆ្នាំ២០២៥ ក្នុងពានរង្វាន់ ASEAN Club Championship។ ការប្រកួតត្រូវការឈ្នះដាច់ខាត ប៉ុន្តែចាញ់គឺស្ទើរតែអស់ឱកាស។

ក្រោយចប់ការប្រកួតនៅទឹកដីវៀតណាមត្រឹមតែ៤ថ្ងៃប៉ុណ្ណោះ ព្រះខ័នរាជស្វាយរៀង ត្រូវជួបនឹងក្រុមកំពូលតារាងលីគកំពូលកម្ពុជាគឺ ភ្នំពេញក្រោន ថ្ងៃទី២៦ ខែមករា នៅទឹកដីខេត្តស្វាយរៀង និងបន្តដំណើរទៅខេត្តសៀមរាប ជួប អង្គរថាយហ្គឺរ នៅថ្ងៃទី១ ខែកុម្ភៈ។

៤ថ្ងៃក្រោយមក ព្រះខ័នរាជស្វាយរៀង ត្រូវទទួលភ្ញៀវមកពីប្រទេសមីយ៉ាន់ម៉ា Shan United នៅថ្ងៃទី៥ ខែកុម្ភៈ ដែលជាការប្រកួតចុងក្រោយវគ្គសន្សំពិន្ទុក្នុងពូល ពានរង្វាន់ ASEAN Club Championship នៅពហុកីឡដ្ឋានជាតិអូឡាំពិក។

ដោយមិនរៀបរាប់ពីការប្រកួតពានក្នុងស្រុកនាខែកុម្ភៈ គឺឈានចូលខែមីនា ព្រះខ័នរាជស្វាយរៀង ត្រូវប្រកួតជាក្រុម Shan United ដល់ពីរដង វគ្គ៨ក្រុមចុងក្រោយពានរង្វាន់ AFC Challenge League។ ជើងទី១ ក្រុមតំណាងកម្ពុជាហោះទៅទឹកដីមីយ៉ាន់ម៉ា ដើម្បីប្រកួតនៅថ្ងៃទី១ ខែមីនា និងជើងទី២ បើកទ្វារពហុកីឡដ្ឋានជាតិអូឡាំពិក នៅថ្ងៃទី១៣ ខែមីនា។

ប្រសិនបើធ្វើបានល្អ ព្រះខ័នរាជស្វាយរៀង នឹងក្លាយជាក្លិបកម្ពុជាទី១ដែលបានឡើងវគ្គបន្តក្នុងពានរង្វាន់អន្តរជាតិ២ក្នុងពេលតែមួយ។ ព្រះខ័នរាជស្វាយរៀង សង្ឃឹមច្រើនក្នុងការឡើងវគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League ប៉ុន្តែសម្រាប់ពាន ASEAN Club Championship គឺមិនសូវច្រើនប៉ុន្មានទេ។

យ៉ាងណាមិញ ស្របពេលការប្រកួតដ៏មមាញឹកទាំងក្នុងស្រុក និងក្រៅប្រទេស ព្រះខ័នរាជស្វាយរៀង មានកីឡាកររបួសជាច្រើននាក់ដែលជាកង្វល់ធំរបស់គ្រូបង្វឹកដើម្បីរៀបចំក្រុមក្នុងការប្រកួតនីមួយ៕