ព័ត៌មានអន្ដរជាតិ

សវនាការតុលាការធម្មនុញ្ញកូរ៉េខាងត្បូងត្រូវពន្យាពេល និងបដិសេធសំណើរបស់លោក Yoon

បានផុស

១ year មុន

នៅ

ថ្ងៃអង្គារ ១៤ មករា ២០២៥

ដោយ

សវនាការលើកដំបូងរបស់តុលាការធម្មនុញ្ញត្រូវបានពន្យាពេល ដោយសារតែអវត្តមានរបស់ ភាគីចុងចោទ គឺលោក Yoon Suk Yeol ប្រធានាធិបតីកូរ៉េខាងត្បូងដែលព្យួរអំណាចកាលពីថ្ងៃទី១៤ខែធ្នូ ហើយតាមការគ្រោងទុកតុលាការនេះនឹងដំណើរការលើកទី២នៅថ្ងៃទី១៦ខែមករា។

តាមសេចក្តីរាយការណ៍របស់សារព័ត៌មានស៊ីនហួររបស់ចិន ដំណើរការសវនាការលើកដំបូងនេះ បានប្រើពេលត្រឹមតែរយៈពេល៤នាទីប៉ុណ្ណោះ ដោយសារតែគ្មានវត្តមានលោក Yoon។

សេចក្តីរាយការណ៍របស់សារព័ត៌មានកូរ៉េខាងត្បូង Korea Herald បានលើកឡើងថា មេធាវីការពារក្តីរបស់ប្រធានាធិបតីដែលរងការចោទប្រកាន់បណ្តេញចេញពីអំណាច បានអះអាងកាលថ្ងៃអាទិត្យថា កូនក្តីរបស់ខ្លួនមិនបានអាចមានវត្តមាននៅក្នុងតុលាការបានទេ ដោយសារតែការបារម្ភពីសុវត្ថិភាព។

លោក Yoon Suk Yeol ប្រឈមដីកាចាប់ខ្លួនពីការិយាល័យស៊ើបអង្កេតពុករលួយសម្រាប់មន្ត្រីជាន់ខ្ពស់ (CIO) ដែលជាអង្គភាពឯករាជ្យរបស់រដ្ឋាភិបាលកូរ៉េខាងត្បូង ដែលចេញចំនួន២លើក ក្រោយពីលោក បានអាក់ខានចូលខ្លួនបំភ្លឺតាមដីកាកោះ។

ក្នុងខណៈពេលនេះ លោក Yoon Suk Yeol ត្រូវបានគេជឿថា សម្ងំនៅក្នុងការិយាល័យប្រធានាធិបតី ដែលការពារដោយកងកម្លាំងសន្តិសុខប្រធានាធិបតី និងប្រជាជនដែលស្រឡាញ់រូបលោក ចេញមកប្រជុំគ្នានៅតាមដងផ្លូវជុំវិញបរិវេណនិវេសនដ្ឋានប្រធានាធិបតី។

តាមសេចក្តីរាយការណ៍ របស់ស៊ីនហ៊ូរ នៅមុននេះបន្តិច តុលាការធម្មនុញ្ញក៏បានច្រើនចោលសំណើររបស់ លោក Yoon Suk Yeol ដែលស្នើឲ្យមានការដោះដូរចៅក្រមតុលាការធម្មនុញ្ញដែលទើបតែងតាំងថ្មីៗនេះ។ បច្ចុប្បន្ននេះ ចៅក្រមតុលាការធម្មនុញ្ញមាន៨រូបលើសមាសភាពសរុប៩រូប ដែលអាចដំណើរការកាត់សេចក្តីលើសំណុំរឿងចោទប្រកាន់ដកហូតអំណាចរបស់ប្រធានាធិបតីដែលដាក់ពាក្យបណ្តឹងដោយរដ្ឋសភា៕