អគ្គនាយកដ្ឋានពន្ធនាគារ បដិសេធការចុះផ្សាយរបស់គេហទំព័រមួយដែលចុះផ្សាយថា ពន្ធនាគារព្រៃ ស ផ្អាកទទួលអ្នកទោស

អគ្គនាយកដ្ឋានពន្ធនាគារ នៃក្រសួងមហាផ្ទៃ កាលពីថ្ងៃទី៣១ ខែមករា ឆ្នាំ២០២៥ បានចេញមុខបដិសេធពីការចុះផ្សាយរបស់គេហទំព័រហ្វេសប៊ុកឈ្មោះ សេរីភាព និងយុត្តិធម៌ ដែលបានចុះផ្សាយថា ពន្ធនាគារព្រៃ ស ប្រកាសផ្អាកទទួលអ្នកទោស ខណៈអគ្គនាយកដ្ឋានពន្ធនាគារ ថា ពុំបានដាក់ចេញគោលការណ៍ដូចការចុះផ្សាយនេះឡើយ។​ ជាមួយការបំភ្លឺ និងបដិសេធនេះ អគ្គនាយកដ្ឋានពន្ធនាគារក៏បានស្នើឲ្យគេហទំព័រហ្វេសប៊ុកសេរីភាព និងយុត្តិធម៌ លុបនូវខ្លឹមសារដែលបានចុះផ្សាយនេះ ដើម្បីកុំឱ្យសាធារណជនមានការភាន់ច្រឡំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលិខិតបំភ្លឺ និងបដិសេធ របស់អគ្គនាយកដ្ឋានពន្ធនាគារ បានលើកឡើងថា គេហទំព័រហ្វេសប៊ុកសេរីភាព និងយុត្តិធម៌ បានយកវីឌីអូមកចុះផ្សាយថា «គុកធំជាងគេ គឺគុកព្រៃសបានប្រកាសផ្អាកទទួលអ្នកទោស ព្រោះតែអ្នកទោសច្រើនពេក អត់មានកន្លែងដាក់ មណ្ឌលអប់រំកែប្រែទី១ ហៅថា ពន្ធនាគារព្រៃ ស ដែលជាកន្លែងឃុំខ្លួនអ្នកទោសធំជាងគេបានប្រកាស ផ្អាកទទួលជនសង្ស័យជាបណ្តោះអាសន្ន ព្រោះនៅទីនោះបានឃុំខ្លួនទណ្ឌិត និងជនសង្ស័យដល់ទៅប្រមាណ ១០.០០០នាក់ទៅហើយ មិនមានកន្លែងឃុំខ្លួនជនសង្ស័យបន្ថែមទៀតនោះទេ»។

ក្រោយពីបានពិនិត្យលើការចុះផ្សាយរបស់គេហទំព័រហ្វេសប៊ុកសេរីភាព និងយុត្តិធម៌ រួចមក អ្នកនាំពាក្យអគ្គនាយកដ្ឋានពន្ធនាគារ បានចេញលិខិតបំភ្លឺ និងបដិសេធថា អគ្គនាយកដ្ឋានពន្ធនាគារ ពុំបានដាក់ចេញគោលការណ៍ ដូចការចុះផ្សាយនេះឡើយ។ ក្នុងន័យនេះ អគ្គនាយកដ្ឋានពន្ធនាគារ ស្នើឲ្យគេហទំព័រហ្វេសបុកសេរីភាព និងយុត្តិធម៌ លុបនូវខ្លឹមសារដែលបានចុះផ្សាយនេះ ដើម្បីកុំឱ្យសាធារណជន មានការភាន់ច្រឡំ៕

អត្ថបទ៖ សុខុម