អគ្គនាយកពន្ធនាគារចុះត្រួតពិនិត្យស្ថានភាពមណ្ឌលអប់រំកែប្រែទី៤ ដើម្បីពង្រឹងប្រសិទ្ធភាពការគ្រប់គ្រង

លោកឧត្តមអគ្គានុរក្សថ្នាក់លេខ១ ឈន សាណាត អគ្គនាយកពន្ធនាគារ នៅថ្ងៃទី១០ ខែកុម្ភៈ ឆ្នាំ២០២៦ បានចុះពិនិត្យហេដ្ឋារចនាសម្ព័ន្ធ និងវឌ្ឍនភាពការងាររបស់មណ្ឌលអប់រំកែប្រែទី៤ ក្នុងខេត្តពោធិ៍សាត់ ដោយការចុះពិនិត្យពេលនេះ គឺដើម្បីពង្រឹងប្រសិទ្ធភាពបន្ថែមទៀតសម្រាប់ការងារគ្រប់គ្រងពន្ធនាគារ។

លោក ឈន សាណាត បានចុះត្រួតពិនិត្យលម្អិតលើហេដ្ឋារចនាសម្ព័ន្ធ និងអគារឃុំឃាំង រួមមានប្រព័ន្ធសន្តិសុខ អគារ កំផែង កាមេរ៉ាសុវត្ថិភាព និងសម្ភារពាក់ព័ន្ធ ដើម្បីធានាបានសុវត្ថិភាព និងស្តង់ដារគ្រប់គ្រងត្រឹមត្រូវ ព្រមទាំងបានពិនិត្យការត្រួតពិនិត្យម៉ាស៊ីនស្គែន និងសត្វសុនខសម្រាប់ប្រើប្រាស់ស្វែងរកវត្ថុហាមឃាត់ និងគ្រឿងញៀន នៅក្នុងមណ្ឌល។

យកពេលចុះពិនិត្យនោះ លោក ឈន សាណាត បានណែនាំដល់ថ្នាក់ដឹកនាំ និងមន្ត្រីទាំងអស់នៃមណ្ឌលអប់រំកែប្រែទី៤ ត្រូវពង្រឹងការពិនិត្យឆែកឆេរនូវវត្ថុហាមឃាត់ ដូចជាទូរសព្ទដៃ និងគ្រឿងញៀន ដោយហាមនាំចូលទៅក្នុងអគារឃុំឃាំងជាមួយនឹងការពង្រឹងប្រព័ន្ធសុវត្ថិភាពសន្តិសុខតាមអគារ និងការពង្រឹងការងារគ្រប់គ្រងជនជាប់ឃុំ។ ខណៈការប្រព្រឹត្តល្បែងអនឡានក្នុងពន្ធនាគារ ក៏ត្រូវហាមឃាត់ជាដាច់ខាត។

លោក ក៏បានលើកឡើងពីការពង្រឹងវត្តមានមន្ត្រី និងមិនត្រូវអនុញ្ញាតឱ្យទៅបម្រើការងារនៅអង្គភាពខាងក្រៅ ហើយមន្ត្រីត្រូវតែមានការហ្វឹកហាត់ប្រើប្រាស់អាវុធ និងសមយុទ្ធឱ្យបានជាប់ជាប្រចាំ។ បន្ថែមពីនេះ គឺត្រូវយកចិត្តទុកដាក់ថែរក្សាសុខភាព និងអនាម័យទាំងមន្ត្រី និងជនជាប់ឃុំ ដោយត្រៀមបង្ការការពារជំងឺឆ្លងថ្មីៗ។  

លោកអគ្គនាយកពន្ធនាគារ ក៏បានលើកទឹកចិត្តឱ្យមណ្ឌលបន្តអភិវឌ្ឍកម្មវិធីអប់រំកែប្រែ ការបណ្តុះបណ្តាលវិជ្ជាជីវៈ និងការងារផលិតកម្ម កសិកម្ម ដើម្បីលើកកម្ពស់ប្រសិទ្ធភាពការគ្រប់គ្រង និងការកែប្រែអាកប្បកិរិយាជនជាប់ឃុំ ឱ្យស្របតាមគោលនយោបាយរាជរដ្ឋាភិបាល៕