រថយន្ត BYD ដែលផលិតនៅកម្ពុជានឹងចេញពីរោងចក្រនៅខែវិច្ឆិកា ឆ្នាំ២០២៥នេះ

អនុប្រធានទី១ក្រុមប្រឹក្សាអភិវឌ្ឍន៍កម្ពុជា ឧបនាយករដ្ឋមន្ត្រី ស៊ុន ចាន់ថុល បានឱ្យដឹងថាក្រុមហ៊ុនផលិតរថយន្តអគ្គិសនីរបស់ចិន BYD បានចាប់ផ្ដើមសាងសង់រោងចក្ររបស់ខ្លួននៅកម្ពុជាហើយ ខណៈរថយន្ត BYD ដែលផលិតនៅកម្ពុជានេះនឹងចេញពីរោងចក្រនៅខែវិច្ឆិកា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ក្រុមអ្នកយកព័ត៌មាននៅព្រឹកថ្ងៃទី៦ ខែកុម្ភៈ ឆ្នាំ២០២៥ នៅក្រុមប្រឹក្សាអភិវឌ្ឍន៍កម្ពុជា ឧបនាយករដ្ឋមន្ត្រី ស៊ុន ចាន់ថុល បានលើកឡើងថារោងចក្រដែលបោះទុនវិនិយោគជាង៣០លានដុល្លារបស់ BYD នេះកំពុងសាងសង់នៅក្នុងតំបន់សេដ្ឋកិច្ចពិសេសខេត្តព្រះសីហនុ ដែលគម្រោងនឹងចេញរូបរាងនៅខែវិច្ចិកាខាងមុខដែលមានសមត្ថភាពផលិតរថយន្តក្នុងមួយឆ្នាំ១ម៉ឺនគ្រឿង។  

លោកថា៖ «ឥឡូវគឺផ្គត់ផ្គង់នៅប្រទេសកម្ពុជាសិន។ ដោយសារតែឡាន EV គេផលិតតែក្នុងប្រទេសមួយៗតែម្ដង តែយើងគិតថាពេលគាត់ផលិតឡាន EV នេះគឺអាចផលិតគ្រឿងបន្លាស់បង្គុំលក់ទៅប្រទេសផ្សេងទៀតបាន តែទី១គឺផលិតលក់នៅកម្ពុជាសិន»។

បើតាមលោកឧបនាយករដ្ឋមន្ត្រីរោងចក្រនេះ ដំបូងគឺជារោងចក្របង្គុំដែលយកគ្រឿងបង្គំពីក្រៅប្រទេសផលិតជារថយន្ត តែនឹងពង្រឹងសមត្ថភាពទៅរោងចក្រផលិតគ្រឿងបង្គុំផលិតដោយខ្លួនឯងទៅថ្ងៃខាងមុខផងដែរ។

គម្រោងនៃការបង្កើតរោងចក្រផលិតរថយន្ត BYD ត្រូវបានបង្កើបឡើងកាលពីចុងឆ្នាំ២០២៤ ដែលជាលទ្ធផលជោគជ័យនៃការទាក់ទាញវិនិយោគមកកម្ពុជារបស់រដ្ឋាភិបាលអាណត្តិទី៧។

គួរឱ្យដឹងដែរថាក្នុងឆ្នាំ២០២៤ មានរថយន្តអគ្គិសនី(EV)ចុះបញ្ជីសរុប ២.២៥៣គ្រឿង កើនលើសឆ្នាំ២០២៣ ចំនួន៦២០% (ឆ្នាំ២០២៣ មានចំនួន ៣១៣គ្រឿង)៕

អត្ថបទដោយ ហ៊ុន សិរីវឌ្ឍន៍