អគ្គិភ័យឆេះរោងចក្រនៅខណ្ឌដង្កោ អាចបណ្ដាលឲ្យកម្មករ៤០០នាក់ប្រឈមបាត់បង់ការងារ

ករណីអគ្គិភ័យឆាបឆេះរោងចក្រនៅផ្លូវ៥០ម៉ែត្រ ក្នុងភូមិអន្លង់គង សង្កាត់ព្រៃស ខណ្ឌដង្កោ កាលពីព្រលប់ថ្ងៃទី១១ ខែកុម្ភៈ ឆ្នាំ២០២៥ បានបណ្ដាលឲ្យរោងចក្រ ១អគារ រួមទាំងសម្ភារៈនៅក្នុងរោងចក្រត្រូវបានអណ្ដាតភ្លើងលេបត្របាក់អស់ទាំងស្រុង។

តាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់នៅព្រឹកថ្ងៃទី១២កុម្ភៈ នេះថា រោងចក្រនេះជារោងចក្រកាត់ដេរសំលៀកបំពាក់ មានឈ្មោះ ហ្វ័រម៉ាត ខេមបូឌា ខូអិល​ធី​ឌី មានថៅកែជាជនជាតិ កូរ៉េ និងមានកម្មករកម្មការិនីប្រមាណ៤០០នាក់។

លោក សំ វិច្ឆិកា បញ្ជាក់ថា ក្នុងករណីអគ្គិភ័យនេះ កម្លាំងជំនាញមកគ្រប់បណ្ដាអង្គភាព និងរថយន្ដពន្លត់អគ្គិភ័យជាច្រើនគ្រឿងបានជួយអន្តរាគមន៍ពន្លត់រហូតដល់វេលាម៉ោងជាង១០យប់ ទើបអាចគ្រប់គ្រងស្ថានការណ៍បាន និងមិនបណ្ដាលឲ្យមានកម្មករ ឬបុគ្គលិកណាម្នាក់រងរបួសនោះទេ។ តែទោះយ៉ាងណា លោកនៅមិនទាន់បញ្ជាក់ពីមូលហេតុដែលនាំឲ្យកើតមានករណីអគ្គិភ័យនេះនៅឡើយទេ ខណៈកម្លាំងជំនាញកំពុងស្រាវជ្រាវ។

តាមរបាយការណ៍របស់ក្រុមការងារព័ត៌មាន និងប្រត្តិកម្មរហ័ស នៃស្នងការដ្ឋាននគរបាលរាជធានីភ្នំពេញ ម្ចាស់ទីតាំង​រោងចក្រមានឈ្មោះ YOO MIWOL ភេទស្រី អាយុ៥១ឆ្នាំ ជនជាតិ កូរ៉េខាងត្បូង រោងចក្រសាងសង់អំពីថ្មប្រក់ស័ង្កសី ទំហំ ១០,០០០ម៉ែត្រការ៉េ។ ក្នុងប្រតិបត្តិការអន្តរាគមន៍ កម្លាំងជំនាញមកពីគ្រប់បណ្ដាអង្គភាពពាក់ព័ន្ធបានប្រើប្រាស់រថយន្ដពន្លត់អគ្គិភ័យសរុបចំនួន៤៣គ្រឿង។

សូមបញ្ជាក់ថា ករណីអគ្គិភ័យនេះបានកើតឡើងកាលពីវេលាម៉ោង៦និង៣០នាទីល្ងាច ថ្ងៃទី១១ ខែកុម្ភៈ ឆ្នាំ២០២៥ នៅលើបណ្ដោយផ្លូវ៥០ម៉ែត្រ ក្នុងភូមិអន្លង់គង សង្កាត់ព្រៃស ខណ្ឌដង្កោ រាជធានីភ្នំពេញ ដែលបណ្ដាលឲ្យខូចខាតរោងចក្រ និងសម្ភារៈនៅក្នុងរោងចក្រទាំងស្រុង៕

អត្ថបទ៖ សុខុម