ព័ត៌មានអន្ដរជាតិ

កូរ៉េខាងជើង រិះគន់អាមេរិកជុំវិញរឿងលក់នាវាមុជទឹកនុយក្លេអ៊ែរឲ្យអូស្ត្រាលី

បានផុស

១ year មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

Chheang

រដ្ឋាភិបាលក្រុងព្យុងយ៉ាង បានចេញការថ្កោលទោសយ៉ាងខ្លាំងចំពោះកិច្ចព្រមព្រៀងនាវាមុជទឹកនុយក្លេអ៊ែរ AUKUS នាពេលថ្មីៗនេះ ដោយអះអាងថា វាបង្កការគំរាមកំហែងយ៉ាងខ្លាំងដល់ស្ថិរភាពក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA នៅថ្ងៃទី២០កុម្ភៈចុះផ្សាយរិះគន់អាមេរិក ដែលធ្វើកិច្ចព្រមព្រៀងតម្លៃ ៣ពាន់លានដុល្លារជាមួយអូស្ត្រាលី ក្នុងការបង្កើនឧស្សាហកម្មនាវាមុជទឹករបស់ខ្លួន។ អូស្ត្រាលី បានប្រគល់ប្រាក់ជាលើកដំបូងចំនួន ៥០០លានដុល្លារឲ្យអាមេរិក នៅក្រោមកិច្ចព្រមព្រៀងមួយនេះ ខណៈការដឹកជញ្ជូននាវាមុជទឹកដើរដោយថាមពលនុយក្លេអ៊ែរប្រភេទ Virginia នឹងចាប់ផ្ដើមនៅដើមទសវត្សរ៍ឆ្នាំ២០៣០ខាងមុខ។

នេះមិនមែនជាលើកទីមួយទេ ដែលកូរ៉េខាងជើងបង្ហាញការព្រួយបារម្ភលើសន្ធិសញ្ញា AUKUS។ នៅឆ្នាំ២០២១ បន្ទាប់ពីការប្រកាសដំបូងនៃកិច្ចព្រមព្រៀង ទីក្រុងព្យុងយ៉ាងបានប្រកូកប្រកាសថា សកម្មភាពបែបនេះអាចបង្កឲ្យមាន «ការប្រកួតប្រជែងអាវុធនុយក្លេអ៊ែរ» នៅក្នុងតំបន់។ រដ្ឋាភិបាលកូរ៉េខាងជើង ព្រមានថា កិច្ចព្រមព្រៀងនេះអាចនឹង«រំខានដល់តុល្យភាពយុទ្ធសាស្ត្រក្នុងតំបន់អាស៊ីប៉ាស៊ីហ្វិក»។

កិច្ចព្រមព្រៀង AUKUS ដែលត្រូវបានបង្កើតឡើងក្នុងឆ្នាំ២០២១ រវាងអូស្ត្រាលី អង់គ្លេស និងអាមេរិក មានគោលបំណងពង្រឹងសមត្ថភាពការពាររបស់ប្រទេសអូស្ត្រាលី ចំពេលមានភាពតានតឹងកើនឡើងនៅឥណ្ឌូប៉ាស៊ីហ្វិក។ ខណៈពេលដែលអ្នកគាំទ្រអះអាងថាវាបម្រើជាវិធានការប្រឆាំងនឹងការគំរាមកំហែងក្នុងតំបន់ អ្នករិះគន់ រួមទាំងកូរ៉េខាងជើង និងចិនបានប្រកែកថា វាអាចបង្កើនភាពតានតឹងផ្នែកយោធា និងបង្កឲ្យមានការប្រកួតប្រជែងសព្វាវុធ៕

ដោយ៖ ឈាង