អ្នកវិភាគ អ្នកឃ្លាំមើល និងសហជីពនៅកម្ពុជា៖ RFA គ្មានវិជ្ជាជីវៈជាសារព័ត៌មាននោះទេ ខណៈកំពុងបម្រើផលប្រយោជន៍ក្រុមជ្រុលនិយមក្រៅច្បាប់

អ្នកវិភាគបញ្ហានយោបាយ អ្នកឃ្លាំមើលការអភិវឌ្ឍន៍សង្គម និងសហជីពនៅកម្ពុជា បានអះអាងថា អាស៊ីសេរី (RFA) ជាវិទ្យុបម្រើនយោបាយអតីតបក្សប្រឆាំងជ្រុលនិយម ផ្សាយព័ត៌មានមិនពិត លំអៀង ញុះញង់ និងគ្មានវិជ្ជាជីវៈជាសារព័ត៌មានបម្រើផលប្រយោជន៍មហាជននោះទេ។

លោក ថុង ម៉េងដាវីត អ្នកវិភាគភូមិសាស្រ្តនយោបាយ និងសន្ដិសុខបានថ្លែងថា «រហូតមកទល់នឹងពេលនេះ មានពល​រដ្ឋ​ខ្មែរប្រតិកម្មចំពោះការផ្សាយរបស់វិទ្យុអាស៊ីសេរីយ៉ាងច្រើន គឺផ្សាយនូវព័ត៌មានបំពុល គ្មានការពិត, ផ្សាយព័ត៌មានមួយចំហៀង លំអៀង កាន់ជើងដល់ក្រុមជ្រុលនិយម បញ្ចេញបញ្ចូលខ្លឹមសារខ្លួនឯង ហើយបម្រើនយោបាយបក្សប្រឆាំងងងឹតងងុល និងគ្មានវិជ្ជាជីវៈជាសារព័ត៌មានសម្រាប់ផលប្រយោជន៍មហាជននោះទេ»។

លោកបន្តថា «RFA មានទិសដៅចង់ផ្លាស់ប្តូរការដឹកនាំប្រទេសតាមបែបហិង្សានិយម គ្មានប្រជាធិបតេយ្យ ដូចជាអំពើញុះញង់ដល់កងកម្លាំងប្រដាប់អាវុធបំបែរចុងកាណុងធ្វើរដ្ឋប្រហារ និងព័ត៌មានញុះញង់ឱ្យស្អប់ខ្ពើមជាតិសាសន៍ ញុះញង់ស្អប់វៀតណាម, សម្តីប្រឆាំងថៃ និងការផ្សាយបំភ្លៃការពិត»។ អ្នកវិភាគរូបនេះបានសង្កត់ធ្ងន់លើនិន្នាការរើសអើងសិទ្ធិមនុស្ស និងគ្មានប្រជាធិបតេយ្យនោះ ខណៈដែលខ្លួនផ្សព្វផ្សាយគាំទ្រទណ្ឌិត សម រង្ស៊ី ក្នុងការបង្កើតចលនាតស៊ូ ដើម្បីប៉ុនប៉ងផ្តួលរំលំរាជរដ្ឋាភិបាលក្នុងស្រុកតាមទង្វើហិង្សា ប្រដាប់អាវុធ និងបន្តផ្សាយញុះញង់ឱ្យប្រើសកម្មភាពហិង្សានិយម។

លោក សំ សឿន អ្នកឃ្លាំមើលការអភិវឌ្ឍន៍សង្គម និងនយោបាយបានថ្លែងថា «ខ្ញុំក៏សង្កេតឃើញថា RFA មានគោលដៅដ៏ខ្មៅងងឹត ហើយនៅពេលដែលមានបាតុកម្មម្ដងៗ គឺខំប្រឹងផ្សាយបំប៉ោង ផ្សាយបំភ្លៃតួលេខអ្នកចូលរួមបាតុកម្ម។ ឧបមាថា មានអ្នកចូលបាតុកម្មប្រហែល ២០ ឬ៣០នាក់អីទេ ប៉ុន្ដែអាស៊ីសេរីផ្សាយថា មានមនុស្សរាប់ពាន់នាក់មកធ្វើបាតុកម្ម»។

លោកបន្តថា ការផ្សាយរបស់វិទ្យុអាស៊ីសេរីជាភាសាខ្មែរកន្លងមកនេះ ពិតជាបម្រើនយោបាយរបស់ក្រុមជ្រុលនិយម សម រង្ស៊ី ដែលបិទបាំងក្រោមស្លាកសិទ្ធិមនុស្ស និងលទ្ធិប្រជាធិបតេយ្យក្លែងក្លាយ ក្នុងបំណងចង់នាំកម្ពុជាដែលកំពុងរស់ក្រោមម្លប់សន្តិភាពនៃនយោបាយឈ្នះ-ឈ្នះជាង ៣០ឆ្នាំនេះ ឱ្យធ្លាក់ចូលឧបាយកលនៃវិបត្តិសង្គ្រាមសាជាថ្មីឡើងវិញ។
ដូច្នេះ លោក សំ សឿន បានចាត់ទុកវិទ្យុអាស៊ីសេរីផ្តល់អាទិភាពតែទៅលើរបៀបវារៈនយោបាយរបស់មនុស្សមួយក្រុមតូច ឬគណបក្សប្រឆាំងតែមួយ ជាមួយនឹងសេចក្តីរាយការណ៍ព័ត៌មានគ្មានតុល្យភាពត្រឹមត្រូវ គ្មានវិជ្ជាជីវៈ និងផ្សព្វផ្សាយតែព័ត៌មានដែលបំណងប៉ុនប៉ងបង្កឱ្យមានចលាចលក្នុងសង្គមកម្ពុជាប៉ុណ្ណោះ។

ចំណែកលោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជាបានថ្លែងថា «វាជាការពិត គឺវិទ្យុអាស៊ីសេរីនេះ មិនបានបំរើផលប្រយោជន៍ប្រជាជនខ្មែរជាម្ចាស់ស្រុកទេ ប៉ុន្តែជាវិទ្យុបំរើរបៀបវារៈនយោបាយទុច្ចរិតរបស់ក្រុមជ្រុលនិយម សម រង្ស៊ី តែប៉ុណ្ណោះ ព្រោះពួកគេចង់ផ្លាស់ប្តូរប្រទេសកម្ពុជាតាមរបៀបហិង្សា និងមិនប្រជាធិបតេយ្យនោះទេ»។

លោកបន្តថា សេចក្តីរាយការណ៍របស់វិទ្យុអាស៊ីសេរី មានភាពលំអៀង ឬមានភាពស៊ីសង្វាក់គ្នាជាមួយក្រុមប្រឆាំង ឬថាការផ្សព្វផ្សាយនោះ អាចនឹងមិនបម្រើផលប្រយោជន៍របស់មហាជនប្រកបដោយប្រសិទ្ធភាពនោះទេ។ វិទ្យុអាស៊ីសេរីជាភាសាខ្មែរ នឹងអាចត្រូវបានពលរដ្ឋពិចារណាសាឡើងវិញពីចរិតនៃការផ្សាយ ហើយឈប់មានអ្នកតាមដានស្ដាប់ និងអាចឈានដល់ភាពវិនាសខ្លួនឯងវិញជាក់ជាមិនខាន។

អ្នកវិភាគបញ្ហានយោបាយ អ្នកឃ្លាំមើលការអភិវឌ្ឍន៍សង្គម និងសហជីពបានលើកឡើងស្រដៀងគ្នាថា ពលរដ្ឋខ្មែរក្នុងស្រុកដែលរស់ក្រោមម្លប់សន្តិភាពនៃនយោបាយឈ្នះ-ឈ្នះ រយៈពេលជាង ៣០ឆ្នាំរួចមកនេះ កំពុងសោយសុខក្នុងប្រទេសដែលគ្មានសង្គ្រាម និងកំពុងរីករាយនឹងសមិទ្ធផលជាតិ ដែលមានការកើនឡើងជាបន្តបន្ទាប់ពីមួយឆ្នាំទៅមួយឆ្នាំមិនដែលខានឡើយ បើទោះបីជាពិភពលោក បាននិងកំពុងឆ្លងព្យុះសង្ឃរាដោយសារសង្គ្រាមរុស្ស៊ី អ៊ុយក្រែន និងសង្គ្រាមនៅមជ្ឈិមបូព៌ាយ៉ាងណាក៏ដោយ៕