អគ្គមេបញ្ជាការទ័ព បញ្ជាក់ពីជំហរចង់ឱ្យព្រំដែនកម្ពុជា-ថៃ ជាព្រំដែនសន្តិភាព និងមិត្តភាព

អគ្គមេបញ្ជាការនៃកងយោធពលខេមរភូមិន្ទ នាយឧត្តមសេនីយ៍ វង្ស ពិសេន បានបញ្ជាក់ពីជំហររបស់កម្ពុជាដែលចង់ឱ្យតំបន់តាមខ្សែបន្ទាត់ព្រំដែនជាមួយប្រទេសថៃ ជាព្រំដែននៃកិច្ចសហប្រតិបត្តិការល្អក្នុងនាមជាប្រទេសជិតខាង ដោយធ្វើយ៉ាងណាធានាឱ្យបាននូវព្រំដែនមួយដែលមិត្តភាព និងសន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយឧត្តមសេនីយ៍ អគ្គមេបញ្ជាការ ជឿជាក់ថា ចំណងមិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យប្រកបដោយនិរន្តរភាព និងយូរអង្វែងរវាងប្រទេសទាំងពីរ កម្ពុជា-ថៃ ពិសេសទៅលើវិស័យកងទ័ព នឹងកាន់តែរីកចម្រើនខ្លាំងក្លាថែមទៀត តាមទស្សនៈរួមរបស់ថ្នាក់ដឹកនាំនៃប្រទេសទាំងពីរដែលចង់បានព្រំដែនសន្តិភាព មិត្តភាព កិច្ចសហសហប្រតិបត្តិការ និងការអភិវឌ្ឍ។

ការបញ្ជាក់ជំហរដូច្នេះរបស់នាយឧត្តមសេនីយ៍ អគ្គមេបញ្ជាការកងទ័ពកម្ពុជា គឺបានធ្វើឡើងចំពោះមុខមន្ត្រីសេនានុព័ន្ធថៃប្រចាំកម្ពុជា ដឹកនាំដោយវរសេនីយ៍ឯក កនវរានន្ទ ក្លាន់ព្រំសុវណ្ណ ក្នុងឱកាសចូលជួបសម្តែងការគួរសម និងជូនពរលោក អគ្គមេបញ្ជាការ នាព្រឹកថ្ងៃទី២៦ ខែមីនា ឆ្នាំ២០២៥ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខាងមុខ។

នាយឧត្តមសេនីយ៍ វង្ស ពិសេន បានអរគុណចំពោះសេនានុព័ន្ធយោធាថៃ ដែលបានមកជូនពរឆ្នាំថ្មីនាឱកាសនេះ ហើយនេះបង្ហាញពីមនោសញ្ចេតនា ស្រឡាញ់រាប់អានគ្នា និងពង្រឹងចំណងមិត្តភាព កិច្ចសហប្រតិបត្តិការរវាងកម្ពុជា-ថៃ ក្នុងភាពជាអ្នកជិតខាងល្អ។

ជាការកត់សម្គាល់ ក្រុមនិន្នាការប្រឆាំង ទាំងកម្ពុជា និងក្រុមប្រឆាំងរបស់ថៃ បាននិងកំពុងព្យាយាមយកបញ្ហាព្រំដែនជាប្រធានបទដើម្បីតែកេងចំណេញផ្នែកនយោបាយរៀងៗខ្លួន ពិសេសការរុញស្ថានការណ៍តាមព្រំដែនរវាងកម្ពុជា និងថៃ ជាអាទិ៍ រឿងព្រំដែនទឹក បញ្ហាកោះគុត និងថ្មីៗនេះ គឺបញ្ហានៅប្រាសាទតាមាន់។

តែយ៉ាងណា រដ្ឋាភិបាលប្រទេសទាំងពីរ កម្ពុជា និងថៃ នៅតែប្រកាសបន្តពង្រឹងពង្រីកនូវទំនាក់ទំនង និងបង្កើនកិច្ចសហប្រតិបត្តិការទ្វេភាគីឱ្យកាន់តែល្អប្រសើរបន្ថែមទៀត ជាពិសេសការលើកកម្ពស់ការអភិវឌ្ឍហេដ្ឋារចនាសម្ព័ន្ធ និងការតភ្ជាប់តាមព្រំដែន គឺធ្វើយ៉ាងណាធានាបាននូវព្រំដែនសន្តិភាព មិត្តភាព និងលើកកម្ពស់ជីវភាពរស់នៅរបស់ប្រជាជននៅតំបន់ព្រំដែន តាមរយៈការជំរុញវិស័យពាណិជ្ជកម្ម និងទំនាក់ទំនងប្រជាជននិងប្រជាជនរវាងប្រទេសទាំងពីរ៕