លោក ពូទីន ប្រាប់ពីអារម្មណ៍ ក្រោយចាក់វ៉ាក់សាំងការពារកូវីដ

អ្នកនាំពាក្យវិមានក្រឹមឡាំងលោក Dmitry Peskov បានប្រាប់សារព័ត៌មាន Sputnik ថា ប្រធានាធិបតីរុស្ស៊ីលោក វ្លាឌីមៀ ពូទីន បានចាក់វ៉ាក់សាំងប្រឆាំងនឹងជំងឺកូវីដ ១៩ ហើយគាត់មានអារម្មណ៍ល្អប្រសើរ បន្ទាប់ពីចាក់វ៉ាក់សាំងរួច ។

លោក Peskov បាននិយាយថា “ថ្ងៃស្អែកគាត់នឹងធ្វើការពេញលេញជាធម្មតា” ។

មេដឹកនាំរុស្ស៊ីរូបនេះបានប្រកាសថាគាត់នឹងចាក់វ៉ាក់សាំងប្រឆាំងនឹងវីរុសនេះកាលពីថ្ងៃអង្គារ ។ វិមានក្រឹមឡាំងបានបញ្ជាក់បន្ថែមទៀតថា ដំណើរការនៃការចាក់វ៉ាក់សាំងនេះមិនត្រូវបានផ្សាយឡើយ ។

វិមានក្រឹមឡាំងកាលពីមុនបានបដិសេធមិនបង្ហាញវ៉ាក់សាំងមួយណាដែលប្រធានាធិបតីនឹងទទួលឡើយដោយសង្កត់ធ្ងន់ថា វ៉ាក់សាំងទាំងបីដែលបានចុះបញ្ជីនៅក្នុងប្រទេសបានបញ្ជាក់ពីប្រសិទ្ធភាព និងសុវត្ថិភាពក្នុងការសាកល្បង ។

នាពេលបច្ចុប្បន្ននេះប្រទេសរុស្ស៊ីបានចុះបញ្ជីវ៉ាក់សាំង Sputnik V ដែលត្រូវបានអភិវឌ្ឍដោយវិទ្យាស្ថាន Gamaleya របស់ទីក្រុងម៉ូស្គូ វ៉ាក់សាំង EpiVacCorona អភិវឌ្ឍដោយមជ្ឈមណ្ឌលស្រាវជ្រាវ Vector នៅតំបន់ Siberian និងវ៉ា់ក់សាំង CoviVac របស់វិទ្យាស្ថានស្រាវជ្រាវ Chumakov ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Putin នឹងចាក់វ៉ាក់សាំង Sputnik V បញ្ចប់ការរិះគន់របស់បរទេស

ចុចអាន ៖ លោក ពូទីន សរសេរពាក្យអ្វីលើក្រដាស អំឡុងនិយាយទូរស័ព្ទជាមួយលោក បៃដិន (មានវីដេអូ)