នគរបាលខេត្តកំពត នឹងដាក់ពង្រាយកម្លាំងជាង១ពាន់នាក់ដើម្បីការពារសុវត្ថិភាព និងសណ្ដាប់ធ្នាប់ក្នុងឱកាសបុណ្យចូលឆ្នាំ

ស្នងការដ្ឋាននគរបាលខេត្តកំពត នឹងប្រើប្រាស់កម្លាំងប្រមាណជាង ១.០០០នាក់ រួមបញ្ចូលជាមួយមន្ត្រីសមត្ថកិច្ចចំណុះគណៈបញ្ជាការឯកភាពរដ្ឋបាលខេត្ត ដើម្បីចល័ត និងឈរជើងតាមគោលដៅសំខាន់ៗនៅទូទាំងខេត្ត ដើម្បីការពារសុខសុវត្ថិភាព និងសណ្ដាប់ធ្នាប់សាធារណៈក្នុងឱកាសបុណ្យចូលឆ្នាំថ្មីប្រពៃណីជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ដាន វុត្ថា ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តកំពត បានប្រាប់ឱ្យដឹងនៅថ្ងៃទី៤មេសា នេះថា ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នាពេលខាងមុខ ស្នងការដ្ឋាននគរបាលខេត្តនឹងប្រើប្រាស់កម្លាំងនគរបាលចំនួន ១.០១៨នាក់ សហការជាមួយមន្ត្រីសមត្ថកិច្ចចំណុះគណៈបញ្ជាការឯកភាពខេត្តដាក់ឈរជើង និងចល័តតាមគោលដៅសំខាន់ៗ ដើម្បីការពារសន្តិសុខសណ្តាប់ធ្នាប់សាធារណៈជូនភ្ញៀវទេសចរដែលមកកម្សាន្ដ។

លោក ដាន វុត្ថា បន្តថា គោលដៅសំខាន់ៗនឹងត្រូវបែងចែកជា ៣ប្រភេទរួមមាន កន្លែងរៀបចំពិធីកម្សាន្តសប្បាយ តាមដងផ្លូវដែលឧស្សាហ៍កើតឡើងនូវករណីកកស្ទះចរាចរណ៍ និងគ្រប់រមណីយដ្ឋានទូទាំងខេត្ត។ ចំពោះតំបន់ត្រជាក់ត្រង់ចំណុចរង្វង់មូលរូបសំណាកផ្លែទុរេន អង្គភាពបង្ការ និងពន្លត់អគ្គិភ័យ នឹងប្រើប្រាស់រថយន្តចំនួន ៤គ្រឿង សម្រាប់បាញ់ទឹកជូនភ្ញៀវរាំលេងកម្សាន្តពេញរយៈពេល៣ថ្ងៃ។

អ្នកនាំពាក្យរូបនេះបន្ថែមថា ក្រៅពីកិច្ចសហការជាមួយកម្លាំងកងរាជអាវុធហត្ថ ប្រជាការពារ មន្ត្រីសុខាភិបាល មន្ត្រីអគ្គិសនី និងគ្រប់ផ្នែកពាក់ព័ន្ធនៅលើដីគោក កម្លាំងស្នងការដ្ឋាននគរបាលខេត្ត នឹងចូលរួមសហការជាមួយសមត្ថកិច្ចនគរបាលការពារព្រំដែនទឹករង់ចាំឃ្លាំមើល និងល្បាតតាមដងព្រែក លើផ្ទៃសមុទ្រដើម្បីត្រៀមជួយអ្នកធ្វើដំណើរកម្សាន្តតាមផ្លូវទឹកផងដែរ។ ជាគ្នាមួយនេះ មន្ត្រីជំនាញក៏បានណែនាំដល់ប្រតិបត្តិករទេសចរណ៍ ពិសេសម្ចាស់អាជីវកម្មទូកដឹកភ្ញៀវឱ្យប្រុងប្រយ័ត្នខ្ពស់ដោយមានការបំពាក់ឧបករណ៍បរិក្ខារការពារសុវត្ថិភាព និងហាមឃាត់ដាច់ខាតនូវការផ្ទុកលើសចំណុះ។

ក្នុងនាមតំណាងឱ្យលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនៃស្នងការដ្ឋាននគរបាលខេត្តកំពត លោកសូមអំពាវនាវដល់អ្នកបញ្ជាយានយន្តគ្រប់ប្រភេទ ត្រូវគោរពច្បាប់ចរាចរណ៍ឱ្យបានខ្ជាប់ខ្ជួន និងមានការយោគយល់អធ្យាស្រ័យគ្នាដើម្បីបញ្ចៀសករណីគ្រោះថ្នាក់ ឬការខាតបង់ទ្រព្យធនផ្សេងៗ។ យ៉ាងណាមិញ ក្រុមយុវជនគ្រប់រូបត្រូវរក្សាភាពថ្លៃថ្នូរជាមួយការកម្សាន្តតាមបែបប្រពៃណីជាតិ ហើយបញ្ចៀសឱ្យបាននូវទង្វើមិនគប្បីដែលនាំឱ្យមានទោសទណ្ឌដល់ខ្លួន និងទុក្ខកង្វល់សម្រាប់ក្រុមគ្រួសារក្នុងការលេងល្បែងដែលមិនសមរម្យ ឬធ្វើឱ្យមានគ្រោះថ្នាក់ផ្សេងៗទៀត៕

អត្ថបទ៖ សឹង រ៉ាត់