ម្ចាស់គណនីហ្វេសប៊ុក “You Ri” ដែលធ្វើទង្វើអសីលធម៌បង្ហាញលើបណ្តាញសង្គម ត្រូវហៅមកណែនាំ និងធ្វើកិច្ចសន្យា

លេខាធិការដ្ឋាននៃគណៈកម្មាធិការជាតិលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ បានអញ្ជើញឈ្មោះ រិះ សៀវហុង ប្រើប្រាស់គណនីហ្វេសប៊ុកឈ្មោះ You Ri មកផ្តល់ការណែនាំ និងធ្វើកិច្ចសន្យាសុំទោសជាសាធារណៈ បន្ទាប់ពីប្រព្រឹត្តទង្វើអសីលធម៌លើបណ្តាញទំនាក់ទំនងសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការហៅមកធ្វើណែនាំ និងធ្វើកិច្ចសន្យានេះ គឺដោយសារតែបុគ្គលរូបនេះ បានប្រើប្រាស់ពាក្យសម្តីអសុរោះ កាយវិការមិនសមរម្យ និងអសីលធម៌ តាមរយៈការបង្ហោះវីដេអូក្នុងបណ្តាញសង្គម កាលពីថ្ងៃទី២២ ខែមេសា ឆ្នាំ២០២៥ កន្លងទៅ ដែលនាំឱ្យមានការមិនពេញចិត្តយ៉ាងខ្លាំងពីសាធារណជន។ ពិសេស ប៉ះពាល់ដល់កិត្តិយស សេចក្តីថ្លៃថ្នូរបស់ស្ត្រី ប្រពៃណីទំនៀមទំលាប់ដ៏ល្អផូរផង់របស់សង្គមខ្មែរ និងធ្វើឱ្យសាធារណជនមានការថ្នាំងថ្នាក់ ក៏ដូចជាប៉ះពាល់ដល់កិច្ចខិតខំប្រឹងប្រែងរបស់រាជរដ្ឋាភិបាល ដែលជានិច្ចកាលតែងតែគិតគូរ និងយកចិត្តទុកដាក់ខ្ពស់លើការលើកកម្ពស់ និងការពារសិទ្ធិស្ត្រីគ្រប់រូបដោយគ្មានការរើសអើង។

ដោយមើលឃើញបញ្ហានេះ លោកជំទាវ ហ៊ូ និរមិត្តា រដ្ឋលេខាធិការក្រសួងកិច្ចការនារី និងក្នុងនាមជាប្រធានលេខាធិការដ្ឋាន នៃគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ បានបើកកិច្ចប្រជុំដោយមានការអញ្ជើញចូលរួមទាំងតំណាងសហគមអ្នកស្រឡាញ់ភេទដូចគ្នា ពិភាក្សាលើទង្វើបុគ្គលរូបនោះ និងឈានដល់អញ្ជើញឈ្មោះ រិះ សៀវហុង មកផ្តល់ការណែនាំ និងធ្វើកិច្ចសន្យាសុំទោសជាសាធារណៈ។

តាមលិខិតសុំទោសជាសាធារណៈ ឈ្មោះ រិះ សៀវហុង ម្ចាស់គណនីហ្វេសប៊ុក You Ri បានសម្តែងការដឹងខុស និងធ្វើការសុំទោសជាសាធារណៈ ដោយសន្យាថានឹងបញ្ឈប់នូវរាល់ការប្រើប្រាស់ពាក្យសម្តីអសុរោះ កាយវិការមិនសមរម្យ អសីលធម៌ ដែលប៉ះពាល់ដល់សីលធម៌សង្គម តម្លៃនិងសេចក្ដីថ្លៃថ្នូរបស់ស្ត្រីខ្មែរ ចាប់ពីពេលនេះទៅ។

ជាមួយគ្នានេះ ដើម្បីរក្សាភាពថ្នៃថ្នូរក្នុងសង្គម លេខាធិការដ្ឋានបានអំពាវនាវដល់សាធារណជនគ្រប់រូប បញ្ឈប់នូវការបង្ហោះមាតិកាដែលមានភាពអវិជ្ជមានដល់សង្គម ក៏ដូចជាបញ្ឈប់ការរើសអើង ការមើលងាយ និងការប្រើប្រាស់អំពើហិង្សាគ្រប់ទម្រង់ ចំពោះសហគមអ្នកស្រឡាញ់ភេទដូចគ្នា រាប់បញ្ចូលទាំងស្រ្តីប្តូរយេនឌ័រ (ស្រ្តីភេទទី៣) ដែលជាជនងាយរងគ្រោះ ដើម្បីអាចរស់នៅក្នុងសង្គមប្រកបដោយភាពសុខសាន្តទាំងអស់គ្នា។ ក្នុងនោះ លោកជំទាវ ហ៊ុន សុីណាត ក៏ដូចជាមហាជន បានបង្ហាញការគាំទ្រចំពោះចំណាត់ការនេះផងដែរ៕