ប៉ូលិសក្រុងភ្នំពេញ៖ ការសម្តែង«នារីម្នាក់ស្រាតគ្រវីលីអូ សុំឡានគេជិះ…» គឺអសីលធម៌ និងខ្វះការពិចារណា

ក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃព្រហស្បតិ៍នេះ បានចេញមកប្រតិកម្ម និងបកស្រាយចំពោះការសម្តែងមួយដែលនារីវ័យក្មេងម្នាក់អមដោយមិត្តភក្តិម្នាក់ទៀត ស្រាតក្រវីលីអូ សុំឡានបុរសម្នាក់ជិះ។ ក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានីភ្នំពេញ បានចាត់ទុកការសម្តែងនេះថា អសីលធម៌ និងខ្វះការពិចារណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានីភ្នំពេញ បានសរសេរនៅទំព័រហ្វេសប៊ុកថា បន្ទាប់ពីបានឃើញគណនីផេកហ្វេសបុកមួយដែលមានឈ្មោះថា KHEM YANG Online បានផុសឃ្លីបវីដេអូចំណងជើងថា «សុំចូលអង្គុយក្នុងឡានផងបានអត់? ស្រីស្អាតសុំ….» នៅលើបណ្តាញសង្គមហ្វេស​បុក ទាក់ទងទៅនឹងសកម្មភាពសម្តែងអសីលធម៌។ ក្រុមការងារជំនាញនៃស្នងការដ្ឋាននគរបាលរាជធានីភ្នំពេញ បានធ្វើការស្រាវជ្រាវលើករណីនេះ ហើយជាលទ្ធផលក្រុមការងារ បានរកឃើញថា ទាំងម្ចាស់គណនីហ្វេសបុក ទាំងអ្នកសម្តែងក្នុងសកម្មភាពនេះ គឺកំពុងរស់នៅក្នុងប្រទេសថៃ។

ទោះបីជាយ៉ាងណាក៏ដោយ ក្រុមការងារព័ត៌មាន និងប្រតិកម្មហ័សនៃស្នងការដ្ឋាននគរបាលរាជធានីភ្នំពេញ ហៅការសម្តែងនេះថា ជាការខ្វះការគិតពិចារណា អសីលធម៌ ដែលធ្វើឲ្យប៉ះពាល់សេចក្តីថ្លៃថ្នូរ និងតម្លៃរបស់ស្ត្រីខ្មែរ។​ មិនតែប៉ុណ្ណោះ ក្រុមការងារប៉ូលីសក្រុងភ្នំពេញ បានទាក់ទងទៅម្ចាស់គណនី ហើយម្ចាស់គណនីនោះ ក៏បានឯកភាពលុបឃ្លីបវីដេអូនេះចេញ ថែមទាំងនឹងធ្វើវីដេអូសុំទោសជាសាធារណ:នូវកំហុសរបស់ខ្លួន ហើយផុសក្នុងគណនីផេកហ្វេសបុករបស់ខ្លួនផងដែរ៕

ដោយ៖ វណ្ណ​ សុគន្ធា