ព័ត៌មានអន្ដរជាតិ

ហ្សេលេនស្គី៖ មីស៊ីលដែលរុស្ស៊ីប្រើបាញ់ស្រោចលើក្រុងកៀវ គឺជារបស់កូរ៉េខាងជើង

បានផុស

១ year មុន

នៅ

ថ្ងៃសុក្រ ២៥ មេសា ២០២៥

ដោយ

Chheang

មីស៊ីលដែលប្រើអំឡុងការវាយប្រហារតាមអាកាសទ្រង់ទ្រាយធំរបស់រុស្ស៊ីលើរដ្ឋធានីកៀវរបស់អ៊ុយក្រែនកាលពីយប់ថ្ងៃព្រហស្បតិ៍ទី២៤ខែមេសា គឺជាមីស៊ីលបាលិស្ទិក KN-23 (KN-23A) របស់កូរ៉េខាងជើង។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃសុក្រនេះ។

លោក វ៉ូឡូឌីមៀរ ហ្សេលេនស្គី (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានប្រកាសនៅលើបណ្ដាញសង្គម X ថា៖ «យោងតាមព័ត៌មានបឋម រុស្ស៊ីបានប្រើប្រាស់មីស៊ីលបាលិស្ទិកដែលផលិតនៅក្នុងប្រទេសកូរ៉េខាងជើង។ ទីភ្នាក់ងារពិសេសរបស់យើងកំពុងផ្ទៀងផ្ទាត់ព័ត៌មានលម្អិតទាំងអស់»។

ពាក់ព័ន្ធនឹងរឿងនេះ រុស្ស៊ីមិនបានធ្វើអត្ថាធិប្បាយលើការលើកឡើងរបស់លោក ហ្សេលេនស្គី ទេ។ ប៉ុន្តែកន្លងមក រុស្ស៊ី និងកូរ៉េខាងជើង តែងបដិសេធការផ្ទេរអាវុធគ្នា ដែលនឹងបំពានលើការហាមឃាត់របស់អង្គការសហប្រជាជាតិ។

ចារកម្មអ៊ុយក្រែន បានបញ្ជាក់ថា ទីក្រុងព្យុងយ៉ាងបានបញ្ជូនមីស៊ីលបាលិស្ទិក KN-23 និង KN-24 ចំនួន ១៤៨គ្រាប់ទៅកាន់ប្រទេសរុស្ស៊ីគិតត្រឹមដើមឆ្នាំ២០២៥។

ប្រភពពីយោធាអ៊ុយក្រែន បានឲ្យដឹងថា មីស៊ីល KN-23 (KN-23A) ទាំងនោះអាចបំពាក់ក្បាលគ្រាប់ទម្ងន់រហូតដល់មួយតោន ដែលខ្លាំងជាងមីស៊ីលប្រភេទដូចគ្នារបស់រុស្ស៊ីទៅទៀត។

សូមបញ្ជាក់ថា ការវាយប្រហាររបស់រុស្ស៊ីទៅលើក្រុងកៀវ បានឆក់យកជីវិតមនុស្សអស់ ១២នាក់ និងធ្វើឲ្យ ៩០នាក់រងរបួស។ ក្នុងចំណោមអ្នករងរបួសមានក្មេង១២នាក់អាយុពី១ឆ្នាំកន្លះដល់១៨ឆ្នាំ៕