ព័ត៌មានជាតិ

សេវាទាក់ទាញទេសចរថ្មី! ម្នាក់ ២ ម៉ឺនរៀល ជិះបាន ២ ម៉ោង ជិះទូកកម្សាន្តគយគន់ទេសភាពតាមដងស្ទឹងសង្កែ

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

តាមដងស្ទឹងសង្កែ នឹងមានសកម្មភាពកាន់តែរស់រវើកទាក់ទាញកំណើនទេសចរ ក្រោយសេវាជិះទូកកម្សាន្តតាមដងស្តឹងសង្កែ បានបើកដំណើរការដែលនឹងផ្តល់បទពិសោធន៍បន្ថែមដល់ទេសចរដែលធ្វើដំណើរមកកម្សាន្តក្រុងបាត់ដំបង។

ដើម្បីជំរុញសកម្មភាពទេសចរមកកម្សាន្តនៅក្នុងក្រុងបាត់ដំបង កាលពីពេលថ្មីៗនេះ រដ្ឋបាលខេត្តបាត់ដំបងបានអនុញ្ញាតឲ្យវិស័យឯកជនបង្កើតទីតាំងជិះទូកកម្សាន្តតាមដងស្ទឹងសង្កែ ដែលជាផ្នែកមួយជួយទាញភ្ញៀវមកលេងកម្សាន្តលើទឹកដីខេត្តបាត់ដំបងឲ្យកាន់តែកំណើនថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ឌី ចំរើន ម្ចាស់ទីតាំងចំណតទូកតាមដងស្ទឹងសង្កែបានឲ្យដឹងថា សេវាជិះទូកកម្សាន្តទើបចាប់ផ្តើមដំណើរការសាកល្បងនៅមុនចូលឆ្នាំតែប៉ុន្មានថ្ងៃប៉ុណ្ណោះ ក្រោយមានការអនុញ្ញាតពីរដ្ឋបាលខេត្តជាផ្លូវការ ដែលមានទីតាំងនៅទល់មុខសាលាសោហឺ ក្នុងសង្កាត់ស្វាយប៉ោ ក្រុងបាត់ដំបង មានចម្ងាយប្រហែល ២០០ ម៉ែត្រពីស្ពានថ្មថ្មី។

ម្ចាស់ទីតាំងរូបនេះបានបញ្ជាក់ថា សេវាជិះទូកកម្សាន្តតាមដងស្ទឹងសង្កែផ្តល់ជូនភ្ញៀវដោយធ្វើដំណើរចេញពីចំណតទូក រហូតដល់វត្តបាយដំរាំ ក្នុងឃុំឈើទាល ស្រុកបាណន់ និងប្រើរយះពេលជាង ២ ម៉ោង ដោយភ្ញៀវម្នាក់ចំណាយ ២ មុឺនរៀលក្នុង ១ កៅអី។ ក្រៅពីនេះអ្នកស្រីក៏មានទូកប្រភេទ “កៃយាក់” សម្រាប់ជួលឲ្យភ្ញៀវចែវលេងផងដែរក្នុងនោះទូក ១ តម្លៃ ២ មុឺនរៀលជិះបាន ២ នាក់។

អ្នកស្រីបន្តថា នេះជាផ្នែកមួយលើវិស័យទេសចរណ៍ក្នុងខេត្តបាត់ដំបង ក្រៅពីភ្ញៀវទៅកម្សាន្តតាមគោលដៅទេសចរណ៍នានាក្នុងខេត្ត។

ក្នុងរយះពេលមួយឆ្នាំចុងក្រោយ រដ្ឋបាលខេត្តបាត់ដំបង បានខិតខំកែលម្អជាបន្តបន្ទាប់តាមដងស្ទឹងសង្កែ ដើម្បីលើកកម្ពស់បរិស្ថាន និងប្រែក្លាយជាគោលដៅទេសចរណ៍ក្នុងក្រុង ខណះទីតាំងខ្លះបានរៀបចំបំពាក់ភ្លើងបំភ្លឺដើម្បីគយគន់ពេលរាត្រីផងដែរ។

បើតាមមន្ត្រីសាលាក្រុងបាត់ដំបងបានឲ្យដឹងថា អាជ្ញាធរខេត្តបានរៀបចំកែលម្អសោភណភាពមានរៀបចំភ្លើងបំភ្លឺតាមគោលដៅទេសចរណ៍ចំនួន ២ សំខាន់ៗ នោះគឺវិមានឯករាជ្យ និងសួនកម្សាន្តតេជោសន្តិភាពស្ថិតនៅត្រើយខាងកើតនៃដងស្ទឹងសង្កែ។

បើទោះយ៉ាងណា ប្រជាពលរដ្ឋបានលើកឡើងថា នេះជាការល្អប្រសើរណាស់សម្រាប់ខេត្តបាត់ដំបង ដែលបង្កើតសមិទ្ធផលថ្មីៗសម្រាប់លើកមុខមាត់ខេត្ត។ ប៉ុន្តែទន្ទឹមនេះ អាជ្ញាធរខេត្តគួរពិនិត្យមើលតាមដងស្ទឹងបន្ថែមទៀត និងជួយទប់ស្កាត់ការបញ្ចេញកាកសំណល់ ឬបង្ហូរទឹកកង្វក់ដែលមានសារធាតុពុលជាដើម។

ក្នុងវ័យជាង ៦៤ ឆ្នាំ អ្នកស្រី មុំ រស់នៅក្នុងសង្កាត់ស្លាកែត ក្រុងបាត់បាត់ដំបងបានលើកឡើងថា កាលពីមុន ទឹកស្ទឹងសង្កែ មានពណ៌ថ្លាឃើញបាតដីនៅរដូវទឹកសម្រក ខណៈអ្នកស្រីនិងអ្នកភូមិចុះងួតទឹកលេងរាល់ពេលល្ងាច ហើយក្នុងស្ទឹងក៏គ្មានកាកសំណល់នោះដែរ។ តែបច្ចុប្បន្នអ្នកស្រីមិនហ៊ានងួតទឹកលេងទៀតទេ មើលទៅគួរឲ្យខ្ពើម បើអាជ្ញាមិនគិតគួរសំអាតទេ សម្រាប់អ្នកប្រើប្រាស់ទឹកអាចនឹងប្រឈមសុខភាពជាមិនខាន៕

អត្ថបទ÷សៅ សារិទ្ធ