ប្រទេស​ចំនួន​បី គំរាម​ដាក់ទណ្ឌកម្ម បើកិច្ចព្រមព្រៀងនុយក្លេអ៊ែរអ៊ីរ៉ង់​បរាជ័យ

ប្រទេសបារាំង រួមជាមួយប្រទេសអាល្លឺម៉ង់ និងចក្រភពអង់គ្លេស បានចេញការព្រមានយ៉ាងម៉ឺងម៉ាត់ថា ទណ្ឌកម្មដែលត្រូវបានដកចេញក្រោមកិច្ចព្រមព្រៀងនុយក្លេអ៊ែរឆ្នាំ​២០១៥ អាច​នឹង​ត្រូវបានស្តារឡើងវិញ បើអ៊ីរ៉ង់បរាជ័យក្នុងការសម្រេចបានកិច្ចព្រមព្រៀងថ្មី ហើយសកម្មភាពនុយក្លេអ៊ែររបស់ខ្លួនគំរាមកំហែងដល់សន្តិសុខអឺរ៉ុប។ នេះ​បើ​យោង​តាម​ការ​លើក​ឡើង​របស់​លោក Jean Noel Barrot រដ្ឋមន្ត្រី​ការបទេស​បារាំង អំឡុង​សុន្ទរកថា​នៅ​អង្គការ​សហ​ប្រជាជាតិ​​នា​ថ្ងៃ​ទី​២៩​ខែ​មេសា​ឆ្នាំ​២០២៥។

លោក Barrot បាន​លើក​ឡើង​ថា៖ «អ៊ីរ៉ង់បានឆ្លង​ហួស​​បន្ទាត់​​ព្រំដែន​​ទាំង​ឡាយ​ដែលខ្លួនធ្លាប់​សន្យា​គោរព​តាម ហើយប្រទេសនេះជិតឈានដល់ការទទួលបានអាវុធនុយក្លេអ៊ែរហើយ»។

លោកបានបន្ថែមថា៖ «ប្រសិនបើផលប្រយោជន៍សន្តិសុខអឺរ៉ុប​មិនត្រូវបានធានា នោះយើងនឹងមិនស្ទាក់ស្ទើរ​សូម្បី​តែមួយវិនាទីដើម្បីអនុវត្តឡើងវិញនូវទណ្ឌកម្មទាំងអស់ដែលត្រូវបានដកចេញកាលពី​១០​ឆ្នាំមុន»។

រដ្ឋមន្ត្រី​បារាំង បាន​សង្កត់​ធ្ងន់​ថា ការ​ដាក់​ទណ្ឌកម្ម​ឡើង​​វិញ នឹង​ជះ​ឥទ្ធិពលបំផ្លិចបំផ្លាញ​ខ្លាំង​ដល់សេដ្ឋកិច្ច​​អ៊ីរ៉ង់ ដោយ​​បញ្ជាក់​ថា៖ «នេះមិនមែនជាអ្វីដែលយើងចង់បានទេ ហើយនោះជាមូលហេតុដែលខ្ញុំអំពាវនាវយ៉ាង​ម៉ឺងម៉ាត់​​ឲ្យ​អ៊ីរ៉ង់ធ្វើការសម្រេចចិត្តចាំបាច់នៅថ្ងៃនេះ ដើម្បីជៀសវាង​ផល​អាក្រក់បំផុត»។

អ៊ីរ៉ង់ បានស្នើ​ឲ្យ​មានកិច្ចប្រជុំជាមួយភាគីអឺរ៉ុបដែលពាក់ព័ន្ធនឹងកិច្ចព្រមព្រៀងនុយក្លេអ៊ែរឆ្នាំ​២០១៥ ដូចជា អង់គ្លេស បារាំង និងអាល្លឺម៉ង់ នៅទីក្រុងរ៉ូមនា​ថ្ងៃសុក្រ​សប្ដាហ៍​នេះ មុនពេលកិច្ចពិភាក្សា​​បន្ថែមទៀតជាមួយសហរដ្ឋអាមេរិក។ គំនិតផ្តួចផ្តើមនេះ ធ្វើឡើងបន្ទាប់ពីការចរចានាពេលថ្មីៗនេះជាមួយ​អាមេរិកនៅប្រទេសអូម៉ង់ និងការពិភាក្សាជាមួយរុស្ស៊ី និងចិន។ អ៊ីរ៉ង់ មានបំណងវាស់ស្ទង់ជំហររបស់អឺរ៉ុបលើការដាក់ទណ្ឌកម្មរបស់អង្គការសហប្រជាជាតិឡើងវិញដែលអាចកើតមានក្នុងខែតុលា នៅពេលដែល​​កិច្ចព្រមព្រៀងឆ្នាំ២០១៥​ផុតកំណត់។

យ៉ាង​ណា​មិញ ភាគីអ៊ឺរ៉ុប មិនទាន់ឆ្លើយតបនឹងសំណើកិច្ចប្រជុំនេះទេ ទោះបីជាពួកគេកំពុងវាយតម្លៃថាតើត្រូវចូលរួមនៅពេលនេះ ឬរង់ចាំការវិវឌ្ឍ​បន្ថែមទៀតនៅក្នុងកិច្ចចរចារវាងសហរដ្ឋអាមេរិក និងអ៊ីរ៉ង់ក៏ដោយ។

ខណៈពេលដែលអ៊ីរ៉ង់អះអាងថា កម្មវិធីនុយក្លេអ៊ែររបស់ខ្លួនគឺសម្រាប់គោលបំណងស៊ីវិល ទីភ្នាក់ងារថាមពលអាតូមិកអន្តរជាតិបានរាយការណ៍ពីភាពជឿនលឿនដ៏សំខាន់ក្នុងការចម្រាញ់សារធាតុអ៊ុយរ៉ាញ៉ូម ដែលបង្កើនការព្រួយបារម្ភក្នុងចំណោមប្រទេសលោកខាងលិច។ យោង​តាម​ទីភ្នាក់ងារថាមពលអាតូមិកអន្តរជាតិ អ៊ីរ៉ង់​មាន​អ៊ុយរ៉ាញ៉ូម​ដែល​បន្សុទ្ធ​រួច​ដល់ទៅ​កម្រិត ៦០% ជិតដល់​កម្រិត ៩០% ដែលត្រូវការសម្រាប់ការផលិតសព្វាវុធ​ប្រល័យ​លោក។

សូម​បញ្ជាក់​ថា កិច្ចព្រមព្រៀង​នុយក្លេអ៊ែរ​ឆ្នាំ២០១៥​ JCPOA (Joint Comprehensive Plan of Action) របស់​អ៊ីរ៉ង់ ត្រូវ​​បាន​ធ្វើ​ឡើង​ជាមួយ​មហា​អំណាច​​ពិភពលោក​ចំនួន​៦ មាន​ដូចជា ​អាមេរិក អង់គ្លេស បារាំង ចិន រុស្ស៊ី និង​អាល្លឺម៉ង់។ អ៊ីរ៉ង់បានយល់ព្រមកំណត់​កម្រិត​សកម្មភាពនុយក្លេអ៊ែររបស់ខ្លួន និងអនុញ្ញាត​​ឲ្យ​មានការត្រួតពិនិត្យអន្តរជាតិដ៏រឹងមាំជាថ្នូរនឹងការបន្ធូរបន្ថយទណ្ឌកម្ម។

យ៉ាង​ណា​មិញ ​​អាមេរិកដកខ្លួន​ពី​កិច្ច​ព្រមព្រៀង​ជា​ឯកតោភាគី​នៅឆ្នាំ​២០១៨ ក្រោមការដឹកនាំរបស់លោកប្រធានាធិបតី ដូណាល់ ត្រាំ ដោយបាន​អនុវត្ត​ទណ្ឌកម្មធ្ងន់ធ្ងរឡើងវិញ​លើ​ទីក្រុង​តេហេរ៉ង់ និង​​ចាត់​ទុក​វាថាជា «កិច្ចព្រមព្រៀងដ៏អាក្រក់បំផុតមិនធ្លាប់មាន»៕​

ដោយ៖ ឈាង

ចុចអាន៖ លោក ណេតាន់យ៉ាហ៊ូ ទាមទារ​ឲ្យ​រុះរើ​កម្មវិធី​នុយក្លេអ៊ែរ​អ៊ីរ៉ង់​ទាំងស្រុង