កម្ពុជានាំចេញផ្លែមៀន ១ ម៉ឺន ៦ ពាន់តោន នៅត្រីមាសទី១

នៅក្នុងត្រីមាសទី១ ឆ្នាំ ២០២៥ កម្ពុជានាំចេញផ្លែមៀនប៉ៃលិន សម្រេចបានជិត ១ ម៉ឺន ៦ ពាន់តោន កើនឡើង ៣៦,១៧% ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាម​របាយ​ការណ៍របស់ក្រសួង កសិកម្ម រុក្ខាប្រមាញ់ និងនេសាទ។

លោក ឆន សុខជា ម្ចាស់ចម្ការមៀនប៉ៃលិន នៅឃុំម៉ាឡៃ ស្រុកម៉ាឡៃ ខេត្តបន្ទាយមានជ័យបាន​ឱ្យដឹងថា តម្លៃផ្លែ​មៀន​លក់​ឱ្យ​ក្រុម​ហ៊ុន​​ចិនដែលនាំចេញបាន តម្លៃ ៣ ៥០០ រៀល ក្នុងមួយ​គីឡូ​ក្រាមចាប់ពីដើមឆ្នាំ ២០២៥។

លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិនប្រាប់​កម្ពុជាថ្មីថា ក្រុមហ៊ុននាំចេញផ្លែមៀន​ប៉ៃលិន ទិញផ្លែមៀនពីកសិករក្នុងតម្លៃ ៣០០០ រៀល ក្នុងមួយ​គីឡូ​ក្រាម​ ខណៈការនាំចេញទៅចិនមានកំណើន។

លោក​ សួន ជុំ អនុប្រធានសមាគមមៀនប៉ៃលិនបានលើកឡើងថា តម្លៃ ៣០០០ រៀល ក្នុងមួយ​គីឡូ​ក្រាម អាចទទួល​យកបាន ប្រសិនបើកសិករចេះថែទាំមៀនត្រូវតាមក្បួនខ្នាត​បច្ចេកទេសនោះ​គឺ​កសិករ​នឹងអាចចំណេញ។

យោងតាមក្រសួងពាណិជ្ជកម្ម នៅ ឆ្នាំ ២០២៤ កម្ពុជានាំចេញផ្លែមៀនសម្រេច​បាននូវទំហំទឹក​ប្រាក់ប្រមាណ ២៨ លានដុល្លារ ពីការនាំចេញផ្លែមៀនស្រស់ កើនឡើងជាង ៥០% ធៀបនឹងឆ្នាំ ២០២៣៕ 

អត្ថបទ៖ ឡេង ដេត