ព័ត៌មានអន្ដរជាតិ

ចារកម្មកូរ៉េខាងត្បូង៖ ទាហានកូរ៉េខាងជើងដែលចេញច្បាំងឲ្យរុស្ស៊ី ស្លាប់៦០០នាក់

បានផុស

១ year មុន

នៅ

ថ្ងៃពុធ ៣០ មេសា ២០២៥

ដោយ

Chheang

ទីភ្នាក់ងារស៊ើបការណ៍សម្ងាត់ជាតិរបស់កូរ៉េខាងត្បូង (NIS) បានរាយការណ៍ថា ទាហានកូរ៉េខាងជើងប្រមាណ ៦០០នាក់ត្រូវបានសម្លាប់ ខណៈកំពុងជួយប្រយុទ្ធឲ្យរុស្ស៊ីប្រឆាំងនឹងប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មាននេះ ត្រូវបានបង្ហាញក្នុងអំឡុងពេលសន្និសីទបិទទ្វារទៅកាន់សមាជិកសភាកូរ៉េខាងត្បូងនៅថ្ងៃទី៣០ខែមេសាឆ្នាំ២០២៥នេះ។ លោក Lee Seong-kweun សមាជិកនៃគណៈកម្មាធិការស៊ើបការណ៍សម្ងាត់របស់សភា បានប្រាប់អ្នកយកព័ត៌មានថា៖ «រហូតមកដល់ពេលនេះ ការស្លាប់និងរបួសនៃទាហានកូរ៉េខាងជើងត្រូវបានគេប៉ាន់ប្រមាណថាមានប្រហែល ៤ ៧០០នាក់ រួមទាំងអ្នកស្លាប់ប្រហែល ៦០០នាក់»។

លោក Lee បានបញ្ជាក់ទៀតថា កូរ៉េខាងជើងបានដាក់ពង្រាយកងកម្លាំងខ្លួនប្រមាណ ១៨ ០០០នាក់ជួយរុស្ស៊ី ដោយចែកចេញជាពីរដំណាក់កាល ហើយក្រោយរយៈពេល៦ខែក្នុងសមរភូមិ កងកម្លាំងកូរ៉េខាងជើងបានបង្កើនសមត្ថភាពប្រយុទ្ធរបស់ខ្លួនគួរឲ្យកត់សម្គាល់ ពោលគឺកាន់តែមានជំនាញក្នុងការប្រើប្រាស់ប្រព័ន្ធសព្វាវុធថ្មី រួមទាំងយន្តហោះគ្មានមនុស្សបើកផងដែរ។

គួររឭកថា កូរ៉េខាងជើងបានបញ្ជាក់ជាផ្លូវការនូវការចូលរួមផ្នែកយោធារបស់ខ្លួននៅក្នុងសង្គ្រាមរុស្ស៊ី-អ៊ុយក្រែនកាលពីដើមសប្តាហ៍នេះ ដោយប្រាប់ថា កងទ័ពខ្លួនត្រូវបានដាក់ពង្រាយដើម្បីជួយរុស្ស៊ីក្នុងការដណ្តើមយកតំបន់ Kursk មកវិញ។ ការដាក់ពង្រាយនេះ គឺជាផ្នែកមួយនៃសន្ធិសញ្ញាការពារគ្នាទៅវិញទៅមកឆ្នាំ២០២៤ រវាងកូរ៉េខាងជើង និងរុស្ស៊ី ក្នុងអំឡុងពេលមានជម្លោះជាមួយសត្រូវ។

បន្ថែមពីលើការគាំទ្រផ្នែកយោធា ចារកម្មកូរ៉េខាងត្បូងបានលើកឡើងថា កូរ៉េខាងជើងបានផ្គត់ផ្គង់ដល់រុស្ស៊ីនូវសព្វាវុធ យន្តហោះគ្មានមនុស្សបើក និងបច្ចេកវិទ្យាផ្កាយរណប ដើម្បីជាថ្នូរនឹងជំនួយសេដ្ឋកិច្ច និងឧបករណ៍យោធាទំនើបៗ៕

ដោយ៖ ឈាង

ចុចអាន៖ អន្តរជាតិប្រតិកម្មខ្លាំងៗ ក្រោយកូរ៉េខាងជើង ទទួលស្គាល់ បញ្ជូនទ័ពទៅជួយច្បាំងរុស្ស៊ី