ទិន្នផលទុរេនទឹកឈូឆ្នាំនេះល្អជាងឆ្នាំមុន និងមានទីផ្សារល្អ

តាមការលើកឡើងរបស់ប្រជាកសិករអ្នកដាំទុរេនក្នុងឃុំម៉ាក់ប្រាង្គ ស្រុកទឹកឈូ ខេត្តកំពត បានឲ្យដឹងថា ទិន្នផលទុរេនទឹកឈូឆ្នាំនេះល្អជាងឆ្នាំមុនៗ រសជាតិក៏ឆ្ងាញ់ ហើយក៏មានទីផ្សារល្អផងដែរ។ បើតាមកសិករ ចាប់តាំងពីពិធីបុណ្យចូលឆ្នាំខ្មែរមកដល់ពេលនេះ ប្រជាកសិករបាននិងកំពុងប្រមូលផលទុរេនយ៉ាងពេញបន្ទុកគ្រប់ចម្ការ ដោយទទួលបានទិន្នផលខ្ពស់ជាងឆ្នាំមុនៗ ខណៈតម្លៃលើទីផ្សារក៏បានខ្ពស់ជាងមុន។

បើតាមការលើកឡើងរបស់កសិករ ការទទួលបានតម្លៃខ្ពស់បែបនេះ ក៏ដោយសារតែអាជ្ញាធរឃុំ ស្រុក បានស្នើឲ្យអាជីវករ​លក់តែទុរេនក្នុងខេត្ត និងក្នុងតំបន់របស់ខ្លួន ចៀសវាងការយកទុរេននាំចូលពីប្រទេសជិតខាងមកបន្លំអតិថិជនដែលធ្វើឲ្យបាត់ទំនុកចិត្ត និងខូចកិត្តិស័ព្ទទុរេនខេត្តកំពត។

ម្ចាស់ចម្ការ និងជាអាជីវករលក់ទុរេននៅតាមផ្លូវទៅរមណីយដ្ឋានទឹកឈូ ដែលមានយីហោ តាន់ ម៉ាប់ បានបញ្ជាក់ថា គាត់លក់ទុរេនពេញមួយឆ្នាំតែម្តង គាត់មានអតិថិជនច្រើន ហើយភ្ញៀវទេសចរក៏មានភាពជឿជាក់ និងជួយគាំទ្រទិញទុរេនគាត់ច្រើនដែរ ហើយមិនសូវសូញសាញ់រឿងតម្លៃនោះទេ ព្រោះគាត់លក់តែទុរេនក្នុងតំបន់។

ស្មៀនឃុំម៉ាក់ប្រាង្គ លោក ធាន លី បានបញ្ជាក់ដែរថា ដោយមានការណែនាំពីលោក អ៊ឹម ច័ន្ទសោធន អភិបាលស្រុកទឹកឈូ អាជ្ញាធរឃុំតែងតែចុះណែនាំដល់ប្រជាពលរដ្ឋជាអ្នកដាំ អាជីវករ សូមឲ្យរក្សាភាពស្មោះត្រង់ កុំយកទុរេនពីប្រទេសជិតខាងមកបន្លំលក់ឲ្យភ្ញៀវ ព្រោះវាធ្វើឲ្យប៉ះពាល់ដល់កិត្តិស័ព្ទរបស់ទុរេនកំពត ពិសេសអាជ្ញាធរតែងតែលើកទឹកចិត្តឲ្យអាជីវករនៅតាមផ្លូវទៅទឹកឈូ លក់តែទុរេនទឹកឈូបានហើយ។ លោកបានបញ្ជាក់ដែរថា ទុរេនទឹកឈូផ្លែធំល្អ និងមានរសជាតិឈ្ងុយឆ្ងាញ់ជាងគេនៅក្នុងខេត្ត។

លោក ធាន លី បន្ថែមថា ទុរេនដែលមានផ្លែពណ៌ប្រផេះភាគច្រើនដាំតាមតំបន់ជើងភ្នំ និងពណ៌ខៀវ ភាគច្រើនដាំនៅតាមបន់ក្បែរមាត់ព្រែក ឬមាត់ជ្រោះ៕

អត្ថបទ៖ សឹង រ៉ាត់