តើ​អ្នកដឹងទេថា ប្រទេសអាស៊ីអាគ្នេយ៍ណាខ្លះ​មានដាំដុះ​ទុរេន និងល្បីល្បាញ​ជាងគេ​?​

នៅពេលនិយាយអំពីទុរេន ជារឿយៗត្រូវបានគេសរសើរថា វា​ជា«ស្តេចនៃផ្លែឈើ» ដោយសារតែទំហំធំ ក្លិនក្រហូប និងរសជាតិប្លែករបស់វាដែល​មាន​ដើម​កំណើត​នៅ​អាស៊ីអាគ្នេយ៍។ បច្ចុប្បន្នទុរេនក្លាយជាផ្លែឈើដ៏ពេញនៅអាស៊ីអាគ្មេយ៍និងមានតម្លៃ​ទីផ្សារខ្ពស់ក្នុងប្រទេសនៅអាស៊ីជាពិសេសនាំចេញទៅប្រទេសចិន។

បើយោងតាមការចេញផ្សាយរបស់ VN Express ប្រទេសម៉ាឡេស៊ីគឺជាប្រទេសដែលមានភាពល្បីល្បាញ​ជាង​គេ​និង​ជាយូរ​មកហើយ ចំពោះការដាំដុះពូជទុរេនដែលមានរសជាតិឆ្ងាញ់ និងពេញនិយមបំផុត ជាពិសេសគឺពូជទុរេន Musang King ដែលបានជាប់ចំណាត់ថ្នាក់ទី១៩ ក្នុងបញ្ជីផ្លែឈើដែលមានចំណាត់ថ្នាក់ល្អបំផុតចំនួន ២៦ នៅអាស៊ីអាគ្នេយ៍តាមរយៈបោះឆ្នោតដោយអ្នកអានទស្សនាវដ្តីអាហារអន្តរជាតិ TasteAtlas ។

មកដឹងថាតើប្រទេសណាខ្លួះដែលមានទុរេនរសជាតិឆ្ងាញ់និងមានទុរេនប្រភេទអ្វីខ្លះនៅអាស៊ីអាគ្នេយ៍

១. ប្រទេសម៉ាឡេស៊ី

​ពូជទុរេន Musang King ដែលត្រូវបានគេហៅ​ក្រៅ​និង​ស្គាល់​ថា Mao Shan Wang ឬ D197 គឺជាពូជទុរេនលំដាប់ថ្នាក់ខ្ពស់មានប្រភពមកពីប្រទេសម៉ាឡេស៊ី។ សាច់​ផ្លែ​ទុរេន​នេះមាន​ពណ៌​លឿងឆ្អិនឆ្អៅ ហើយ​ក្លិនវា​ក្រអូប​​ឈួល​ធ្វើឲ្យគេទាក់ទាញ​​ចិត្តអ្នកបរិភោគ​មែនទែន​។ ទុរេន Musang King ត្រូវបានដាំដុះភាគច្រើននៅក្នុងរដ្ឋ Pahang របស់ប្រទេសម៉ាឡេស៊ី ជាមួយនឹងការប្រមូលផលច្រើនបំផុតចាប់ពីខែមិថុនាដល់ខែសីហា។ ដោយសារគុណភាពពិសេស និងការមានកំណត់ Musang King ត្រូវបានបញ្ជាទិញក្នុងតម្លៃពិសេស និងទទួលបានការសាទរជាអន្តរជាតិ ជាពិសេសនៅក្នុងទីផ្សារដូចជាប្រទេសចិន និងសិង្ហបុរី។

២.ប្រទេសថៃ

ប្រទេស​ថៃ​ជា​ប្រទេស​ផលិត​ទុរេន​ដ៏​លេចធ្លោ​មួយ​ទៀត ដោយ​ពូជ​ទុរេន Monthong​មាន​លក្ខណៈ​ពាណិជ្ជកម្ម​ខ្លាំង​ជាង​គេ។ ទុរេន Monthong មាន ទំហំធំ សាច់ពណ៌លឿងស្លេក និងរសជាតិផ្អែមស្រាល។ ពួកវាមានក្លិនឈ្ងុយតិចជាងបើធៀបនឹង Musang King ។ ផ្លែទុរេនប្រភេទនេះត្រូវបានដាំដុះយ៉ាងទូលំទូលាយនៅក្នុងខេត្ត Chantaburi របស់ប្រទេសថៃ និងជាខេត្តដែលតែងរៀបចំពិធីបុណ្យទុរេនពិភពលោកប្រចាំឆ្នាំ។

៣. ប្រទេសឥណ្ឌូណេស៊ី

ប្រទេសឥណ្ឌូណេស៊ីគឺជាជម្រកនៃពូជទុរេនក្នុងស្រុករាប់រយប្រភេទ ជាពិសេសនៅក្នុងតំបន់ដូចជា Sumatra, Kalimantan និង Sulawesi ។ ខណៈពេលដែលឥណ្ឌូណេស៊ីមិនមានពូជលេចធ្លោជាអន្តរជាតិដូចជា Musang King របស់ម៉ាឡេស៊ី ឬ Monthong របស់ថៃ ឥណ្ឌូនេស៊ីត្រូវបានកោតសរសើរចំពោះ ទុរេន​ព្រៃ​ដែលមាន​រសជាតិ​ពិសេស​ប្លែក​ និងពូជទុរេន​ដ៏​កម្រ​ដូច​ជា ទុរេន Merah (សាច់​ក្រហម) ពី​ខេត្ត​ជ្វា​ខាង​កើត។

៤.ប្រទេសហ្វីលីពីន

ប្រទេសហ្វីលីពីន ជាពិសេសតំបន់ជុំវិញទីក្រុង Davao នៅលើកោះ Mindanao មានកេរ្តិ៍ឈ្មោះកាន់តែខ្លាំងឡើងចំពោះផ្លែទុរេនគុណភាពខ្ពស់។ ពូជទុរេនក្នុងស្រុកពេញនិយមរួមមានPuyat, Arancillo និងDuyaya។ ទោះបីទុរេនហ្វីលីពីនមិនទាន់ល្បីជាអន្តរជាតិដូចពូជម៉ាឡេស៊ី ឬថៃ ប៉ុន្តែត្រូវបានកោតសរសើរកាន់តែខ្លាំងឡើងចំពោះរសជាតិផ្អែម និងតម្លៃសមរម្យសម្រាប់អ្នកក្នុងស្រុក។

៥.ប្រទេសវៀតណាម

ប្រទេសវៀតណាមបានលេចមុខយ៉ាងឆាប់រហ័សក្នុងនាមជាប្រទេសផលិតទុរេនដ៏សំខាន់ ជាពិសេសនៅតំបន់ភាគខាងត្បូង តំបន់ខ្ពង់រាបកណ្តាល Dak Lak និង Tien Giang ស្ថិតនៅតំបន់ដីសណ្ដទន្លេមេគង្គ។ ទុរេនដែលពេញនិយមមានដូចជាRi6 និង Monthong​ ដែលជាពូជនាំចូលពីថៃ។ ទុរេនវៀតណាម ជាពិសេស Ri6 កំពុងទទួលបានប្រជាប្រិយភាពនៅក្នុងប្រទេសចិន និងទូទាំងអាស៊ីអាគ្នេយ៍ ដោយសាររសជាតិផ្អែម គុណភាពខ្ពស់ និងបរិមាណនាំចេញកើនឡើង។

៦.ប្រទេសកម្ពុជា

ប្រទេស​កម្ពុជា​មាន​ប្រវត្តិ​ដាំដុះ​ទុរេន​ជា​យូរ​មក​ហើយ ជា​ពិសេស​ខេត្ត​មួយ​ចំនួន​ដូច​ជា កំពត កំពង់ចាម និង​រតនគិរី។ ទោះបី​ទុរេន​កម្ពុជា​មិន​សូវ​មាន​ភាព​លេច​ធ្លោ​នៅ​លើ​ទីផ្សារ​ពិភពលោក​ ប៉ុន្តែត្រូវបានគេស្គាល់ថាមានក្លិនក្រអូប ផ្អែម និងទន់ហើយភាគច្រើនជាពូជក្នុងស្រុក ទោះបីជាពូជថៃ និងវៀតណាមខ្លះក៏មានដាំដុះដែរក៏ដោយ។ បច្ចុប្បន្នទុរេនកម្ពុជាក៏ នាំទៅកាន់ប្រទេសចិនផងដែរតាមរយៈប្រទេសថៃនិងវៀតណាម។ ថ្វីត្បិតតែគុណភាពទុរេនមានភាពខុសប្លែកគ្នាក៏ដោយ ប៉ុន្តែធុរេនកម្ពុជាមានតម្លៃក្នុងតំបន់ និងមានសក្តានុពលដោយសារតំបន់ដីដាំដុះលូតលាស់មានជីជាតិ និងការកើនឡើងនៃការវិនិយោគលើវិស័យកសិកម្មផ្លែឈើ។

ក្រៅពីប្រទេសខាងលើប្រទេសនៅអាស៊ីផ្សេងទៀតដូចជាប្រទេសឡាវនិងស្រីលង្កាក៏មានទុរេនដែលមានរសជាតិឆ្ងាញ់និងល្បីល្បាញក្នុងស្រុកផងដែរ៕

អត្ថបទ៖ ប៊ុន សុភាព