អាមេរិក និងចិន ព្រមគ្នា​ទម្លាក់ពន្ធ​​ក្នុងអត្រារៀងខ្លួនរយៈពេល ៩០ ថ្ងៃ

សហរដ្ឋអាមេរិក និងចិន​ នៅថ្ងៃចន្ទនេះ បាន​ប្រកាសពីការ​ព្រមព្រៀងគ្នាទម្លាក់ពន្ធក្នុងអត្រារៀងៗខ្លួន​ជាបណ្ដោះអាសន្ន​ក្នុងរយៈពេល ៩០ សិន ​​ក្រោយមន្រ្តីជាន់ខ្ពស់ទាំង ២ ជួបប្រជុំចរចាគ្នានៅទីក្រុងហ្សឺណែវ នៃប្រទេសស្វីស កាលពីចុងសប្ដាហ៍។ នេះបើតាមការចុះផ្សាយរបស់សារព័ត៌មាន​ CNN។

ក្នុងសេចក្ដីថ្លែងការណ៍រួមចេញផ្សាយ​នារសៀលម៉ោង ២ នេះ (ម៉ោងនៅទីក្រុងភ្នំពេញ) ពន្ធ​អាមេរិក​ ១៤៥ ភាគរយ លើទំនិញចិន នឹង​ត្រូវទម្លាក់ចុះ ៣០ ភាគរយ ខណៈពន្ធចិន ១២៥ ភាគរយ លើទំនិញអាមេរិក នឹងទម្លាក់ចុះមកត្រឹម ១០ ភាគរយ​។ ការសម្រេចថ្មីនេះ នឹងចូលជាធរមានចាប់ពីថ្ងៃទី ១៤ ឧសភា តទៅ។

គេមើលឃើញថា នេះគឺជាជំហានដ៏ធំនៃការបន្ធូរបន្ថយភាពតានតឹងនៃសង្រ្គាមពាណិជ្ជកម្មរវាងមហាអំណាចសេដ្ឋកិច្ចចិន​ និងអាមេរិក ដែលបាន​ធ្លាក់ចុះទៅក្នុងសង្រ្គាមពន្ធរាប់តាំងពីលោក ត្រាំ ឡើងកាន់អំណាចនៅចុងខែមករា ដើមឆ្នាំ។

ការព្រមព្រៀមថ្មី ធ្វើឡើងក្រោយ​មន្រ្តីជាន់ខ្ពស់អាមេរិក ​រួមមានរដ្ឋមន្ត្រីក្រសួងរតនាគារអាមេរិក លោក Scott Bessent និងតំណាងសភា​ពាណិជ្ជកម្មអាមេរិក លោក​ Jamieson Greer បានជួបចរចាពន្ធជាមួយមន្រ្តីជាន់ខ្ពស់ចិន ដឹកនាំដោយ​ឧបនាយករដ្ឋមន្ត្រីចិន លោក He Lifeng។

ក្រៅតែពីនោះ សហរដ្ឋអាមេរិក និងចិន​ ក៏បាន​និយាយផងដែរ ​ពួកគេក៏នឹង «បង្កើតយន្តការដើម្បីបន្តការពិភាក្សាអំពីទំនាក់ទំនងសេដ្ឋកិច្ច និងពាណិជ្ជកម្ម»៕