ស៊ីហ្គេម២០២៥ ប្រកាសថ្ងៃប្រកួតយកមេដាយដំបូងជាផ្លូវការ

អ្នករៀបចំព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥ បានកំណត់ថ្ងៃប្រកួតដណ្តើមមេដាយមាសជាផ្លូវការ ស្របពេលក៏បានបញ្ជាក់បន្ថែមជុំវិញការផ្សាយផ្ទាល់សម្រាប់អ្នកគាំទ្រកីឡាដើម្បីទស្សនា និងគាំទ្រអត្តពលិកដែលពួកគេចូលចិត្ត។

ទន្ទឹមនឹងនោះ អ្នករៀបចំបានកំណត់ខែតុលា សម្រាប់ការប្រកួតតេស្តសាកល្បងកីឡាស៊ីហ្គេម ដោយអនុញ្ញាតឲ្យមានការត្រៀមលក្ខណៈល្អសម្រាប់ការប្រកួតសំខាន់ៗ។

លោក Preecha Laloon អនុប្រធាន​អាជ្ញាធរកីឡានៃប្រទេសថៃ សម្រាប់ការអភិវឌ្ឍ​កីឡា និងវិទ្យាសាស្ត្រកីឡា បានអញ្ជើញជាអធិបតីក្នុងកិច្ចប្រជុំគណៈកម្មាធិការបច្ចេកទេសកីឡាសម្រាប់ការប្រកួតកីឡាស៊ីហ្គេម លើកទី៣៣ និងអាស៊ានប៉ារ៉ាហ្គេម លើកទី១៣។ កិច្ចប្រជុំនេះធ្វើឡើងនៅថ្ងៃទី៣០ ខែមេសា ឆ្នាំ២០២៥ នាទីស្នាក់ការអាជ្ញាធរកីឡាថៃ។

លោក Preecha បានបង្ហើបថា កិច្ចប្រជុំបានពិភាក្សាអំពីវឌ្ឍនភាពចុងក្រោយនៃការងាររបស់ក្រុមការងារបច្ចេកទេស។ នេះរួមបញ្ចូលទាំងការរៀបចំ និងការសម្របសម្រួលសម្រាប់កន្លែងកីឡាដែលប្រើប្រាស់​ក្នុង​ការប្រកួត ការ​កែ​សម្រួល​សៀវ​ភៅ​បទ​បញ្ជា​ការប្រកួត ផែនការ​ផ្សព្វផ្សាយ​ និងការផ្សាយផ្ទាល់។

ការផ្សាយផ្ទាល់​នឹង​មាន​កីឡាចំនួន ២០ប្រភេទ។ កីឡាទាំងនោះរួមមានកីឡាអូឡាំពិក ១៣ប្រភេទ កីឡាយុទ្ធគុន ៦ប្រភេទ និងកីឡាប្រពៃណី ១ប្រភេទ។ ការប្រកួតដណ្ដើមមេដាយត្រូវបានគ្រប់ដណ្ដប់នៅទូទាំងខេត្តចំនួន៣ ដើម្បីធានាបាននូវការគ្របដណ្តប់អតិបរមា និងដើម្បីជៀសវាងការឃើញព្រឹត្តិការណ៍មេដាយច្រើនពេកក្នុងរយៈពេលតែមួយ។ ពិធីបើក និងបិទការប្រកួត នៅថ្ងៃទី០៩ និងថ្ងៃទី២០ ខែធ្នូ ដែលជាថ្ងៃមិនមានការប្រកួតដណ្ដើមមេដាយ។

លោកអនុប្រធាន​បានបន្ថែមថា ថ្ងៃប្រកួតដណ្ដើមមេដាយមាស ទី១ នៃស៊ីហ្គេម ឆ្នាំ២០២៥ គ្រោងធ្វើនៅថ្ងៃទី១០ ខែធ្នូ ចំពោះព័ត៌មានលម្អិតអំពីកីឡានឹងផ្អែកលើកាលវិភាគប្រកួត។

ក្រុមបច្ចេកទេសកីឡានឹងដំណើរការព្រឹត្តិការណ៍ប្រកួតតេស្តសាកល្បងកីឡាស៊ីហ្គេមនៅខែតុលា។ អ្នករៀបចំមិនទាន់បានកំណត់ពីវិញ្ញាសាកីឡាដែលត្រៀមរៀបចំឱ្យបានល្អនោះទេ ប៉ុន្តែកីឡាដែលមានលទ្ធភាពខ្ពស់គឺ វាយសី បាល់ទះ បាល់បោះ តេក្វាន់ដូ ជូជីតស៊ូ បាញ់កាំភ្លើង និងហែលទឹក៕

ប្រែសម្រួល៖ មន្នីរ័ត្ន
ប្រភព៖ SEA GAMES Thailand 2025